ស្នងការនគរបាលខេត្តសៀមរាបឃាត់ខ្លួនបុគ្គលិកអាជ្ញាធរអប្បរា២នាក់ និងបំភ្លឺលម្អិតជុំវិញហិង្សា​លើក្មេងលក់អណ្តើក

ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តសៀមរាប បានឱ្យដឹងថា កាលពីថ្ងៃទី១១ ខែមករា ឆ្នាំ២០២៤ វេលាម៉ោង ១៧:៣៥នាទី មានករណីបុគ្គលិកអាជ្ញាធរជាតិអប្សរា ប្រើហិង្សាដោយចេតនា​ទៅលើក្មេងដើរ​លក់កូនអណ្ដើកនៅមុខប្រាសាទអង្គរ ។

បន្ទាប់ពីទទួលបានព័ត៌មានភ្លាម លោកឧត្តមសេនីយ៍ទោ តេង ច័ន្ទណាត ស្នងការ នៃស្នង ការដ្ឋាន​នគរបាល​ខេត្ត​សៀមរាប បានចាត់តាំងកម្លាំងជំនាញ នៃការិយាល័យនគរបាលព្រហ្មទណ្ឌកម្រិតស្រាល ដើម្បីចុះធ្វើការស៊ើបអង្កេត និងស្រាវជ្រាវករណីបុគ្គលិកអាជ្ញាធរជាតិអប្សរា ប្រើហិង្សាដោយចេតនាទៅលើក្មេងដើរលក់កូន អណ្ដើកនៅ​មុខប្រាសាទអង្គរ។

ជាក់ស្តែងនៅថ្ងៃទី១២ ខែមករា ឆ្នាំ២០២៤ កម្លាំងសមត្ថកិច្ចបានចុះធ្វើការស្រាវជ្រាវ និងបានធ្វើការសាកសួរជនរង​គ្រោះដែលមានឈ្មោះ ណុល សំណាង អាយុ ១៩ឆ្នាំ ជនជាតិខ្មែរ សញ្ជាតិខ្មែរ មានអាសយដ្ឋានបច្ចុប្បន្ន​នៅភូមិរុនតាឯក ឃុំរុនតាឯក ស្រុកបន្ទាយស្រី ខេត្តសៀមរាប ។

តាមការឆ្លើយបំភ្លឺរបស់ជនរងគ្រោះបានឲ្យដឹងថា៖ នៅថ្ងៃទី១១ ខែមករា ឆ្នាំ២០២៤ វេលាម៉ោង ១៤:០០នាទី ខ្លួនបានចាប់សត្វអណ្តើកចំនួន ៧ក្បាល ពីក្នុងកសិន្ទុអង្គរវត្ត ហើយនៅវេលាម៉ោង ១៧:៣០នាទី ឈ្មោះ ណុល សំណាង និងឈ្មោះ ឌី ណេត ភេទប្រុស អាយុ ១៥ឆ្នាំ និងម្នាក់ទៀតឈ្មោះ បាយ ប៊ីត ភេទប្រុស អាយុ ២២ឆ្នាំ បានដើរលក់កូនអណ្ដើកនៅចំណុចរានហាលអង្គរវត្ត ពេលនោះឈ្មោះ ណុល សំណាង បានលក់ដាច់​អស់កូន​អណ្តើកចំនួន ៥ក្បាល បានប្រាក់ចំនួន ៥ម៉ឺនរៀល ស្រាប់តែមានកម្លាំងអាជ្ញាធរ ជាតិអប្សរាមានគ្នាប្រហែលជា៤ ទៅ៥នាក់ ដេញចាប់ពួកគេ ពេលនោះឈ្មោះ ទី ពោត និងឈ្មោះ បាយ ប៊ីត បានរត់ចូលព្រៃ និងលោត​ចូលទឹកក​សិន្ធុអង្គរអស់ទៅ នៅសល់ឈ្មោះ ណុល សំណាង ត្រូវបានកម្លាំងអាជ្ញាធរជាតិអប្សរាចាប់បាន ហើយបានចាប់ទាញ​កអាវជនរងគ្រោះជាប់ហើយបានទះកំភ្លៀងមួយដៃ និងទាត់ចំនួនមួយជើងបន្ថែមទៀត ហើយនាំជនរងគ្រោះ​ទៅចំណុចក្បែរមាត់ទឹកមុខស្ពានបណ្តែតទឹកប្រាសាទអង្គរវត្ត ដើម្បីរង់ចាំឡានមកដឹកយកទៅឲ្យជំនាញ ខណៈ ពេលនោះជនរងគ្រោះយំមិនឈប់ ទើបឈ្មោះ សុខ សឿន ស្រែកថា «ហ្មងឈប់យំអត់?» ហើយគេបាន​ដើរមកពីមុខ​ជនរងគ្រោះ និងធ្វើសកម្មភាពទះកំភ្លៀងចំសៀតផ្កាខាងឆ្វេង និងឈ្មោះ ហៃ រដ្ឋា បានដើរទៅខាងក្រោយជនរងគ្រោះ ទាត់ថែមមួយជើងទៀត ដល់ពេលឡានមកដល់ទើបពួកគេយកជនរងគ្រោះទៅប្រគល់ឲ្យមន្ត្រីបរិស្ថាននៅកន្លែងស្នាក់ ការតំបន់ការពារទេសភាពអង្គរ ដែលមានទីតាំងនៅទល់មុខចែកសំបុត្រចូលតំបន់អង្គរ ។​

ចំពោះករណីនេះត្រូវបានសមត្ថកិច្ចធ្វើការស្រាវជ្រាវនាំខ្លួនមកកាន់ស្នងការដ្ឋាននគរបាលខេត្តសៀមរាប ហើយឈានដល់ការឃាត់ខ្លួនឈ្មោះ សុខ សឿន និងឈ្មោះ ហៃ រដ្ឋា ទៅតាមបញ្ហារបស់​ព្រះរាជអាជ្ញា​អមសាលាដំបូងខេត្តសៀមរាប៕