កម្ពុជា-ចិន នឹងប្រារព្វព្រឹត្តិការណ៍ឆ្នាំនៃការផ្លាស់ប្តូរប្រជាជន និងប្រជាជនឆ្នាំ២០២៤ នៅសៀមរាប

កម្ពុជា-ចិន នឹងរៀបចំព្រឹត្តិការណ៍ដ៏ធំមួយ គឺឆ្នាំនៃការផ្លាស់ប្តូរប្រជាជន និងប្រជាជន កម្ពុជា-ចិន ឆ្នាំ២០២៤ នៅទីលានជល់ដំរីនៃរមណីយដ្ឋានអង្គរ នាល្ងាចថ្ងៃទី១៣ ខែមករា ឆ្នាំ២០២៤ខាងមុខនេះ។ នៅព្រឹកថ្ងៃទី០៩ ខែមករា នេះ ក្រុមការងារពាក់ព័ន្ធបានចាប់ផ្តើមបើកកិច្ចប្រជុំស្តីពី ការរៀបចំព្រឹត្តិការណ៍ឆ្នាំនៃការផ្លាស់ប្តូរប្រជាជន និងប្រជាជន កម្ពុជា-ចិន ឆ្នាំ២០២៤ នេះ នៅសាលាខេត្តសៀមរាប។

នៅក្នុងកិច្ចប្រជុំនាព្រឹកថ្ងៃទី០៩ ខែមករា ឆ្នាំ២០២៤ នេះ រដ្ឋលេខាធិការក្រសួងទេសចរណ៍កម្ពុជា លោក ប្រាក់ ផាណារ៉ា បានលើកឡើងថា ព្រឹត្តិការណ៍នេះ គឺជាការបង្ហាញពីចំណងមិត្តភាពរវាងប្រទេសទាំង២។ ក្រៅពីបង្ហាញនូវចំណងមិត្តភាពជ្រាលជ្រៅ លោកបន្តថា  ព្រឹត្តិការណ៍នេះក៏ជាការបង្ហាញ និងលាងជម្រះមន្ទិលនានាដល់អ្នកទេសចរឲ្យបានឃើញអំពីស្ថានភាពសុខ សុវត្ថិភាពនៅកម្ពុជា បន្ទាប់ពីប្រទេសកម្ពុជារងគ្រោះដោយសារក្រុមអ្នកលេងបណ្តាញសង្គមមួយចំនួនផ្សព្វផ្សាយនូវអ្វីដែលជារឿងមិនល្អ និងប្រាសចាកពីការពិត។

លោក ប្រាក់ ផាណារ៉ា បញ្ជាក់បន្ថែមថា ការកំណត់យកឆ្នាំ២០២៤ ជាឆ្នាំផ្លាស់ប្តូរប្រជាជន និងប្រជាជនកម្ពុជា-ចិន នេះ គឺកើតមានឡើង បន្ទាប់ពីប្រមុខរាជរដ្ឋាភិបាលកម្ពុជា សម្តេចមហាបវរធិបតី ហ៊ុន ម៉ាណែត បានអញ្ជើញទៅចូលរួមកិច្ចប្រជុំកំពូលស្តីពី ខ្សែក្រវ៉ាត់ និងផ្លូវ កាលពីខែតុលា ឆ្នាំ២០២៣ នៅប្រទេសចិន ដែលនៅក្នុងជំនួបរវាងសម្តេចធិបតី និងលោក ស៊ី ជីនពីន នាពេលនោះ ថ្នាក់ដឹកនាំនៃប្រទេសទាំងពីរ បានឯកភាពគ្នាសម្រេចកំណត់យកឆ្នាំ២០២៤ ជាឆ្នាំនៃការផ្លាស់ប្តូរប្រជាជន និងប្រជាជន រវាងប្រទេសទាំង២។ លោកបន្តថា ការសម្រេចនេះ មានអត្ថន័យសំខាន់ជ្រាលជ្រៅចំពោះចំណងមិត្តភាពរវាងកម្ពុជា និងចិន។

ព្រឹត្តិការណ៍ដ៏ធំមួយនេះ និងមានការចូលរួមពីថ្នាក់ដឹកនាំនៃប្រទេសចិន និងអ្នកទេសចរជនជាតិចិនប្រមាណ៣០០នាក់ ។ អភិបាលរងខេត្តសៀមរាប លោក យុន លីនណេ បានលើកឡើងថា រដ្ឋបាលខេត្តសៀមរាប បានយកចិត្តទុកដាក់ខ្លាំងក្នុងការការពារសុខ សុវត្ថិភាពរបស់អ្នកទេសចរមកពីគ្រប់ទិសទី។ លោកបន្តថា សម្រាប់ព្រឹត្តិការណ៍ដ៏មានអត្ថន័យនេះ ថ្នាក់ដឹកនាំខេត្តសៀមរាប ក៏បានត្រៀមខ្លួនរួចជាស្រេចនៅក្នុងការរៀបចំសន្តិសុខ សណ្តាប់ធ្នាប់ឲ្យបានល្អបំផុតថែមទៀតផង៕

ដោយ៖ គឿន វេត