សន្តិសុខសង្គម

អាជ្ញាធរស្រុកដំណាក់ចង្អើរ ឱ្យម្ចាស់សំណង់ខឿនថ្មរុះរើចេញពីឆ្នេរអង្កោលដោយគ្មានលក្ខខណ្ឌ

បានផុស

១ year មុន

នៅ

ថ្ងៃពុធ ១៥ ឧសភា ២០២៤

ដោយ

កែប ៖ នាថ្ងៃទី ១៥ ខែឧសភាឆ្នាំ២០២៤នេះរដ្ឋបាលស្រយកស្រុកដំណាក់ចង្អើរបានចេញលិខិតជូនដល់ម្ចាស់ សំណង់រៀបខឿនថ្មប្រវែង ៤៥ម៉ែត្រ និងកញ្ចុះឈើចំនួន ០២ខ្នង របស់ម្ចាស់ឈ្មោះ អ៊ីវ ស្រី ដែលបានរៀបខឿន និងសង់កញ្ចុះរំលោភលើដីឆ្នេរស្ថិតនៅឆ្នេរអង្កោល ក្នុងភូមិអង្កោល ឃុំអង្កោល ស្រុកដំណាក់ចង្អើរ ខេត្តកែប។ រដ្ឋបាលស្រុកដំណាក់ចង្អើរ តម្រូវឲ្យរុះរើចេញវិញទាំងស្រុង នៅត្រឹមថ្ងៃសុក្រ ក្នុងសប្តាហ៍នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នេះបើយោងតាមលិខិតរបស់រដ្ឋបាលស្រុកដំណាក់ចង្អើរ ដែលបានជម្រាបជួនលោកស្រី អ៊ីវ ស្រី ដែលជាម្ចាស់សំណង់ខាងលើ។

ក្នុងលិខិតខាងលើបានបញ្ជាក់ថា សំណង់នោះបានធ្វើឱ្យប៉ះពាល់ដល់សណ្តាប់ធ្នាប់ របៀបរៀបរយ សោភ័ណភាព និងអនាម័យបរិស្ថាននៅតាមតំបន់ឆ្នេរ។

ដូចនេះដើម្បីរៀបចំឆ្នេរអង្កោលឱ្យក្លាយជាឆ្នេរសាធារណៈសម្រាប់សាធារណជនមកលេងកម្សាន្តដោយសេរី និងរក្សាបាន នូវសន្តិសុខ សណ្តាប់ធ្នាប់ របៀបរៀបរយសាធរណៈល្អប្រសើរនោះ រដ្ឋបាលស្រុកដំណាក់ចង្អើរបានធ្វើការណែនាំដល់ម្ចាស់សំណង់ ត្រូវ ទី១. បញ្ឈប់ការសាងសង់ខឿនថ្ម និងសំណង់ផ្សេងៗទៀតដែលគ្មានច្បាប់អនុញ្ញាតនៅលើដីឆ្នេរ ចាប់ថ្ងៃជូនដំណឹងនេះតទៅ ទី២.ត្រូវរុះរើសំណង់ខឿនថ្ម ដែលបានរៀបរួច និងកញ្ចុះឈើចំនួន០២ខ្នងទៀត ដែលបានសង់លយចូលជ្រៅមកលើចំណីដីឆ្នេរចេញវិញដោយស្ម័គ្រចិត្ត និងប្រមូលដឹកជញ្ជូនសម្ភារៈសំណល់ទាំងនោះចេញឱ្យអស់ពីទីតាំងនៅ ត្រឹមថ្ងៃទី១៧ ខែឧសភា ឆ្នាំ២០២៤ខាងមុខចេញវិញ ជាកំហិត។

ក្នុងករណីដែលមិនអនុវត្តតាមការណែនាំ កម្លាំងគណៈបញ្ជាការឯកភាពរដ្ឋបាលស្រុកដំណាក់ចង្អើរ និងមានវិធានការច្បាប់ចុះរុះរើសំណង់ខឿនថ្ម និងកញ្ចុះនោះចេញវិញដោយគ្មានការតវ៉ា ហើយការចំណាយលើកម្លាំងពលកម្ម ជាបន្ទុកខាងភាគីម្ចាស់សំណង់។

លោក ឡុង ខន តំណាងម្ចាស់សំណង់ខាងលើ បានឱ្យដឹងនាថ្ងៃទី ១៥ ខែឧសភា ឆ្នាំ២០២៤នេះថា ការរៀបខឿនថ្មនេះ គឺដើម្បីទប់ទឹកសមុទ្រ ដែលបោកបក់ធ្វើឱ្យច្រោះដីខ្សាច់បណ្តាលឲ្យខូចខាតដល់សំណង់កញ្ចុះរបស់ខ្លួន និងដើម្បីទប់ស្កាត់សំរាមដែលហូរមកទើរនៅមុខទីតាំងរបស់ខ្លួនផង។

លោកថា ការរៀបខឿនថ្មនេះ មិនមានបំណងរំលោភយកដីចំណីសមុទ្រនោះទេ។

ដោយឡែកចំពោះការបញ្ជាឲ្យរុះរើពីសំណាក់អាជ្ញាធរស្រុក លោកមិនទាន់បញ្ជាក់ថា យ៉ាងណានៅឡើយ ដោយរង់ចាំការណែនាំពីម្ចាស់កញ្ចុះ។

គួរបញ្ជាក់ថា តំបន់ឆ្នេរសមុទ្រអង្កោល ត្រូវទទួលរងការរំលោភយកជាបន្តបន្ទាប់ ជាក់ស្តែងដូចការរៀបខឿនថ្មចូលដីចំណីឆ្នេរសមុទ្រនេះជាដើម ក្រៅពីនោះ នៅជាប់ទីតាំងគ្នានេះ ក៏មានការរៀបចំខឿនថ្មរួចរាល់ជាស្ថាពរហើយដែរ តែយ៉ាងណាអាជ្ញាធរស្រុកដំណាក់ចង្អើរ កំពុងមានចំណាត់ការយ៉ាងណាទៅលើម្ចាស់ទីតាំងផ្សេងៗទាំងអស់បានឬយ៉ាងណានោះ៕

ដោយ ៖ សឹង រ៉ាត់