សម្ដេច ហ៊ុន សែន និងសមភាគីឥណ្ឌូណេស៊ី ផ្ដើមគំនិតចង់ឱ្យបង្កើតកិច្ចប្រជុំកំពូលព្រឹទ្ធសភាអាស៊ាន

ក្នុងឋានៈជាប្រធានព្រឹទ្ធសភាកម្ពុជា សម្ដេចតេជោ ហ៊ុន សែន បានផ្ដើមគំនិតចង់ឱ្យមានការបង្កើតឡើងនូវវេទិកានៃកិច្ចប្រជុំកំពូលសម្រាប់ស្ថាប័នព្រឹទ្ធសភានៃបណ្ដាប្រទេសជាសមាជិកអាស៊ាន ហើយសមភាគីឥណ្ឌូណេស៊ី ក៏បានប្រកាសគាំទ្រចំពោះគំនិតរបស់សម្ដេចតេជោ ដើម្បីលើកកម្ពស់តួនាទីរបស់ព្រឹទ្ធសភាក្នុងការដោះស្រាយបញ្ហាក្នុងតំបន់។

គំនិតផ្ដួចផ្ដើមថ្មីនេះ ត្រូវបានលើកឡើងក្នុងជំនួបការងាររវាងសម្ដេចតេជោ ហ៊ុន សែន និងលោក ស៊ុលតាន់ បាចទីយ៉ា ណាចាមូឌីន ប្រធានព្រឹទ្ធសភាឥណ្ឌូណេស៊ី នារដ្ឋធានីហ្សាការតា កាលពីថ្ងៃទី៧ ខែឧសភា ឆ្នាំ២០២៥។ បើតាមអ្នកនាំពាក្យព្រឹទ្ធសភា លោក ជា ធារិទ្ធ ក្នុងជំនួបនេះ សម្ដេចតេជោ ហ៊ុន សែន និងស៊ុលតាន់ បាចទីយ៉ា ណាចាមូឌីន បានលើកឡើងនូវគំនិតរួមមួយដូចគ្នា ដែលជាគំនិតថ្មី គឺការបង្កើតឱ្យមានវេទិកាប្រជុំកំពូលព្រឹទ្ធសភានៅក្នុងតំបន់អាស៊ាន។

ការបង្កើតឱ្យវេទិកាព្រឹទ្ធសភាអាស៊ាន សម្ដេចតេជោ ប្រធានព្រឹទ្ធសភា បញ្ជាក់ថា វាជាការចាំបាច់ណាស់ដែលព្រឹទ្ធសភានៅក្នុងតំបន់អាស៊ានដើរតួនាទីសំខាន់បន្ថែមទៀតក្នុងការពង្រឹងនូវទំនាក់ទំនងមិត្តភាព ក៏ដូចជាការដោះស្រាយបញ្ហានៅក្នុងតំបន់អាស៊ាន។ សម្ដេចតេជោ ក៏បានលើកឡើងពីតួនាទីរបស់ប្រទេសឥណ្ឌូណេស៊ី ដែលជាតួអង្គដ៏សំខាន់ ព្រោះថា លេខាធិការដ្ឋានអាស៊ាន គឺមានទីតាំងក្នុងប្រទេសនេះស្រាប់។ ដូច្នេះ អាចបង្កើតនូវគំនិតមួយនេះ ដើម្បីឱ្យមានការគាំទ្រ ហើយរៀបចំនូវវេទិកានេះឡើង។

ឆ្លើយតបនឹងទស្សនទានរបស់សម្ដេចតេជោ លោក ស៊ុលតាន់ បាចទីយ៉ា ណាចាមូឌីន ប្រធានព្រឹទ្ធសភាឥណ្ឌូណេស៊ីគាំទ្រ បានបង្ហាញការគាំទ្រ១០០% ចំពោះការបង្កើតឱ្យមានវេទិកាកិច្ចប្រជុំកំពូលព្រឹទ្ធសភាក្នុងតំបន់អាស៊ាននេះ ដោយលោក បានរំលេចថា វេទិកាកិច្ចប្រជុំកំពូលព្រឹទ្ធសភាអាស៊ាននេះ នឹងដើរតួនាទីយ៉ាងសំខាន់ក្នុងការលើកកម្ពស់ទំនាក់ទំនងនៅក្នុងតំបន់ ក៏ដូចជាការបង្ហាញនូវតួនាទីរបស់ព្រឹទ្ធសភាបន្ថែមទៀតក្នុងការដោះស្រាយបញ្ហានៅក្នុងតំបន់ឱ្យបានកាន់តែល្អប្រសើរគ្រប់ផ្នែក។

ជាការចាប់អារម្មណ៍ តបតាមការអញ្ជើញរបស់សម្ដេចតេជោ ហ៊ុន សែន លោកប្រធានព្រឹទ្ធសភាឥណ្ឌូណេស៊ី ក៏បានសន្យាថា នឹងមកបំពេញទស្សនកិច្ចនៅកម្ពុជា នាពេលឆាប់ៗខាងមុខ៕