ព័ត៌មានជាតិ

លោកជំទាវ ម៉ែន សំអន ៖ ការបណ្តុះបណ្តាលចំណេះដឹងដល់មន្ត្រីអធិការកិច្ចគ្រប់រូបជាការបង្កើនប្រសិទ្ធភាពការងារ

បានផុស

៦ years មុន

នៅ

ថ្ងៃអង្គារ ៣ វិច្ឆិកា ២០២០

ដោយ

លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី បានថ្លែងថា ការបណ្តុះបណ្តាលបង្កើនចំណេះដឹងដល់មន្ត្រីអធិការកិច្ច គ្រប់រូបមានសារៈសំខាន់ សម្រាប់ត្រួតពិនិត្យ ការងារឲ្យកាន់តែមានប្រសិទ្ធភាព តម្លាភាព និងគណនេយ្យភាព តាមរយៈការធ្វើអធិការកិច្ចលើគ្រប់វិស័យ សំដៅបង្ការ ទប់ស្កាត់ កែលំអ និងមានវិធានការ ដើម្បីប្រឆាំងអំពើពុករលួយ ការរំលោភដោយអំណាច និងបាតុភាពអសកម្មនានា តាមរយៈជំនាញទូទៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកជំទាវកិត្តិសង្គហបណ្ឌិត ម៉ែន សំអន រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច ថ្លែងបែបនេះក្នុងកិច្ចប្រជុំបូកសរុបលទ្ធផលការងាររបស់ក្រសួងរយៈពេល ៩ខែ និងលើកទិសដៅអនុវត្តបន្ត នាព្រឹកថ្ងៃអង្គារ ៣រោច ខែកត្តិក ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី ០៣ ខែ វិច្ឆិកា ដឹកនាំកិច្ចប្រជុំ ស្តីពីវឌ្ឍនៈភាពរបស់ក្រសួងដែលបានអនុវត្តរយៈពេលកន្លងមក។

ក្នុងពិធីនោះក៏មានការអញ្ជើញចូលរួមពីសំណាក់លោកលោកស្រីរដ្ឋលេខាធិការ អនុរដ្ឋលេខាធិការ ប្រតិភូរាជរដ្ឋាភិបាល ទទួលបន្ទុកអគ្គនាយកដ្ឋានរដ្ឋបាល ប្រតិភូរាជរដ្ឋាភិបាល ទទួលបន្ទុកអគ្គនាយកដ្ឋានអធិការកិច្ច ប្រតិភូរាជរដ្ឋាភិបាល ទទួលបន្ទុកអគ្គនាយកដ្ឋានទំនាក់ទំនងជាមួយរដ្ឋសភា-ព្រឹទ្ធសភា និងលោកនាយកខុទ្ទកាល័យក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ចជាច្រើនរូប។

លោកជំទាវ បានថ្លែងនូវការកោតសរសើរដល់មន្ត្រីគ្រប់លំដាប់ថ្នាក់នៃក្រសួងទំនាក់ទំនងជាមួយរដ្ឋសភាព្រឹទ្ធសភា និងអធិការដែលកន្លងមកបានចូលរួមយ៉ាងសកម្មក្នុងភារកិច្ចការងារជំនាញរៀងៗខ្លួនរួមនឹងការទប់ស្កាត់ការឆ្លងរីករាលដាលនៃជំងឺរាតត្បាតកូវីដ១៩ តាមគោលការណ៍ណែនាំរបស់ក្រសួងសុខាភិបាលផងដែរ។ លោកជំទាវ ម៉ែន សំអន បានអបអរសាទរ ចំពោះសិក្ខាកាម ដែលបានបញ្ចប់វគ្គសិក្សាជំនាញជាបន្តបន្ទាប់ដោយជោគជ័យ។

លោកជំទាវកិត្តិសង្គហបណ្ឌិត ម៉ែន សំអន បានថ្លែងយ៉ាងច្បាស់ថា ធនធាននៃចំណេះដឹងរបស់មន្ត្រីអធិការកិច្ចគ្រប់ៗរូប គឺជាកាយវិការមួយដ៏មានសារៈសំខាន់ សម្រាប់ត្រួតពិនិត្យការងារឲ្យកាន់តែមានប្រសិទ្ធភាព តម្លាភាព និងគណនេយ្យភាព តាមរយៈការធ្វើអធិការកិច្ចលើគ្រប់វិស័យ សំដៅបង្ការ ទប់ស្កាត់ កែលំអ និងមានវិធានការ ដើម្បីប្រឆាំងអំពើពុករលួយ ការរំលោភដោយអំណាច និងបាតុភាពអសកម្មនានា តាមរយៈជំនាញផ្សេងៗនិងផ្នែកច្បាប់តែម្តង៕

អត្ថបទ៖ វិមាន

Related Topics:កិច្ចប្រជុំ