លោកជំទាវ ចម និម្មល អញ្ជើញក្នុងពិធីបិទយុទ្ធនា​ការឃោសនាបោះឆ្នោតក្រុមប្រឹក្សារាជធានី ខេត្តអាណត្តិទី៤

នៅថ្ងៃទី២៤ ខែឧសភា ឆ្នាំ២០២៤នេះ នៅទីស្នាក់ការគណបក្សប្រជាជនកម្ពុជាខេត្តកែប បានរៀបចំពិធីបិទយុទ្ធនាការឃោសនាបោះឆ្នោត ជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ ក្រោមអធិបតីភាពលោកជំទាវ ចម និម្មល សមាជិកគណៈកម្មាធិការកណ្តាល និងជាប្រធានក្រុមការងារគណបក្សចុះមូលដ្ឋានខេត្តកែប ព្រមទាំងមានការអញ្ជើញចូលរួមពី លោក កែន សត្ថា សមាជិកគណៈកម្មាធិការកណ្តាល និងជាអនុប្រធានទី១ ក្រុមការងារគណបក្សចុះមូលដ្ឋានខេត្តកែប លោក សំ សារីន សមាជិកគណៈកម្មាធិការកណ្តាល និងជាប្រធានគណៈកម្មាធិការគណបក្សខេត្តកែប លោក សោម ពិសិដ្ឋ សមាជិកគណៈកម្មាធិការកណ្តាល និងជាអនុប្រធានគណ:កម្មាធិការគណបក្សខេត្ត និង លោកជំទាវ សមាជិកអចិន្ត្រៃយ៍គណបក្សខេត្ត សមជិកគណកម្មាធិការគណបក្សខេត្ត ប្រធាន អនុប្រធានក្រុមការងារចុះជួយក្រុង ស្រុក ឃុំសង្កាត់ ភូមិ និងអង្គបោះឆ្នោតជ្រើសរើសក្រុមប្រឹក្សាខេត្ត ក្រុង ស្រុក ផងដែរ។

បន្ទាប់ពីបានស្ដាប់របាយការណ៍ដែលអានដោយលោក សំ សារីន រួចមក មានមតិថ្លែងប្រកាសបិទយុទ្ធនាការឃោសនាបោះឆ្នោតនាឱកាសពេលនោះ លោកជំទាវ ចម និម្មល បានកោតសរសើរ និងវាយតម្លៃខ្ពស់ជូនចំពោះសកម្មជន អ្នកគាំទ្រគណបក្សប្រជាជនកម្ពុជាទាំងអស់ ប្រជាពលរដ្ឋ កងកម្លាំងប្រដាប់អាវុធគ្រប់ប្រភេទ និងមន្ត្រី គ.ជ.ប ដែលបានសហការរួមគ្នាគោរពច្បាប់បោះឆ្នោត និងនីតិវិធីបោះឆ្នោតយ៉ាងពេញលេញប្រកបដោយកិត្តិយស និងសេចក្តីថ្លៃថ្នូរ ធានាបាននូវសន្តិសុខ សណ្តាប់ធ្នាប់ របៀបរៀបរយ ធ្វើឱ្យដំណើរការឃោសនាបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី៤ ឆ្នាំ២០២៤ ប្រព្រឹត្តបានយ៉ាងរលូន។

ជាមួយគ្នានេះ លោកជំទាវ បានអំពាវនាវដល់ក្រុមប្រឹក្សាឃុំ-សង្កាត់ទូទាំងខេត្ត ដែលជាអង្គបោះឆ្នោតសូមថែរក្សាសុខភាពអោយបានល្អ និងគាំទ្រគោលនយោបាយរបស់គណបក្សប្រជាជនកម្ពុជា ដោយអញ្ជើញទៅបោះឆ្នោតអោយបានគ្រប់ៗគ្នា និងបោះឆ្នោតជូនគណបក្សប្រជាជនកម្ពុជា ដែលមានរូបទេវតាបាចផ្កាជាសញ្ញាសម្គាល់នៅថ្ងៃអាទិត្យទី២៦ ខែឧសភា ឆ្នាំ២០២៤ ដើម្បីបន្តថែរក្សាសន្តិភាព និងអភិវឌ្ឍន៍ប្រទេសជាតិ៕

អត្ថបទ៖ សឹង រ៉ាត់