ជីវិតកម្សាន្ដ

ម៉េង កែវពេជ្ជតា បញ្ជាក់ថា ងារសំនៀងមាសប្រសិទ្ធិនាមតាំងពីអាយុ ១០ ឆ្នាំ មកម្ល៉េះ

បានផុស

២ years មុន

នៅ

ថ្ងៃព្រហស្បតិ៍ ១៦ ឧសភា ២០២៤

ដោយ

តារាចម្រៀងជើងចាស់សំនៀងពីរោះរណ្តំចិត្តអ្នកនាង ម៉េង កែវពេជ្ជតា បានចេញមកបញ្ជាក់ថា ងារដែលត្រូវបានអ្នកគាំទ្រហៅថា តារាចម្រៀងសំនៀងមាសនោះត្រូវបានលោកជំទាវ ច័ន្ទ ធី ប្រសិទ្ធិនាមឲ្យតាំងពីអាយុ ១០ ឆ្នាំ មកម្ល៉េះ។

ជាការពិតគេកត់សម្គាល់ឃើញថា អ្នកនាង ម៉េង កែវពេជ្ជតា ថ្វីត្បិតតែបច្ចុប្បន្នមានវ័យរៀងច្រើនបន្តិចក្តី តែតារាស្រីរូបនេះ នៅរក្សាបានការគាំទ្រ និងមានប្រជាប្រិយភាពសម្រាប់ទីផ្សារចម្រៀងគ្រប់មជ្ឈដ្ឋាន ពោលគឺទទួលបានការគាំទ្រទាំងមនុស្សវ័យចំណាស់ និងមិត្តៗ យុវវ័យផងដែរ ខណៈអ្នកនាងត្រូវបានគេចាត់ទុកដែរថា ជារាជនីសម្លេងពីរោះរណ្តំចិត្ត។

ដោយឡែកស្របពេលដែលមានមតិមួយចំនួនផ្ទុះការវែកញែករឿងងារតារាចម្រៀងសំនៀងមាសនោះស្រាប់តែអ្នកនាង ម៉េង កែវពេជ្ជតា បានលើកឡើងថា«ងារ សំនៀងមាស លោកជំទាវ ច័ន្ទ ធី ប្រសិទ្ធិនាមឲ្យតាំងពីខ្ញុំអាយុ ១០ឆ្នាំបន្ទាប់មកមានការនិយមហៅតៗគ្នា រួចក៏មានផ្សាយលើក្របមុខ និងក្នុងទំព័រទស្សនាវដ្ដីតាំងពីឆ្នា១៩៩៥ និងលេខក្រោយៗទៀតព្រមទាំងសារព័ត៌មានផ្សេងៗទៀត»។

កំពូលតារាចម្រៀងអ្នកនាង ម៉េង កែវពេជ្ជតា បានបន្ថែមទៀតថា «មិនមែនខ្ញុំហៅខ្លួនឯងទេ សូមអរគុណបងប្អូនដែលតែងផ្ញើឯកសារមកឲ្យ( នៅមានច្រើនទៀត) អរគុណទស្សនិកជនអរគុណទាំងអស់គ្នា»។ យ៉ាងណាក៏មានការលើកឡើងដែរថា «គ្មានអ្វីដែលមិនត្រឹមត្រូវនោះទេ ព្រោះសម្ថភាពរបស់បងស្រីពិតជាសក្ដិសមគ្រាន់តែបច្ចុប្បន្ននេះមនុស្សគេចូលចិត្តចោលគ្រាប់ពេជ្ររើសដុំថ្មតែប៉ុណ្ណឹង»។

ចំណែកខ្លះទៀងក៏បានបញ្ចេញមតិដែរថា «អ្នកគ្រូជាអ្នកសិល្បៈដ៏គំរូខ្ញុំចូលចិត្តស្តាប់ចម្រៀងអ្នកគ្រូណាស់ពេលធ្វើជាគណៈកម្មការដាក់ពិន្ទុវិញផ្តល់ព័ត៌មាន ត្រឡប់ល្អៗពិតជាកុលធិតាដ៏ឆ្នើមសំរាប់វិស័យសិល្បៈ បានគ្រប់ទម្រង់ក្នុងព្រះរាជាណាចក្រកម្ពុជា។ ខ្ញុំមិនចូលចិត្តក្មេងម្នាក់នៅប្រទេសអូស្ត្រាលីចូលចិត្ត និយាយវាយប្រហារមិនឲ្យតំលៃជាន់ឈ្លីកិត្តិយសជាសាធារណ:៕

អត្ថបទ៖ ចាន់រ៉ា