ព័ត៌មានជាតិ

មន្ត្រីជាន់ខ្ពស់ការងារ អំពាវនាវកម្មករយកចិត្តទុកដាក់ថែទាំសុខភាព និងសុវត្ថិភាពផ្ទាល់ខ្លួន នាឱកាសចូលឆ្នាំថ្មី

បានផុស

១ year មុន

នៅ

ថ្ងៃព្រហស្បតិ៍ ១០ មេសា ២០២៥

ដោយ

លោក កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានអំពាវនាវដល់កម្មករ-និយោជិតដែលត្រូវធ្វើដំណើរទៅស្រុកកំណើតចូលរួមក្នុងពិធីបុណ្យចូលឆ្នាំថ្មីខាងមុខ ត្រូវយកចិត្តទុកដាក់ថែទាំសុខភាពឱ្យបានល្អ ពិសេសបើកបរត្រូវគោរពច្បាប់ចរាចរណ៍ ដើម្បីធានាបានសុខសុវត្ថិភាពទាំងទៅ និងត្រឡប់មកធ្វើការងារវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការអំពាវនាវនេះ ធ្វើឡើងដោយសារកម្មកររោងចក្រត្រូវបានអនុញ្ញាតឱ្យឈប់សម្រាកធ្វើដំណើរទៅស្រុកកំណើតដើម្បីចូលរួមបុណ្យចូលឆ្នាំខ្មែរ ប្រពៃណីជាតិ ដែលនឹងឈានចូលមកដល់នាថ្ងៃទី ១៤ , ១៥ និង ១៦ ខែមេសា ឆ្នាំ ២០២៥ ខាងមុខនេះ។

លោក កត្តា អ៊ន បានមានប្រសាសន៍នៅព្រឹកថ្ងៃទី ១០ មេសា នេះថា «នៅក្នុងឱកាសពិធីបុណ្យចូលឆ្នាំថ្មីខាងមុខនេះ ខ្ញុំសូមអំពាវនាវដល់កម្មករ-និយោជិត ត្រូវយកចិត្តទុកដាក់ថែទាំសុខភាពសុវត្ថិភាពផ្ទាល់ខ្លួននារដូវក្តៅ ក៏ដូចជាការធ្វើដំណើរតាមផ្លូវសាធារណៈផ្សេងៗ សូមបើកបរគោរពច្បាប់ចរាចរណ៍ ការយោគយល់គ្នា អត់ឱនឱ្យគ្នាទៅវិញទៅមក ដើម្បីបញ្ចៀសនូវគ្រោះថ្នាក់ណាមួយកើតឡើង»។

ជាមួយគ្នានេះដែរ លោកក៏បានណែនាំដល់កម្មករ-និយោជិតចូលរួមក្នុងពិធីបុណ្យចូលឆ្នាំថ្មី ចូលរួមលេងល្បែងប្រជាប្រិយខ្មែរ និងប្រពៃណីជាតិ ដើម្បីលើកតម្កើង ក៏ដូចជាថែរក្សាអត្តសញ្ញាណវប្បធម៌ជាតិឱ្យបានគង់វង្ស និងរីកចម្រើន ក្រោមម្លប់សន្តិភាព ក្រោមការដឹកនាំរបស់រាជរដ្ឋាភិបាល សម្តេចធិបតី ហ៊ុន ម៉ាណែត។

លោក កត្តា អ៊ន បានអំពាវនាវដល់កម្មរ-និយោជិត និងក្រុមគ្រួសារ ដែលនឹងត្រូវទៅស្រុកកំណើត ដើម្បីចូលរួមពិធីបុណ្យចូលឆ្នាំថ្មី ប្រពៃណីជាតិ ខាងមុខនេះ សូមលើកទឹកចិត្តធ្វើដំណើរដោយរថយន្តក្រុង ដោយសាលារាជធានីភ្នំពេញ បានត្រៀមរថយន្តក្រុងប្រមាណជិត ៦០០ គ្រឿង ដឹកពលរដ្ឋទៅស្រុកកំណើតពីរាជធានីភ្នំពេញទៅតាមបណ្តាខេត្តនានា។ ការជិះរថយន្តក្រុងជួយធានាសុខសុវត្ថិភាព និងផាសុកភាព និងមិនចំណាយថវិកាក្នុងការធ្វើដំណើរ។

គួរបញ្ជាក់ថា ក្នុងឱកាសពិធីបុណ្យចូលឆ្នាំថ្មី ប្រពៃណីជាតិ ខាងមុខនេះ ក្រសួងការងារ និងបណ្ដុះបណ្ដាលវិជ្ជាជីវៈ ប្រកាសឱ្យកម្មករ-និយោជិត ទាំងអស់ ទទួលបានការឈប់សម្រាកដោយមានប្រាក់ឈ្នួលរយៈពេល ៣ ថ្ងៃ គឺ ចាប់ពីថ្ងៃទី ១៤-១៥ និង ១៦ ខែមេសា ឆ្នាំ ២០២៥៕

អត្ថបទ ៖ សំអឿន