បើកដំណើរការឡើងវិញ ទីតាំង ៥ កន្លែងនៅកំពង់ស្ពឺ ជាប់ពាក់ព័ន្ធអន្ទិតកក្កដា

អាជ្ញាធរខេត្តកំពង់ស្ពឺ បានអនុញ្ញាតឲ្យទីតាំងអាជីវកម្មចំនួន៥កន្លែងដែលបានបិទពាក់ព័ន្ធជាមួយនារីម្នាក់ដែលបានប៉ះផ្ទាល់ជាមួយបុគ្គលឈ្មោះ កក្កដា សោភ័ណ្ឌ ដែលមានវិជ្ជមានកូវីដ-១៩នោះបើកដំណើរការឡើងវិញ។

ទីតាំងចំនួន៥កន្លែងដែលបើកដំណើរការអាជីវកម្មឡើងវិញ រួមមានផ្សារបាត់ដឹង ស្ថិតនៅក្នុង ស្រុកឧដុង្គ ខេត្តកំពង់ស្ពឺហាង ណូណាស៊ីហ្វូតលក់គ្រឿងសមុទ្រ ចំណុចភូមិពាណិជ្ជកម្ម សង្កាត់រកាធំ ក្រុងច្បារមន ផ្សាររាត្រី មាត់ស្ទឹងព្រែកត្នោត ភូមិទូលគក សង្កាត់ស្វាយក្រវ៉ាន់ ក្រុងច្បារមន ហាងកកាហ្វេ អាម៉ាហ្សូន នៅក្នុងស្ថានីយ៍ប្រេងឥន្ធនៈPTT ស្ថិតនៅក្នុងសង្កាត់រកាធំ ក្រុងច្បារមននិងហាងម៉ែប៉ុកឬស្សី ស្ថិតនៅក្នុងភូមិបិល ឃុំស្គុះ ស្រុកសំរោងទង។

យ៉ាងណាក៏ដោយរដ្ឋបាលខេត្តបានណែនាំឲ្យម្ចាស់អាជីវកម្មទាំងអស់ ត្រូវអនុវត្តឱ្យបានខ្ជាប់ខ្ជួននិងម៉ឺងម៉ាត់បំផុត ដោយអនុវត្តតាមវិធានការរបស់ក្រសួងសុខាភិបាល និងបង្កើនការប្រុងប្រយ័ត្នឱ្យបានខ្ពស់ជានិច្ច ដើម្បីចូលរួមទប់ស្កាត់ការឆ្លង រាលដាលនៃជំងឺកូវីដ-១៩ នេះ ទៅក្នុងសហគមន៍៕

អត្ថបទ៖សំអឿន