ព័ត៌មានជាតិ
កសិករអាចរកចំណូល ពីការលក់កៅស៊ូ មិនក្រោម ៣ ពាន់ដុល្លារក្នុង១ហិកតា
កសិករក្នុងខេត្តត្បូងឃ្មុំ និយមដាំដំណាំកៅស៊ូ ដោយសារងាយស្រួលថែទាំ និងចំណាយដើមទុនតិច ហើយឲ្យផលក៏សមរម្យដែរ ខណៈទីផ្សារក៏មានច្រើន។
មួយហិកតាដំណាំកៅស៊ូផ្តល់ផលជាទឹកប្រាក់ មិនក្រោម ៣ ពាន់ដុល្លារនោះទេ ក្នុង១ឆ្នាំ ខណៈកសិករដាំកៅភាគច្រើនមានជីវភាពធូរធារ។
លោក យិន សុភាន់ កសិកររស់នៅភូមិថ្មដារ ឃុំព្រះធាតុ ស្រុកអូររាំងឪ ខេត្តត្បូងឃ្មុំ បានបញ្ជាក់ឲ្យដឹងថា ដំណាំកៅស៊ូ ក្នុង១ហិកតា កសិករត្រូវចំណាយដើមទុនអស់ជិត១ម៉ឺនដុល្លារ ហើយត្រូវរង់ចាំរយៈពេល ៦ ឆ្នាំ ទើបហុចផលមកវិញ ៣ ពាន់ដុល្លារក្នុង១ ហិកតា។ តាមហាងឆេងទីផ្សារសព្វថ្ងៃដោយជ័រ ក្នុង១គីឡូក្រាមកៅស៊ូស្ងួត ឬកៅស៊ូក្រែប តម្លៃជិត៤ពាន់រៀល។
កៅស៊ូមានអាយុរហូតដល់ ៣០ ឆ្នាំ ឯណោះ ទើបវាលែងឲ្យផល ហើយកសិករអាចលក់ដើមវាបានទៀត។ សម្រាប់គ្រួសាររបស់ លោក យិន សុភាន់មានចម្ការកៅស៊ូ ៤ហិកតា ដែលទទួលបានចំណូលជាង ១ ម៉ឺនដុល្លារក្នុងឆ្នាំ។
លោក ហេង ពិសិដ្ឋ ប្រធានមន្ទីរកសិកម្មខេត្តត្បូងឃ្មុំបានឲ្យដឹងថា ដំណាំកៅស៊ូផ្តល់សារៈសំខាន់ដល់សេដ្ឋកិច្ច បរិស្ថាន និងសង្គមដូចជា៖ វាបានរួមចំណែកយ៉ាងសកម្មក្នុងការផ្តល់ប្រាក់ចំណូលដល់ខឿនសេដ្ឋកិច្ចជាតិ និងសង្គមគ្រួសារ បង្កើនការងារនៅមូលដ្ឋាន និងទប់ស្កាត់ការធ្វើចំណាកស្រុក និងបានរួមចំណែកការពារបរិស្ថាន ទប់ទល់នឹងភាពក្តៅខ្លាំងនៃអាកាសធាតុ ការហូរច្រោះដី និងបង្កើតជាគម្របបៃតង ជំនួសព្រៃឈើដែលរិចរិល និងផ្តល់ឈើសម្រាប់ធ្វើអុស ដែលអាចកាត់បន្ថយការកាប់ព្រៃឈើបាន។
ខេត្តត្បូងឃ្មុំ មានផ្ទៃដីដាំកៅស៊ូ ជិត ៩ ម៉ឺនហិកតា កៅស៊ូលក្ខណៈគ្រួសារមានចំនួនជិត ៥,២ម៉ឺនហិកតា ក្រុមហ៊ុនចម្ការកៅស៊ូកសិ-ឧស្សាហកម្ម និងក្រុមហ៊ុនចម្ការកៅស៊ូដីសម្បទានសេដ្ឋកិច្ច ចំនួនជាង៣ម៉ឺនហិកតា។
ទិន្នន័យរបស់អគ្គនាយកដ្ឋានគយ និងរដ្ឋាករកម្ពុជាបង្ហាញថា គិតចាប់ពីខែមករា ដល់ខែវិច្ឆិកា ឆ្នាំ២០២៣ ការនាំចេញកៅស៊ូ និងផលិតផលធ្វើពីកៅស៊ូ ទទួលបានប្រាក់ចំណូលជាង ៧៨៩ លានដុល្លារមានការកើនឡើងជាង ៧៤% ខណៈឆ្នាំ២០២២ ចំណូលបានពីការនាំចេញជ័រកៅស៊ូមានតែជាង៤៥២លានដុល្លារ៕
អត្ថបទ៖ សាន វីឡែម
-
សេដ្ឋកិច្ច១ សប្តាហ៍ ago
គម្រោងសាងសង់ស្ពានតភ្ជាប់ពីខេត្តកំពង់ឆ្នាំង-កំពង់ធំ កំពុងរង់ចាំថវិកាពីចិន
-
ព័ត៌មានជាតិ៤ ម៉ោង ago
ក្រោយជីកព្រែកហ្វូណនតេជោរួច វៀតណាមនឹងលែងមានឥទ្ធិពលមកលើវិស័យដឹកជញ្ជូនតាមផ្លូវទឹក
-
ព័ត៌មានអន្ដរជាតិ៥ ថ្ងៃ ago
រុស្ស៊ី ផ្ទុះការវាយលុកដំណាក់កាលថ្មីលើ អ៊ុយក្រែន ប្រើទាំងរថពាសដែក ទម្លាក់គ្រាប់បែក និងបាញ់កាំភ្លើងធំ
-
ព័ត៌មានអន្ដរជាតិ៤ ថ្ងៃ ago
ព្យុះព្រះអាទិត្យ ដ៏កាចសាហាវ វាយប្រហារភពផែនដី
-
ព័ត៌មានជាតិ៣ ថ្ងៃ ago
ការផ្លាស់ប្ដូរមេបញ្ជាការអាវុធហត្ថស្រុកមណ្ឌលសីមា ពុំមែនកំហុសឆ្គង ឬ វិន័យទណ្ឌកម្ម នោះទេ
-
ជីវិតកម្សាន្ដ៦ ថ្ងៃ ago
Huang Xiaoming ជួបមិត្តស្រីភ្លាមៗ ក្រោយចេញក្រៅជាមួយអតីតភរិយា Angelababy និងកូនប្រុស
-
នយោបាយ៦ ថ្ងៃ ago
ទីបំផុត បក្សដែលស្នើបង្កើតដោយលោក ឯម សុខសុវណ្ណ ត្រូវបានក្រសួងមហាផ្ទៃ ចុះឈ្មោះជាផ្លូវការ
-
ព័ត៌មានជាតិ៣ ថ្ងៃ ago
មន្ទីរកសិកម្មខេត្តកែប ច្រានចោលការចោទប្រកាន់ថា មន្រ្តីកាប់សាច់សត្វប្រើសចែកគ្នាដែលងាប់ក្នុងផ្ទះអ្នកស្រុក