ព័ត៌មានជាតិ

ក្រសួងការងារ ដាក់ចេញយន្តការពង្រឹងទប់ស្កាត់ និងបំបាត់ទម្រង់ធ្ងន់ធ្ងរ ពលកម្មកុមារនៅក្នុងវិស័យសិប្បកម្មឡឥដ្ឋ

បានផុស

១ year មុន

នៅ

ថ្ងៃពុធ ៣០ មេសា ២០២៥

ដោយ

ក្រសួងការងារ និងបណ្ដុះបណ្ដាលវិជ្ជាជីវៈ បានដាក់ចេញនូវយន្តការមួយចំនួន ដើម្បីពង្រឹងទប់ស្កាត់ និងបំបាត់ទម្រង់ធ្ងន់ធ្ងរ នៃពលកម្មកុមារនៅក្នុងវិស័យសិប្បកម្មឡឥដ្ឋឱ្យកាន់តែមានប្រសិទ្ធភាពបន្ថែមទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍នៅព្រឹកថ្ងៃទី ៣០ មេសា នេះថា ក្នុងគោលបំណងពង្រឹងការទប់ស្កាត់ និងបំបាត់ទម្រង់ធ្ងន់ធ្ងរ នៃពលកម្មកុមារនៅក្នុងវិស័យសិប្បកម្មឡឥដ្ឋ ក្រសួងការងារ និងបណ្ដុះបណ្ដាលវិជ្ជាជីវៈ បានដាក់ចេញនូវយន្តការ និងវិធានការជាច្រើន ដូចជា ក្រសួង បានចុះធ្វើអធិការកិច្ចតាមរោងចក្រ និងសិប្បកម្មឡឥដ្ឋជាប្រចាំ ដើម្បីធានាថាមិនមានការជួលកុមារធ្វើការជាផ្លូវការ។ អនុវត្តច្បាប់ចំពោះម្ចាស់សិប្បកម្មណាដែលល្មើសនឹងច្បាប់ការងារ។

អនុវត្តផែនការសកម្មភាពជាតិ ដើម្បីបញ្ចប់ទម្រង់ធ្ងន់ធ្ងរ នៃពលកម្មកុមារ ដែលមានចំណុចសំខាន់ៗ ដូចជា ការអប់រំ ការពង្រឹងច្បាប់ និងការចូលរួមរបស់សហគមន៍។ សហការជាមួយអង្គការអភិវឌ្ឍន៍ និងអង្គការសង្គមស៊ីវិល និងសហគមន៍អន្តរជាតិ រួមមានអង្គការ ILO , អង្គការ UNICEF និងអង្គការWorld Vision ក្នុងការផ្តល់ការអប់រំជំនួយ និងជំនាញជំនួសដល់កុមារ និងគ្រួសារ ដើម្បីកុំឱ្យពឹងផ្អែកលើចំណូលពីកុមារ។

បន្ថែមពីនេះបានផ្តល់សេវាសុខភាព ការអប់រំ ដល់គ្រួសារ និងម្ចាស់សិប្បកម្មទប់ស្កាត់ការប្រើកម្លាំងកុមារ និងធ្វើសិក្ខាសាលា និងផ្សព្វផ្សាយច្បាប់ការងារ ជាពិសេសចំពោះម្ចាស់សិប្បកម្ម និងសហគមន៍៕

អត្ថបទ ៖ សំអឿន