មន្ត្រីក្រសួងការងារ ជំរុញយុវជនក្រីក្រ និងងាយរងហានិភ័យ បន្តចូលរៀនជំនាញឥតបង់ថ្លៃ

មន្ត្រីជាន់ខ្ពស់ ក្រសួងការងារ និងបណ្តុះបណ្តាលវិជ្ជាជីវៈ បានជំរុញឱ្យយុវជនមកពីគ្រួសារក្រីក្រ និងគ្រួសារងាយរងហានិភ័យ បន្តចុះឈ្មោះចូលរៀនជំនាញវិជ្ជាជីវៈ និងបច្ចេកទេសឥតបង់ថ្លៃបន្តទៀត ខណៈវគ្គដំបូងមានយុវជនចុះឈ្មោះចូលរៀនប្រមាណ ២ ម៉ឺននាក់។

លោក កត្តា អ៊ន រដ្ឋលេខាធិការ និងជាអ្នកនាំពាក្យ ក្រសួងការងារ និងបណ្តុះបណ្តាលវិជ្ជាជីវៈ មានប្រសាសន៍នៅព្រឹកថ្ងៃទី១៦ ខែមករា នេះថា ការចុះឈ្មោះចូលរៀនជំនាញវិជ្ជាជីវៈ និងបច្ចេកទេសជាច្រើនមុខនេះ មិនតម្រូវឱ្យបង់ប្រាក់ទេ ហើយចំពោះយុវជនមកពីគ្រួសារក្រីក្រ និងគ្រួសារងាយរងហានិភ័យ នឹងទទួលបានថវិកាឧបត្ថម្ភបន្ថែមចំនួន ២៨ ម៉ឺនរៀល ក្នុង ១ ខែថែមទៀត។ ជាមួយគ្នានេះ យុវជនមកពីសេដ្ឋកិច្ចក្នុង ឬ ក្រៅប្រព័ន្ធ ឬ កម្មករ-និយោជិតដែលមានបំណងចង់រៀនជំនាញបន្ថែម ក៏អាចចុះឈ្មោះចូលរៀនដោយឥតគិតថ្លៃបានដែរ ប៉ុន្តែមិនទទួលបានប្រាក់ឧបត្ថម្ភដូចយុវជនមកពីគ្រួសារក្រីក្រ និងងាយរងហានិភ័យទេ។

លោក កត្តា អ៊ន មានប្រសាសន៍បន្តថា យុវជនអាចចុះឈ្មោះចូលរៀននៅតាមសាលាបណ្តុះបណ្តាលវិជ្ជាជីវៈរបស់ ក្រសួងការងារ ឬតាមរយៈ TVET 1.5M ដោយអាចទាញយកកម្មវិធីនេះពី APPSTORE (IOS) និង PlayStore និងពី APPGallery ផងដែរ។

លោក កត្តា អ៊ន បានបន្តទៀតថា ក្រៅពីនេះយើងបានធ្វើយុទ្ធនាការផ្សព្វផ្សាយតាមបណ្តាញទំនាក់ទំនងសង្គម Facebook, Telegram, YouTube, TikTok និងតាមបណ្តាញសង្គមរបស់សិល្បករ តារាចម្រៀង និងអ្នកមានប្រជាប្រិយភាពក្នុងបណ្ដាញសង្គមដូចផងដែរ។

រាជរដ្ឋាភិបាលបានប្រកាសបើក កម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេសដោយឥតគិតថ្លៃ ដល់យុវជនមកពីគ្រួសារក្រីក្រ និងគ្រួសារងាយរងហានិភ័យ ១លាន ៥សែននាក់ កាលពីថ្ងៃទី១៤ ខែវិច្ឆិកា ឆ្នាំ២០២៣ ហើយក្រសួងបានបើកវគ្គបណ្តុះបណ្តាលលើកទី១ នៅថ្ងៃទី១៥ ខែមករា ឆ្នាំ២០២៤ ដោយមានយុវជនចុះឈ្មោះចូលរៀនប្រមាណ ២ ម៉ឺននាក់។

លោក  ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍ថា យុវជនដែលបានចុះឈ្មោះចូលរៀននាពេលនេះ មិនមែនធ្វើតែសម្រាប់ខ្លួនឯងប៉ុណ្ណោះទេ តែថែមទាំងធ្វើសម្រាប់គ្រួសារ សង្គមជាតិ ហើយក៏ជនគំរូសម្រាប់យុវជនមកពីគ្រួសារក្រីក្រ និងគ្រួសារងាយរងហានិភ័យ ផ្សេងទៀតដែរ។

លោករដ្ឋមន្ត្រីបានបន្តថា ប្រសិនបើយុវជនដែលចុះឈ្មោះចូលរៀនវគ្គដំបូងនេះ មិនជោគជ័យ គឺក្រសួងការងារ និងបណ្ដុះបណ្ដាលវិជ្ជាជីវៈ ក៏ដូចជារាជរដ្ឋាភិបាល ក៏មិនជោគជ័យដែរ។ ដូច្នេះទាំងក្រសួង ទាំងរាជរដ្ឋាភិបាល និងយុវជនដែលចុះឈ្មោះចូលរៀន មានបេសកកម្មរួមគ្នា គឺធ្វើយ៉ាងណាឱ្យការបណ្ដុះបណ្ដាលជំនាញវិជ្ជាជីវៈ និងបច្ចេកទេសនេះ ទទួលបានជោគជ័យ៕

អត្ថបទ៖ សំអឿន