ព័ត៌មានជាតិ

ក្រោយប្រព័ន្ធលូមេធំនៅផ្លូវលេខ ១០៥ ដាក់រួចរាល់ ជំនាញផ្ដើមដំណើរការ ចាក់ផ្លូវបេតុងជូនពលរដ្ឋ

បានផុស

១ year មុន

នៅ

ថ្ងៃអង្គារ ២២ មេសា ២០២៥

ដោយ

ប្រព័ន្ធលូមេធំៗ ស្ថិតនៅលើផ្លូវ ១០៥ ជាប់ប្រឡាយបង្ហូរទឹកបឹងត្របែក ការដ្ឋានបានដាក់រួចរាល់ នៅបន្តចាក់បេតុង នឹងចូលរួមរំដោះការលិចលង់កម្រិតខ្ពស់ក្នុងតំបន់ភូមិសាស្ត្រខណ្ឌមួយចំនួន ក្នុងរាជធានីភ្នំពេញ នារដូវវស្សាខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការដាក់ប្រព័ន្ធលូមេធំៗ នៅលើដងផ្លូវលេខ ១០៥ ទំហំ ៦ ម៉ែត្រ បន្ថែមលើផ្ទៃប្រឡាយដែលមានទទឹង ៦ ម៉ែត្រ ដូចគ្នា សរុបទាំងអស់ ១២ ម៉ែត្រ ដើម្បីបង្កើនការបង្ហូរទឹកប្រឡាយនេះពី ១២ ម៉ែត្រគូប ក្នុង ១ វិនាទី កើនដល់ ២៤ ម៉ែត្រគូប ក្នុងវិនាទី ទើបបង្ហូរទឹកហូរទាន់ពេលវេលា មិនបង្កជាការជន់លិច ឬលិចលង់ក្នុងតំបន់ពាក់ព័ន្ធ រួមមានភូមិសាស្ត្រខណ្ឌបឹងកេងកង , ចំការមន , ៧ មករា និងខណ្ឌដូនពេញ ជាដើម។

ប្រជាពលរដ្ឋរស់នៅប្របសងខាងផ្លូវកំពុងមានការអភិវឌ្ឍ បានសម្តែងការពេញចិត្ត និងចូលរួមជាមួយគម្រោងអភិវឌ្ឍន៍របស់រាជរដ្ឋាភិបាល។ ថ្វីត្បិតប៉ះពាល់ដល់ការរស់នៅ និងការប្រកបរបររកស៊ីទទួលទានបន្តិចបន្តួចក៏ពិតមែន ប៉ុន្តែពួកគាត់រំពឹងថា ពេលស្ថាបនារួចរាល់ ពួកគាត់នឹងទទួលបានសមិទ្ធផលថ្មី អាចប្រើប្រាស់បានក្នុងរយៈពេលយូរអង្វែង ពិសេសមិនព្រួយបារម្ភខ្ពស់លើការលិចលង់នៅរៀងរាល់រដូវវស្សាទៀតនោះឡើយ។

គួរបញ្ជាក់ថា ក្នុងអាណត្តិរាជរដ្ឋាភិបាលនីតិកាលទី ៧ នៃរដ្ឋសភានេះ បានដាក់ចេញនូវគោលបំណងប្រកបដោយការប្ដេជ្ញាចិត្តខ្ពស់សំដៅក្នុងការឈានបញ្ចប់បញ្ហាទឹកជន់លិចរាជធានីភ្នំពេញក្នុងរយៈពេល ៥ ឆ្នាំខាងមុខ។ ការអនុវត្តគម្រោងនេះ បានដំណើរការទៅអស់រយៈពេលជាង ៦ ខែ កន្លងទៅហើយ ដោយក្រុមការងារបានសម្រេចលទ្ធផលជាង ៨០ ភាគរយ ហើយនឹងបញ្ចប់ការដ្ឋានទាំងស្រុងនៅខែឧសភា ឆ្នាំ ២០២៥ ខាងមុខនេះ។

រាជរដ្ឋាភិបាល តាមរយៈរដ្ឋបាលរាជធានីភ្នំពេញ បានរៀបចំគម្រោងចំនួន ៥០ គម្រោង សម្រាប់រយៈពេល ៥ ឆ្នាំ ហើយបច្ចុប្បន្នគម្រោងមួយចំនួនធំបាននិងកំពុងអនុវត្តក្នុងតំបន់ដែលងាយរងគ្រោះដោយការលិចលង់ជាងគេ រួមមាន ៖ តំបន់ជុំវិញស្ថានីយបូមទឹកលូប្រាំ , តំបន់ជុំវិញស្ថានីយបូមទឹកបឹងទំពន់ និងតំបន់ជុំវិញស្ថានីយបូមទឹកបឹងត្របែក ជាដើម៕

អត្ថបទ ៖ សុភា