ក្រសួងបរិស្ថាន ផ្តួចផ្តើមឱ្យមានរៀបចំពិធីបុណ្យកោងកាង នៅខេត្តកោះកុង សំដៅថែរក្សាប្រព័ន្ធអេកូឡូស៊ីឆ្នេរ និងជីវៈចម្រុះ

លោក សុផល្លែត រដ្ឋមន្រ្តីក្រសួងបរិស្ថាន បាន​ផ្ដួចផ្ដើម​ឱ្យ​មាន​ការ​រៀបចំ​ពិធី​បុណ្យ​កោងកាង ដែល​គ្រោង​នឹង​ប្រព្រឹត្ត​ទៅ​នៅ​ចុង​ខែ​កុម្ភៈ ឆ្នាំ២០២៥ នៅ​ខេត្ត​កោះកុង ដែល​ជាផ្នែកមួយនៃយុទ្ធនាការ «ពន្លកបៃតង» ក្នុង​គោល​បំណង ថែរក្សាប្រព័ន្ធអេកូឡូស៊ីឆ្នេរ និង​ជីវៈចម្រុះ តាមរយៈ​ការដាំ​ស្តារព្រៃកោងកាង និងការ​ពង្រីក​វិសាលភាព​បៃតង​ឈានឆ្ពោះ​ទៅជា​ប្រទេស​អព្យាក្រឹត​កាបូន​នៅ​ឆ្នាំ២០៥០។

លោក​​ អ៊ាង សុផល្លែត បានថ្លែងថា ក្រសួងបរិស្ថា​ន​ផ្តល់ការគាំទ្រ​យ៉ាងពេញទំហឹង​លើសកម្មភាព​ទាំង​នេះ ជា​ពិសេស​ដំបូង​ត្រូវអប់រំ និង​ពន្យល់ណែនាំ​ដល់​ប្រជាសហគមន៍ទាំងអស់ ឱ្យយល់អំពី​សារៈសំខាន់​នៃការរួម​ចំណែកក្នុង យុទ្ធនាការពន្លកបៃតង តាមរយៈការចូលរួមក្នុងការអភិរក្សធនធានធម្មជាតិ និងដាំដុះកូន​កោងកាង​ដ៏មានតម្លៃនេះ។ លោកថា ក្រសួង នឹង​ផ្តល់ឱ្យពួកគាត់​នូវភាពជាម្ចាស់ ក្លាយជាសហគ្រិនភាព អាចបន្ត​គ្រប់គ្រង​សហគមន៍​ដោយនិរន្តភាព និងជាប្រយោជន៍សម្រាប់មនុស្សជាតិ និងអ្នកជំនាន់ក្រោយរបស់កម្ពុជា។

ស្របនឹង​ការ​លើក​ឡើង​របស់​លោក​រដ្ឋមន្រ្តី លោក ម៉េង ហេង ប្រធានអង្គការមេត្តាធម្មជាតិ និងក្រុមការងារ បាន​ប្តេជ្ញាចិត្តខ្ពស់​ក្នុងការរួមចំណែកជាមួយយុទ្ធនាការ «ពន្លកបៃតង» របស់ក្រសួងបរិស្ថាន នឹងបន្តការដាំដុះ​កូន​កោងកាងជា​មួយប្រជា​សហគមន៍​ក្នុងដែនសមុទ្រឱ្យបានកាន់តែច្រើន ស្របតា​មយុទ្ធសាស្រ្តចក្រាវិស័យ​បរិស្ថាន​ដែលបានដាក់ចេញ គឺ​ការបណ្តុះកូនឈើ ចែកកូនឈើ និងដាំកូនឈើច្រើនជាង ១ លានដើមក្នុង ១ ឆ្នាំ ដែល​កូន​កោងកាង​ទាំងនេះ គឺជា​ចំណែក​ក្នុងការផ្តល់ជម្រកដល់សត្វមានជីវិតនៅក្នុងទឹកដូចជា ត្រី ក្តាម និង​បង្គារជាដើម។

ជាមួយគ្នានេះ ធនធានត្រី ក្តាម បង្គារ នឹងក្លាយ​ជាចំណែក​នៃប្រាក់​ចំណូល​របស់​ប្រជាសហគមន៍​ក្នុងដែន​សមុទ្រផង និងឱ្យពួកគាត់មានត្រី សាច់សម្រាប់បរិភោគផង លើសពីនេះ ក៏អាច​ធ្វើជាម្ហូប​អារហារ​លក់ជូនភ្ញៀវទេសចរណ៍ជាតិ និងអន្តរជាតិផង ខណៈពួកគេទៅលេងកម្សាន្តនៅតាមតំបន់ទាំងនោះ។

សូមជម្រាបជូនថា ព្រៃកោង​កាងមិនត្រឹមតែជាជម្រកដ៏សំខាន់សម្រាប់ជីវៈចម្រុះប៉ុណ្ណោះទេ ប៉ុន្តែក៏ជា​ខែល​ការពារ​ធម្មជាតិដ៏​រឹងមាំ ពីគ្រោះ​មហន្តរាយធម្មជាតិ និងការប្រែប្រួលអាកាសធាតុផងដែរ។ ដូច្នេះ ការដាំស្តារព្រៃកោងកាងឡើងវិញ គឺជាការវិនិយោគដ៏សំខាន់សម្រាប់អនាគត និងជាការចូលរួមចំណែកក្នុង​ការសម្រេច​បាន​នូវគោលដៅអភិវឌ្ឍន៍ប្រកបដោយចីរភាពរបស់ប្រទេសកម្ពុជា៕