លេចចេញកូវីដបំប្លែងខ្លួនប្រភេទថ្មីមួយទៀត កំពុងអុកឡុកនៅថៃ បង្កក្តីបារម្ភខ្លាំង

ប្រទេសថៃបានរកឃើញវីរុសកូវីដបំប្លែងខ្លួនប្រភេទថ្មីឈ្មោះ HK2 ដែលកំពុងបង្កក្តីបារម្ភជាពន់ពេក ហើយវីរុសនេះទៀតសោត ត្រូវបានគេដឹងថា ជាដើមចមជំរុញឲ្យករណីឆ្លងនៅក្នុងប្រទេសថៃ ហក់ឡើងខ្លាំងឈានដល់កម្រិតគ្រោះថ្នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ Bangkok Post កាលពីដើមសប្តាហ៍, លោកវេជ្ជបណ្ឌិត Yong Poovorawan អ្នកឯកទេសខាងមេរោគនៅនាយកដ្ឋានកុមារ នៃមហាវិទ្យាល័យវេជ្ជសាស្ត្រ នៅសាកលវិទ្យាល័យ Chulalongkorn បានឲ្យដឹងថា HK2 កំពុងបង្កការចម្លងរីករាលដាល់ខ្លាំងជាង JN1 ទៅទៀត ហើយថៃ មិនទាន់មានការសិក្សាច្បាស់លាស់អំពីធាតុបំប្លែងថ្មីនេះនៅឡើយទេ។ ​ត្បិតវាឆ្លងរហ័សក្នុងអត្រាគូរឲ្យកង្វល់ក៏ពិតមែន ប៉ុន្តែវាមិនបណ្តាលឲ្យអ្នកជំងឺឈឺធ្ងន់ឡើយ។

នាយកដ្ឋានគ្រប់គ្រងជំងឺ (DDC) ថៃ បានប្រកាសថា ក្នុងរយៈពេលមួយសប្តាហ៍ គិតត្រឹមថ្ងៃចន្ទទី១៣ខែឧសភា, អ្នកជំងឺចំនួន ១ ៨៨០នាក់ ត្រូវបានបញ្ជូនចូលសម្រាកព្យាបាលជំងឺកូវីដ១៩នៅមន្ទីរពេទ្យ ពោលគឺស្មើនឹង៦៨៩ករណី ជារៀងរាល់ថ្ងៃ។

អ្វីដែលគេព្រួយបារម្ភខ្លាំងគឺថា ក្នុង​នោះក៏មាន​មនុស្ស​១១​នាក់ បាត់បង់ជីវិតដែរ ប៉ុន្តែជនរងគ្រោះភាគច្រើនគឺជាក្រុមដែលមានហានិភ័យ ដូចជាមនុស្សចាស់ ស្ត្រីមានផ្ទៃពោះ និងមនុស្សដែលមានជំងឺរ៉ាំរ៉ៃជាដើម។

លើសពីនេះ តាមការបញ្ជាក់ពី DDC ចាប់តាំងពីខែមករាមក មនុស្សប្រហែល១៥ ០០០នាក់ បានចូលសម្រាកព្យាបាលកូវីដនៅមន្ទីរពេទ្យ ខណៈមានអ្នកស្លាប់ចំនួន១០៤នាក់៕

អត្ថបទ៖ សុខ សុវណ្ណ

ចុចអាន៖ តាំងពីចប់សង្ក្រាន្តមក ថៃ ធ្ងន់ធ្ងរខ្លាំងដោយសារកូវីដ ឯអ្នកស្លាប់ ក៏មានច្រើនទៅៗ