អេហ្ស៊ីប ព្រមានផលប៉ះពាល់ធ្ងន់ធ្ងរ បើ អ៊ីស្រាអែល បន្តប្រតិបត្តិការលើទីក្រុង Rafah

មន្ត្រីអេហ្ស៊ីបព្រមានថានឹងពិចារណាកាត់បន្ថយទំនាក់ទំនងជាមួយអ៊ីស្រាអែល ប្រសិនបើប្រទេសនេះនៅតែបន្តប្រតិបត្តិការយោធានៅក្នុងទីក្រុង Rafah ភាគខាងត្បូងហ្គាហ្សាជាប់ព្រំដែនអេហ្ស៊ីប ។ នេះបើយោងតាមការចេញផ្សាយរបស់សារព័ត៌មាន CNN នៅថ្ងៃទី១៦ ខែឧសភា​ ។

មន្ត្រីអេហ្ស៊ីបបាននិយាយថា ការសម្របសម្រួលរវាងប្រទេសទាំងពីរលើប្រតិបត្តិការនៅទីក្រុង Rafah ដែលអេហ្ស៊ីបបានជំទាស់ជាសាធារណៈ គឺមិនដំណើរការល្អទេ ដូចនេះអេហ្ស៊ីបសូម​ព្រមាន​អ៊ីស្រាអែល​ពី​ផល​ប៉ះ​ពាល់​ដ៏​ធ្ងន់ធ្ងរ បើសិនអ៊ីស្រាអែលនៅតែផ្គើន ។

នៅក្នុងសប្ដាហ៍នេះ ប្រទេសទាំងពីរបានប្រឈមភាពតានតឹងដាក់គ្នា បន្ទាប់ពីអ៊ីស្រាអែលបានចាប់ផ្តើមប្រតិបត្តិការយោធាវាយលុកនៅទីក្រុង Rafah កាលពីសប្តាហ៍មុន និងបានដណ្តើមយកទឹកដីប៉ាឡេស្ទីនដែលមានព្រំដែនជាមួយអេហ្ស៊ីបមួយនេះផងដែរ ។

ក្រោយមកអេហ្ស៊ីបបានបដិសេធមិនសម្របសម្រួលការបញ្ជូនជំនួយទៅកាន់តំបន់ហ្គាហ្សាជាមួយអ៊ីស្រាអែល ហើយការផ្តល់ជំនួយដល់ប៉ាឡេស្ទីនអាចត្រូវបានផ្អាក ដោយសារតែអេហ្ស៊ីបមិនអាចធានាសុវត្ថិភាពនៃឡានដឹកទំនិញបានទេ ព្រោះឡានទាំងនោះនឹងទទួលរងការវាយប្រហារដោយពួកសកម្មប្រយុទ្ធប៉ាឡេស្ទីនដែលផ្តោតលើកងទ័ពអ៊ីស្រាអែល ។

គួរបញ្ជាក់ថា ទីក្រុង Rafah គឺជាច្រកចូលនូវជំនួយសង្គ្រោះជិតមួយភាគបួនចូលទៅក្នុងតំបន់ហ្គាហ្សា មុនពេលប្រតិបត្តិការរបស់អ៊ីស្រាអែល ខណៈក្រសួងការបរទេសសហរដ្ឋអាមេរិកបានព្រមានថា មានតែរថយន្តជំនួយមនុស្សធម៌ចំនួន ៥០ គ្រឿងប៉ុណ្ណោះដែលបានឆ្លងកាត់ទៅកាន់តំបន់ហ្គាហ្សា ពោលគឺធ្លាក់ចុះពីរាប់រយឡានក្នុងមួយថ្ងៃក្នុងសប្តាហ៍មុន ដែលជាចំនួនមិនគ្រប់គ្រាន់នោះទេ ៕

អត្ថបទ៖ ប៊ុន សុភាព