​ហាមពលរដ្ឋ​​រស់នៅអាស្រ័យដីនៅព្រលានយន្តហោះ​បែកចានលក់ដី​បន្ត ​ឬបញ្ចាំជាដាច់ខាត

គ្រួសារពលរដ្ឋដែលបានរស់នៅលើដីសាធារណះរបស់រដ្ឋ ក្នុងភូមិសាស្ត្រព្រលាន្តយន្តហោះវាលបែកចានក្នុងក្រុងបាត់ដំបង និង ស្រុកសង្កែ ចាប់ពីថ្ងៃនេះទៅហាមលក់បន្តទៅអ្នកផ្សេងឬបញ្ចាំជាដាច់ខាត។ ការថ្លែងបែបនេះខណះដែលលោក សយ សុខាន់ រដ្ឋលេខាធិការនៃរដ្ឋលេខាធិការដ្ឋានអាកាសចរស៊ីវិល និងជាប្រធានក្រុមការងារបច្ចេកទេសសិក្សាអំពីលទ្ធភាពស្តារនិងអភិវឌ្ឍអាកាសយានដ្ឋានបាត់ដំបងលំដាប់ថ្នាក់ 4C ក្នុងពិធីផ្សព្វផ្សាយអនុក្រឹត្យស្ដីពីការធ្វើចំណាត់ថ្នាក់ជាទ្រព្យសម្បត្តិសាធារណៈរបស់រដ្ឋដីដែលមានទីតាំងស្ថិតនៅក្នុងភូមិសាស្ត្រក្រុង បាត់ដំបង និងស្រុកសង្កែ ខេត្តបាត់ដំបង សម្រាប់​អភិវឌ្ឍអាកាសយានដា្ឋនបាត់ដំបង លំដាប់ថា្នក់ 4C កាលពីព្រឹកថ្ងៃទី២៥ ខែមីនាឆ្នាំ២០២៤ នៅរដ្ឋបាលសាលា​ខេត្តបាត់ដំបង។

រាជរដ្ឋាភិបាលបាន​យកចិត្តទុកដាក់ខ្ពស់ចំពោះបងប្អូនប្រជាពលរដ្ឋ ដែលបានកំពុងរស់នៅ​និង​មានផលប៉ះពាល់​លើ​ដី​សាធារណះរបស់រដ្ឋក្នុងភូមិសាស្ត្រព្រលានយន្តហោះវាលបែកចាន។ លោក សយ សុខាន់ លើកឡើង​គម្រោង​អភិវឌ្ឍ​ព្រលានយន្តហោះ​ខេត្ត​បាត់ដំបង​ ដើម្បីពង្រីកសេដ្ឋកិច្ចតាមរយះវិស័យទេសចរណ៍ ទាញកំណើនជនបរទេស និងការដឹកជញ្ជូនឲ្យកាន់តែមានប្រសិទ្ធិភាពនិងកំណើនខ្ពស់។

យ៉ាងណាមិញ លោកបាន​​បញ្ជាក់ជូនដល់​ពលរដ្ឋ​ជាង ១០០​ គ្រួសារ ដែលកំពុង​រស់នៅ​នៅក្នុងបរិវេណអាកាសយានដ្ឋានបាត់ដំបង​មិន​ឲ្យ​មានការ​លក់និងផ្ទេរសិទ្ធទៅអ្នកផ្សេងឬបញ្ចាំជាដាច់ខាត ព្រោះ​វាជាដី​សាធារណ:​របស់​រដ្ឋ។

ជាមួយគ្នានេះ លោក សយ សុខាន់ ក៏បានណែនដល់ក្រុមការងារជំនាញថ្នាក់ខេត្ត ធ្វើយ៉ាងណាពិនិត្យឲ្យបានត្រឹមត្រូវបំផុត ក្នុងការចុះធ្វើបច្ចុប្បន្នភាពជាក់ស្តែង ងាយស្រួលក្នុងការរកដំណោះស្រាយគោលនយោបាយជូនពលរដ្ឋ​ដែលកំពុងរស់នៅដែលរងផលប៉ះពាល់លើលំនៅដ្ឋានឲ្យ​បានសមរម្យផង ខណះពួកគាត់ខ្លះរស់នៅតាំងពីទសវត្សរ៍ចន្លោះឆ្នាំ​១៩៩៧-៩៩​​ មក​ម៉្លេះ។

កាលពីថ្ងៃទី១៩ ខែមីនា ឆ្នាំ២០២៤ មានបើកកិច្ចកិច្ចប្រជុំមួយរវាងគណៈកម្មការអន្តរក្រសួង អាជ្ញាធរខេត្តបាត់ដំបង ព្រមទាំងក្រុមការងារបច្ចេកទេស ដើម្បីពិនិត្យវាយតម្លៃនិងសិក្សាអំពីលទ្ធភាពស្ដារនិងអភិវឌ្ឍន៍ អាកាសយានដ្ឋានបាត់ដំបង ឲ្យក្លាយជាអាកាសយានដ្ឋានលំដាប់ថ្នាក់ ៤C។ កិច្ចប្រជុំនេះ បានផ្តោតសំខាន់ទៅផលប៉ះពាល់និងរកដំណោះស្រាយនានាដល់ប្រជាពលរដ្ឋដែលកំពុងរស់នៅអាស្រ័យផលក្នុងបរិវេណអាកាសយានដ្ឋានបាត់ដំបង និងលើដីដែលត្រូវពង្រីកបន្ថែម។

អាកាសយានដ្ឋានខេត្តបាត់ដំបង បានបើកដំណើរការនៅក្នុងឆ្នាំ១៩៦៨ មានទីតាំងស្ថិតនៅក្រុមទី១ ភូមិរំចេក៤ សង្កាត់រតនៈ ក្រុងបាត់ដំបង (មួយផ្នែកធំនៃអាកាសយានដ្ឋានស្ថិតនៅក្នុងក្រុង និងមួយផ្នែកទៀត ស្ថិតនៅក្នុងស្រុកសង្កែ ខេត្តបាត់ដំបង មានចម្ងាយ ៣ គ.ម.ពីក្រុងបាត់ដំបង និង ២៤៦ គ.ម.ពីរាជធានីភ្នំពេញ។

អាកាសយានដ្ឋានលំដាប់ថ្នាក់ 3C នេះ មានផ្លូវសម្រាប់យន្តហោះឡើងចុះទំហំ ១.៦០០ម x ៣៤ម និង ផ្លូវរត់ (Runway strips) ទំហំ ១.៧២០ ម x ១៥០ម ព្រមទាំងហេដ្ឋារចនាសម្ព័ន្ធចាំបាច់មួយចំនួនទៀតមានរបង​សាង​សង់​ពី​ឥដ្ឋនិងបេតុងប្រវែង ១.៨៨៧ ម៉ែត្រ លើរបងទាំងអស់ប្រវែង ៥.៣០០ម៉ែត្រ។

ផ្ទៃដីអាកាសយានដ្ឋានបាត់ដំបងមានទំហំ ១២៨,៦៨ ហិតតា បានចុះបញ្ជីសារពើភ័ណ្ឌស្ថិតក្រោមការគ្រប់គ្រង់របស់រដ្ឋលេខាធិការអាកាសចរស៊ីវិលរួលរាល់ ហើយអាកាសយានដ្ឋានបាត់ដំបងត្រូវការផ្ទៃដីមួយចំនួនទៀត ដើម្បីពង្រីកបន្ថែមដើម្បីត្រៀមរៀបចំខ្លួនឱ្យក្លាយជាអាកាសយានដ្ឋានលំដាប់ថ្នាក់ 4C ដែលឈានទៅពង្រីកវិសាលភាពដល់សេវាកម្មនានា ពាក់ព័ន្ធនឹងវិស័យអាកាសចរ ដែលអនុញ្ញាតឱ្យយន្តហោះធំជាងមុនចុះចតលើទឹកដីខេត្តបាត់ដំបងបានដោយរលួន។

បច្ចុប្បន្ន អាកាសយានដ្ឋានមិនមានដំណើរការហោះហើរនោះទេ។ គិតត្រឹមថ្ងៃទី១៨ខែមីនាឆ្នាំ២០២៤ មានបងប្អូនប្រជាពលរដ្ឋកំពុងរស់នៅក្នុងបរិវេណអាកាសយានដ្ឋានបាត់ដំបងចំនួន ១៨១គ្រួសារ៕

បន្តអាន៖ មក​ស្គាល់​ប្រវត្តិ​ព្រលាន​យន្តហោះ​បាត់ដំបង ធំជាង​ភ្នំពេញ ៣​ ដង

អត្ថបទ៖ សៅ សារិទ្ធ