កម្ពុជារកឃើញសត្វជាង ៧០០ ប្រភេទខុសគ្នានៅក្នុងតំបន់ព្រៃកោងកាង

ការស្រាវជ្រាវថ្មីមួយបានរកឃើញវត្តមានសត្វជាង ៧០០ ​ប្រភេទខុសគ្នា នៅក្នុងតំបន់ព្រៃកោងកាង​នៃ​ប្រទេស​កម្ពុជាហើយ​តាមរយៈការរកឃើញនេះរំពឹងថា នឹងអាចរកឃើញប្រភេទសត្វថ្មីៗបន្ថែមទៀតក្នុងការសិក្សាស្រាវជ្រាវនាពេលអនាគត។

ការស្រាវជ្រាវរកឃើញសត្វជាង ៧០០ ប្រភេទដោយអង្គការសត្វព្រៃ និងរុក្ខជាតិកម្ពុជា និងសហគ្រាសហ្វីស៊ីងខេត អេកូឡូជីខល អេនធើប្រាយ សហការជាមួយក្រសួងបរិស្ថានបានចងក្រងនូវរបាយការណ៍សិក្សាស្រាវជ្រាវជាលើកដំបូងស្តីពីជីវចម្រុះនៅតំបន់ព្រៃកោងកាងនៃប្រទេសកម្ពុជា។

បើតាមរបាយការណ៍របស់អង្គការសត្វព្រៃនិងរុក្ខជាតិកម្ពុជាបានឱ្យដឹងថា ប្រភេទសត្វជាច្រើនប្រភេទដែលបានរកឃើញដូចជាសត្វស្វាកន្ទុយវែងជាប្រភេទជិតផុតពូជ សំពោចធំ សត្វភេរោមច្រមុះ (ភេខ្មៅ) និងខ្លាត្រីជាប្រភេទងាយរងគ្រោះ។ 

ការសិក្សាស្រាវជ្រាវនេះបានធ្វើឡើងនៅក្នុងដែនជម្រកសត្វព្រៃពាមក្រសោប (២៣,៧៥០ ហិចតា) និងតំបន់រ៉ាមសារកោះកាពិ (១២,០០០ ហិចតា)។ 

អង្គការខាងលើបានបញ្ជាក់ថា ការរកឃើញនេះផ្តល់ជាចំណេះដឹងមូលដ្ឋានអំពីជីវចម្រុះក្នុងតំបន់នោះ ហើយរំពឹងថានឹងអាចរកឃើញប្រភេទសត្វថ្មីៗបន្ថែមទៀតក្នុងការសិក្សាស្រាវជ្រាវនាពេលអនាគត៕

អត្ថបទ៖ សំអឿន