​សមត្ថកិច្ច​នឹង​បញ្ចៀស​ចរាចរ កំណាត់​មហាវិថីព្រះនរោត្តម និង​បរិវេណ​ជុំវិញ​វិមាន​៧មករា​ ថ្ងៃទី២៦ ខែមេសា

អាជ្ញាធរ​មាន​សមត្ថកិច្ចនឹងបញ្ចៀសចរាចរ ចំពោះ​​យានយន្ត​គ្រប់​ប្រភេទ លើ​កំណាត់​មហាវិថី​ព្រះនរោត្តម (ចាប់ពីស្តុបជលផល ដល់ស្ពានអាកាសក្បាលថ្នល់ និង​បរិវេណ​ជុំវិញ​វិមាន៧មករា) នៅថ្ងៃទី២៦ ខែមេសា ឆ្នាំ២០២៥ខាងមុខនេះ។

តាម​សេចក្តី​ជូនដំណឹងរបស់រដ្ឋបាលរាជធានីភ្នំពេញបាន​ឱ្យ​ដឹង​ថា រដ្ឋបាលរាជធានីភ្នំពេញ សូម​ជម្រាបជូនដំណឹងដល់បងប្អូនប្រជាពលរដ្ឋទាំងអស់ក្នុងរាជធានីភ្នំពេញ ឱ្យ​បាន​ជ្រាប​ថា គណៈអចិន្ត្រៃយ៍ នៃគណៈកម្មាធិការកណ្តាលគណបក្សប្រជាជនកម្ពុជា​នឹង​រៀប​ចំ​ពិធី​សន្និបាត បូកសរុបលទ្ធផលការងារឆ្នាំ២០២៤ និង​ទិសដៅ​ការងារ​បន្ត របស់​យុវជនគណបក្សប្រជាជនកម្ពុជា ដែល​នឹង​ប្រព្រឹត្តទៅនៅថ្ងៃទី២៦ ខែមេសា ឆ្នាំ២០២៥ វេលាម៉ោង ០៧និង០០នាទី នៅវិមាន៧មករា ស្ថិតក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ក្រោម​អធិបតី​ភាព​ដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត អនុប្រធានគណបក្ស​ប្រជាជនកម្ពុជា និងជាប្រធានយុវជនគណបក្សថ្នាក់កណ្តាល។

ដើម្បី​ឱ្យ​ពិធី​សន្និបាត​ខាង​លើ​ប្រព្រឹត្ត​ទៅ​ដោយរលូនរក្សាបាននូវសន្តិសុខ សុវត្ថិភាព សណ្តាប់ធ្នាប់ និង របៀបរៀបរយ​សាធារណៈ ព្រម​ទាំង​បញ្ចៀស​បាន​នូវ​ការ​កកស្ទះចរាចរ អាជ្ញាធរ​មាន​សមត្ថកិច្ច​នឹង​បញ្ចៀស​ចរាចរ ចំពោះយានយន្តគ្រប់ប្រភេទ លើកំណាត់មហាវិថីព្រះនរោត្តម (ចាប់ពីស្តុបជលផល ដល់ស្ពានអាកាសក្បាលថ្នល់ និងបរិវេណជុំវិញទីតាំងប្រារព្ធពិធី) ចាប់ពីវេលាម៉ោង០៥:០០នាទីព្រឹក រហូតដល់បញ្ចប់កម្មវិធី៕

ដោយ ៖ ស្រីរ័ត្ន