ព័ត៌មានជាតិ

ស្នងការខេត្តកោះកុង អះអាងថា គ្រាប់មិនទាន់ផ្ទុះ ១ គ្រាប់ ដែលពលរដ្ឋឃើញ មិនបង្កគ្រោះថ្នាក់ទេ

បានផុស

១១ ខែ មុន

នៅ

ថ្ងៃអង្គារ ២៣ មេសា ២០២៤

ដោយ

លោកស្នងការនគរបាលខេត្តកោះកុង អះអាងនៅថ្ងៃទី ២៣ ខែមេសា ឆ្នាំ ២០២៤ នេះថា គ្រាប់មិនទាន់ផ្ទុះ ១ គ្រាប់ ដែលប្រជាពលរដ្ឋប្រទះឃើញនៅចិញ្ចើមផ្លូវមួយកន្លែង ក្នុងសង្កាត់ស្មាច់មានជ័យ មិនអាចបង្កគ្រោះថ្នាក់ទេ ដោយបានយកទៅរក្សាទុកនៅអធិការដ្ឋានក្រុងខេមរភូមិន្ទ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមការបញ្ជាក់របស់ លោកឧត្ដមសេនីយ៍ទោ គង់ មនោ ស្នងការនគរបាលខេត្តកោះកុង យុទ្ធភណ្ឌមិនទាន់ផ្ទុះ ១ គ្រាប់ ដែលប្រជាពលរដ្ឋឃើញនៅចិញ្ចើមផ្លូវលេខ ៩៩៩ ភូមិ ២ សង្កាត់ស្មាច់មានជ័យ ជាប្រភេទគ្រាប់ប្លោងក្នុងសម័យសង្គ្រាម ប៉ុន្តែមិនបានហួសសុពលភាពប្រើប្រាស់ទេ ហើយមានដុះច្រែះហ៊ុមព័ទ្ធ គ្មានក្បាល និងកន្ទុយគ្រាប់ឡើយ គឺមានតែដងខ្លួន។

លោកស្នងការនគរបាលខេត្តកោះកុង ពន្យល់ទៀតថា គ្រាប់ប្លោងនេះអាចថាអ្នកនេសាទណាម្នាក់អូសត្រី មឹក ក្នុងទឹកសមុទ្រ តែបែរជាបានជាប់មកជាមួយ និងយកវាឡើងលើគោក។ វាមិនបង្កឲ្យគ្រោះថ្នាក់អ្វីឡើយ ប៉ុន្តែបញ្ចៀសការភ័យខ្លាចព្រួយបារម្ភពីសុវត្ថិភាពដល់ពលរដ្ឋ ក៏ដូចជាអ្នកដំណើរ លោកបានចាត់ឲ្យកម្លាំងនគរបាលក្រុងខេមរភូមិន្ទ យកចេញទៅរក្សាទុកនៅអធិការជាបណ្ដោះអាសន្នសិន រង់ចាំអង្គការ Halotrust មកទទួលកម្ទេចចោលបន្ត។

គួរជម្រាបថា ប្រភេទគ្រាប់សម្រាប់បាញ់ប្លោង ១ គ្រាប់ ត្រូវបានប្រជាពលរដ្ឋប្រទះឃើញនៅចិញ្ចើមផ្លូវលេខ ៩៩៩ ជាច្រើនថ្ងៃមកហើយ តែមិនទាន់មានអាជ្ញាធរសមត្ថកិច្ចណាមកដកយកចេញទេ ពោលគឺគ្រាន់តែដាក់ខ្សែហ៊ុមព័ទ្ធជុំវិញវាប៉ុណ្ណោះ ទើបរាយការណ៍មកក្រុមអ្នកសារព័ត៌មានឲ្យជួយចុះផ្សាយ និងអន្តរាគមន៍៕

អត្ថបទ ៖ សិរីវឌ្ឍនៈ