ទីតាំងផ្គត់ផ្គង់ទឹកស្អាតនៅឃុំកន្ទួត ពលរដ្ឋ​ចោទ​ធ្វើឲ្យទំនប់​ស្វាយជ្រុំខ្វះទឹកធ្វើកសិកម្ម

ពលរដ្ឋនៅឃុំថ្មី ស្រុកចិត្របុរី ខេត្តក្រចេះ បានលើកឡើងថា ទីតាំងផ្គត់ផ្គង់ទឹកស្អាតមួយកន្លែង នៅឃុំកន្ទួត កំពុងបំផ្លាញសន្តិសុខទឹកនៅទំនប់​ស្វាយជ្រុំ។

ពាក់ព័ន្ធជុំវិញការលើកឡើងរបស់ពលរដ្ឋនេះ លោក ហេង រតន៍ម៉ូនីដា ប្រធានមន្ទីរធនធានទឹក និងឧតុនិយមខេត្តក្រចេះ បានឲ្យដឹងថា ទំនប់​នេះ​ធ្វើឡើងដើម្បីផលប្រយោជន៍រួម។ ទី១-ធ្វើដើម្បីយកទឹកធ្វើស្រែ ទី២- យកទឹក​ផឹក និង​ទី៣- ដើម្បីលំនឹងបរិស្ថាន ជីវចម្រុះ។

ទំនប់នេះពីមុនតម្រូវការប្រើប្រាស់តិច ប៉ុន្តែឥឡូវតម្រូវការប្រើប្រាស់ច្រើន ខណៈ​ទីតាំងនៅស្រុកចិត្របុរីគ្មានប្រភពទឹកណាដែលអាចយកមកធ្វើទឹកស្អាតបាន​នោះ​ទេ។

លោក ហេង រតន៍ម៉ូនីដា បាន​បញ្ជាក់​ថា ការងារទឹកស្អាត រាជរដ្ឋាភិបាលបានជម្រុញឲ្យគ្រប់ស្រុកទាំងអស់ត្រូវមានទឹកស្អាត ដែលគ្រប់គ្រងដោយមន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ខេត្ត។

«ពាក់ពន្ធ័នឹងក្រុមហ៊ុនផ្គត់ផ្គង់ទឹកស្អាត គេធ្វើមានច្បាប់ត្រឹមត្រូវ ម្ចាស់ឈ្មោះ ច្រឹក បូ ជាម្ចាស់អាជីវកម្ម។ ហើយរដ្ឋក៏ជម្រុញឲ្យគាត់ធ្វើដើម្បីបម្រើដល់ប្រជាជនដែលរស់នៅក្នុងតំបន់នោះ។ សូម្បីតែខ្ញុំនៅកោះសុក្រមក៏ប្រើទឹកស្អាតនឹងដែរ»។

កន្លងមកលោកបានដាក់បទបញ្ជាណែនាំ​ឲ្យ​ពលរដ្ឋ​ធ្វើស្រែតែមួយលើកទេ ពីព្រោះទឹកអត់គ្រប់​តម្រូវការ​ ព្រោះកាលធ្វើទំនប់​​កាលពីជាង ២០ ឆ្នាំមុនមន្ទីរមានលុយតិច អីចឹង​មន្ទីរធ្វើទៅតាមលទ្ធភាពដែល​មាន។ ដល់ពេលឥឡូវតម្រូវការប្រើប្រាស់ច្រើន មន្ទីរក៏បានលើកគម្រោងនេះម្តងទៀត ដើម្បីខ្ចីលុយធនាគាពិភពលោក យកមកអភិវឌ្ឍន៍បន្ថែម​។

លោកបន្ត​ថា មន្ទីរបាន​សិក្សាបឋមរួចហើយ នៅសិក្សាលំអិតបន្ថែម​ដើម្បីបើកលទ្ធកម្មដេញថ្លៃ។

ជាមួយ​គ្នានេះ កាលពីម្សិលម៉ិញ លោកបានបញ្ជាឲ្យបើកទឹកបង្ហូរមកភូមិសេរីភាព ស្ថិត​នៅ​ក្នុងឃុំដារ ដែលជាឆ្លើយតបទៅតាមតម្រូវការរបស់ប្រជាកសិករផងដែរ។ លោកបានស្នើ​អង្វរប្រជាកសិករទាំងអស់ សូមមេត្តាគិតរឿងទឹកផឹកជាមុនសិន ប៉ុន្តែដំណាំរួមផ្សំអាចដាំបានមិនអីទេ តែការធ្វើស្រែត្រូវការប្រើប្រាស់ទឹកច្រើន ១ម៉ឺនម៉ែត្រគូប ក្នុង១ហិចតា។

លោក បញ្ជាក់ថា កាលណាពលរដ្ឋមើលឃើញតែ១ជ្រុង ច្បាស់ណាស់ គឺឃើញថា ការបិទទំនប់ គឺដើម្បីបម្រើឲ្យអ្នករកស៊ី។ ប៉ុន្តែសរុបសេចក្តីមក លោកសំណូមពរឲ្យប្រជាកសិករធ្វើស្រែតែមួយលើកបានហើយនៅតំបន់នោះ ព្រោះទឹកអត់គ្រប់គ្រាន់។ លោកបានបញ្ជាក់បន្ថែមថា រដូវនេះជារដូវប្រាំង ក្តៅ ស្ងួត យើងគួររក្សាទឹកទុកប្រើប្រាស់ រួមទូទាំងស្រុក ប្រសើរ​ជាងយកទឹកធ្វើស្រែមួយនៅកន្លែង៕

អត្ថបទ៖ ប្រុញ វិធិ