លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត អញ្ជើញបំពេញទស្សនកិច្ចនៅមន្ទីរពេទ្យកូរ៉េខាងត្បូង

នៅក្នុងដំណើរបំពេញទស្សនកិច្ចទៅកាន់សាធារណរដ្ឋកូរ៉េ នៅថ្ងៃទី១៧ ឧសភានេះ លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត បានអញ្ជើញទស្សនកិច្ចមន្ទីរពេទ្យ Soon chun hyang ក្នុងរដ្ឋធានីសេអ៊ូល ដើម្បីសិក្សាស្វែងយល់ពីប្រតិបត្តិការនៅម​ន្ទីរពេទ្យ ការបំពាក់សម្ភារ និងបច្ចេកវិទ្យាទំនើបៗ។

គួររំឭកថា មន្ទីរពេទ្យ Soon chun hyang ធ្លាប់បាន​ប្រគល់​​ម៉ាស​ការពារ​ជំងឺ​ប្រមាណ ១០​ម៉ឺន​សន្លឹក (​ប្រភេទ KD94 និង KF-AD) ឧបករណ៍​វាស់​កំដៅ​ចំនួន ៤៨​គ្រឿង និង​បន្ទះ​ប្លា​ស្ទិ​កបិទ​ការពារ​មេរោគ (Anti-Virus Film) ចំនួន ២០​ប្រអប់ ជូនប្រទេសកម្ពុជា ក្នុង​យុទ្ធនា​ការ​ទប់ស្កាត់​ការឆ្លង​ជំងឺ​កូ​វីដ​-១៩ កាលពីអំឡុងខែ មករា ឆ្នាំ ២០២១។

ដើមឡើយមន្ទីរពេទ្យ Soon chun hyang គឺជាសាកលវិទ្យាល័យ Soonchunhyang មានសក្តានុពលផ្នែកវេជ្ជសាស្ត្រ សាកលវិទ្យាល័យនេះ  បានជាប់ចំណាត់ថ្នាក់ទី ៩ ក្នុងចំណោមសាកលវិទ្យាល័យនៅប្រទេសកូរ៉េខាងត្បូង នៅក្នុងប្រភេទជា គ្លីនិកបុរេគ្លីនិក និងសុខភាព ដោយ Times Higher Education World University Rankings ក្នុងឆ្នាំ ២០២៣ ។ SCH បានទទួល ពានរង្វាន់ថ្នាក់ជាតិសម្រាប់ឧត្តមភាពកំណែទម្រង់អប់រំ ពីក្រសួងអប់រំ វិទ្យាសាស្ត្រ និងបច្ចេកវិទ្យាកូរ៉េ ក្នុងឆ្នាំ ២០០៨, ២០០៩, និង ២០១០ ។

សាកលវិទ្យាល័យ Soon chun hyang បានធ្វើកិច្ចសហប្រតិបត្តិការលើវិស័យសុខភាពសាធារណៈជាមួយ និងព្រះរាជាណាចក្រកម្ពុជា តាមរយៈការជួយបណ្តុះបណ្តាលគ្រូពេទ្យឯកទេស និងជួយពិនិត្យព្យាបាលជូនដល់អ្នកជំងឺកម្ពុជា ។

លោកជំទាវបណ្ឌិត ពេជ ចន្ទមុន្នី គឺជាអនុប្រធានក្រុមប្រឹក្សាភិបាលសមាគមគ្រូពេទ្យស្ម័គ្រចិត្តយុវជន
សម្តេច​តេជោ (TYDA) តែងតែបានដឹកនាំក្រុមគ្រូពេទ្យស្ម័គ្រចិត្តចុះពិនិត្យ និងព្យាបាលជំងឺជូនប្រជាពលរដ្ឋ ក្នុងសហគមក្រីក្រនៅទូទាំងប្រទេសដោយឥតគិតថ្លៃ៕

អត្ថបទ៖ ឡាយ សាមាន