រដ្ឋបាលខេត្តតាកែវ ដឹកនាំមន្ត្រីទស្សនកិច្ចនៅតំបន់អភិវឌ្ឍន៍តាមព្រំដែនខេត្តស្ទឹងត្រែង

ស្របតាមការសម្រេចរបស់រាជរដ្ឋាភិបាលកម្ពុជា ថ្នាក់ដឹកនាំ និងមន្ត្រីរាជការរដ្ឋបាលខេត្តតាកែវ ដឹកនាំដោយលោក វ៉ី សំណាង អភិបាលនៃគណៈអភិបាលខេត្ត បានធ្វើដំណើរទស្សនកិច្ចទៅកាន់តំបន់អភិវឌ្ឍន៍កម្ពុជា-ឡាវ ក្នុងភូមិសាស្ត្រខេត្តស្ទឹងត្រែង រយៈពេលពីរថ្ងៃ ចាប់ពីថ្ងៃទី២៧ ដល់ថ្ងៃទី២៨ ខែកញ្ញា ឆ្នាំ២០២៤ ក្នុងតំបន់ភូមិភាគឦសាន។

ក្នុងដំណើរទស្សនកិច្ចនេះ គណៈប្រតិភូខេត្តតាកែវ ដឹកនាំដោយលោកអភិបាលខេត្ត ក្រោមកិច្ចសហការរបស់រដ្ឋបាលខេត្តស្ទឹងត្រែង បានអញ្ជើទៅទស្សនកិច្ចតំបន់ព្រំដែនកម្ពុជា-ឡាវ និងបានចុះពិនិត្យដោយផ្ទាល់នូវបង្គោលព្រំដែន​លេខ០៣៤ និងបង្គោលធំ១ បង្គោលទៀត ដែលបានបន្សល់ទុកតាំងពីសម័យបារាំងផងដែរ។

ឆ្លៀតក្នុងឱកាសនោះផងដែរលោក​ វ៉ី សំណាង ក៏បានចុះពិនិត្យ និងស្វែងយល់បន្ថែមនៅស្តូបព្រះបរមរូប របស់ព្រះករុណាព្រះបរមរតនកោដ្ឋ និងសំណេះដំណាល សួរសុខទុក្ខប្រជាពលរដ្ឋដែលប្រករបរលក់ដូរនៅក្បែរទីតាំងនោះ ដែលស្ថិតក្នុងឃុំ អូស្វាយសែនជ័យ ស្រុកអូស្វាយសែនជ័យ ខេត្តស្ទឹងត្រែង។

សូមបញ្ជាក់ថា ចំពោះដំណើរទស្សនកិច្ចទៅកាន់តំបន់អភិវឌ្ឍន៍នៅភូមិភាគឦសានក្នុងខេត្តស្ទឹងត្រែងនាពេលនេះ គឺដើម្បីឱ្យថ្នាក់ដឹកនាំ និងមន្ត្រីរាជការខេត្តតាកែវ បានសិក្សារស្វែងយល់ជាក់ស្តែង និងកាន់តែច្បាស់ថែមទៀតពីស្ថានភាព និងទីតាំងភូមិសាស្រ្តនៅតាមព្រំដែន។

ឆ្លៀតក្នុងឱកាសនោះ ថ្នាក់ដឹកនាំខេត្ត និងមន្ត្រីរាជការចំណុះឲ្យរដ្ឋបាលខេត្តទាំងមូល បានបង្ហាញនូវការគាំទ្រយ៉ាងខ្លាំងចំពោះការអភិវឌ្ឍន៍ តាមបណ្តោយព្រំដែន រវាងកម្ពុជា និងឡាវ និងតាមបណ្តាព្រំដែននៃខេត្តផ្សេងទៀត ឱ្យកាន់តែមានភាពរីកចម្រើនទៅមុខបន្តទៀត៕​

អត្ថបទ៖ វីរ: