ព័ត៌មានជាតិ

DeepSeek ជំរុញទំនុកចិត្តវិនិយោគលើផ្សារភាគហ៊ុនចិន

បានផុស

១ year មុន

នៅ

ថ្ងៃចន្ទ ២៤ កុម្ភៈ ២០២៥

ដោយ

ការដាក់ឱ្យប្រើប្រាស់នៃបញ្ញាសិប្បនិម្មិត (AI) ចុងក្រោយរបស់ក្រុមហ៊ុន AI ចិន DeepSeek កំពុងជួយជំរុញលើការវិនិយោគលើទីផ្សារភាគហ៊ុនរបស់ចិនទាំងក្នុង និងក្រៅប្រទេស ដោយកើនឡើងប្រមាណ ២៦ ភាគរយ រាប់តាំងពីខែមករា។ នេះបើតាមការចុះផ្សាយរបស់បណ្ដាញព័ត៌មាន CNBC។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ផ្សារភាគហ៊ុនរបស់ចិនកើនឡើង ចំពេលដែលភាគហ៊ុនឥណ្ឌាធ្លាក់ចុះ ដោយអ្នកជំនាញបានកត់សម្គាល់ពីការផ្លាស់ប្តូរនៃការវិនិយោគពីឥណ្ឌា ទៅកាន់ប្រទេសចិន ជំរុញដោយ DeepSeek។ សន្ទស្សន៍ផ្សារភាគហ៊ុន MSCI របស់ចិន បានកើនឡើង ២៦,៥ ភាគរយ ចាប់ពីខែមករា ខណៈសន្ទស្សន៍របស់ឥណ្ឌា បានធ្លាក់ចុះជាង ៧ ភាគរយ។

នាយិកាគ្រប់គ្រង និងប្រធានផ្នែកមូលបត្រនៃក្រុមហ៊ុនគ្របគ្រងទ្រព្យសម្បត្តិ Lion Global Investors លោក Thio Siew Hua បាននិយាយថា៖ «រាល់ពេលដែលទីផ្សារចិនកើនឡើង ទីផ្សារឥណ្ឌាធ្លាក់ចុះ»។

ផ្សារភាគហ៊ុនរបស់ចិន ដែលជំរុញដោយផ្សារភាគហ៊ុនបច្ចេកវិទ្យា បានកើនឡើងចាប់តាំងពីក្រុមហ៊ុនបញ្ញាសិប្បនិម្មិតចិន DeepSeek បានបញ្ចេញ AI ម៉ូដែល R1 របស់ខ្លួន កាលពីខែមករា ដោយចំណាយតិច និងដំណើរការល្អ ដែលនេះបង្កើនការប្រកួតប្រជែងសម្រាប់វិស័យ AI របស់សហរដ្ឋអាមេរិក។

យ៉ាងណាមិញ ខណៈសុទិដ្ឋិនិយមជុំវិញទីផ្សារចិនកំពុងកើនឡើង សេដ្ឋកិច្ចនៃប្រទេសនេះនៅតែប្រឈមមុខនឹងបញ្ហា ដែលនាំឱ្យអ្នកជំនាញណែនាំឱ្យវិនិយោគិនមានប្រុងប្រយ័ត្ន ព្រោះថាទីផ្សារនឹងនៅតែបន្តប្រែប្រួល។

ស្ថាបនិក និងជាប្រធានផ្នែកស្រាវជ្រាវនៅក្រុមហ៊ុន Clearnomics លោក James Liu បាននិយាយថា៖ «កត្តាដូចជាសង្រ្គាមពាណិជ្ជកម្មដែលកំពុងកើនឡើង ការព្រួយបារម្ភលើប្រព័ន្ធហិរញ្ញវត្ថុចិន ការជាប់គាំងនៃវិបត្តិអចលនទ្រព្យ និងភាពមិនច្បាស់លាស់ជុំវិញគោលនយោបាយជំរុញសេដ្ឋកិច្ចរបស់រដ្ឋាភិបាល នឹងទំនងជាជំរុញឱ្យមានការប្រែប្រួលនៅឆ្នាំ ២០២៥»៕