ចិនប្ដេជ្ញាខិតខំជួយស្ដាររាជវាំងបុរាណនៅអង្គរ

ថ្នាក់ដឹកនាំកម្ពុជា-ចិនបានប្ដេជ្ញាពង្រឹងកិច្ចខិតខំប្រឹងប្រែងជំរុញកម្មវិធីអភិរក្ស និងស្ដារព្រះ​មរម​រាជ​​វាំង​​បុរាណនៅអង្គរ ក៏ដូចជាប្រាសាទព្រះវិហារ និងបេតិកភណ្ឌវប្បធម៌។

ការប្ដេជ្ញាបែបនេះ បានធ្វើឡើង​ នៅក្នុងសេចក្ដីប្រកាសព័ត៌មានស្ដីពីលទ្ធផល​នៃដំណើរទស្សន​កិច្ចផ្លូវ​​រដ្ឋ​របស់​លោក ស៊ី ជីនពីង ប្រធានាធិបតីចិននៅកម្ពុជាពីថ្ងៃទី ១៧ ដល់ថ្ងៃទី ១៨ ខែមេសា ឆ្នាំ ២០២៥។

សេចក្ដីប្រកាសព័ត៌មានរបស់ក្រសួងការបរទេសកម្ពុជាបញ្ជាក់ថា៖ «ភាគីទាំងពីរនឹង​ពង្រឹងកិច្ចខិត​ខំ​ប្រឹង​​​​ប្រែងជំរុញកម្មវិធីអភិរក្ស និងស្ដារព្រះ​មរម​រាជ​​វាំង​​បុរាណនៅអង្គរ ក៏ដូចជាប្រាសាទព្រះ​វិហារ និងបេតិកភណ្ឌវប្បធម៌ដ៏ទៃទៀត»។

ភាគីទាំងពីរបានកំណត់យក ឆ្នាំ ២០២៥ ជាឆ្នាំ​ទេសចរណ៍​កម្ពុជា-ចិន និងលើកទឹកចិត្ត​ប្រជា​ពល​រដ្ឋ​​ខ្លួនឱ្យធ្វើដំណើររវាងប្រទេសទាំងពីរ។ ភាគីទាំង​ពីរនឹង​រួមគ្នា អភិវឌ្ឍវិថីទេសចរណ៍ លើកកម្ពស់​ការ​ផ្សព្វផ្សាយទេសចរណ៍ និងពង្រឹកកិច្ចស​ហប្រ​តិ​បត្តិ​ការ​​ផ្នែកសុវត្ថិភាពទេសចរណ៍។

លើសពីនេះ ភាគទាំងពីរ នឹងបង្កើតយន្តការដើម្បីសម្រួលដល់ការផ្លាស់ប្ដូរ​ទៀងទាត់រវាង​នាយក​ដ្ឋាន​​​​​កិច្ចការយុវជន និងសហភាពសហព័ន្ធយុវជន នៃប្រទេសទាំងពីរ និងធ្វើឱ្យស៊ីជម្រៅនូវកិច្ច​សហ​​ប្រតិបត្តិ​ការរវាងធនាគារខួរក្បាល និងទីក្រុងសម្ព័ន្ធមេត្រីភាព ក្នុងគោលបំណងលើក​កម្ពស់​មិត្ត​ភាពកម្ពុជា-ចិន។

សូមជំរាបថា ដំណើរទស្សន​កិច្ចផ្លូវ​​រដ្ឋ​របស់​លោក ស៊ី ជីនពីង ប្រធានាធិបតីចិន មានការចុះ​ហត្ថ​លេខា​លើឯកសារចំនួន ៣៧ ដោយគ្របដណ្ដប់លើវិស័យជាច្រើន រួមមានការលើកកម្ពស់​កិច្ច​សហ​ប្រតិបត្តិការសន្តិសុខសកល ការអប់រំ និងការអភិវឌ្ឍធនធានមនុស្ស កសិកម្ម ឧស្សាហកម្ម ខ្សែ​ច្រ​វាក់ផ្គត់ផ្គង់ ជំនួយអភិវឌ្ឍន៍ ពន្ធគយ ចត្តាឡីស័ក សុខាភិបាល ទេសចរណ៍ និងប្រព័ន្ធ​ផ្សព្វ​ផ្សាយ៕

អត្ថបទ៖ ឡេង ដេត