រយៈពេល ១ ឆ្នាំ សាខាកាកបាទក្រហមកម្ពុជា ខេត្តក្រចេះ ចុះ​ជួយឧបត្ថម្ភដល់ពលរដ្ឋជួបការលំបាក ខ្វះខាត សរុបចំនួន ៦៤១ គ្រួសារ

ក្នុងរយៈពេល ១ ឆ្នាំកន្លងទៅនេះ សាខាកាកបាទក្រហមកម្ពុជាខេត្តក្រចេះ បានជួយឧបត្ថម្ភដល់ពលរដ្ឋជួបការលំបាក ខ្វះខាត នៅតាមសហគមន៍ជាគ្រឿងឧបភោគ-បរិភោគ សម្ភារៈប្រើប្រាស់ និងថវិការ សរុបចំនួន ៦៤១ គ្រួសារ ស្មើនឹង ២.៧០៧ នាក់។

ក្នុងនោះ គ្រួសារងាយរងគ្រោះ ចាស់​ជរា ស្ដ្រីមេម៉ាយ កុមារកំព្រា ចំនួន ២៣១ គ្រួសារ, ភ្លើងឆេះផ្ទះ ចំនួន ៣៦ គ្រួសារ, ខ្យល់កន្ត្រាក់ ចំនួន ២០ គ្រួសារ, គ្រោះទឹកជំនន់ ចំនួន ៣៤៤ គ្រួសារ, លង់ទឹកស្លាប់ និងរន្ទះបាញ់ ស្លាប់ចំនួន ១០ នាក់។ នេះបើយោងតាមរបាយការណ៍របស់សាខាកាកបាតក្រហមកម្ពុជា ខេត្តក្រចេះ បានឲ្យដឹងក្នុងឱកាសអបអរខួបលើកទី១៦២ ៨ ឧសភា ឆ្នាំ២០២៥ ទិវាពិភពលោកកាកបាតក្រហម និងអឌ្ឍចន្ទក្រហម និងខួបលើកទី ៧០ ឆ្នាំនៃកាកបាតក្រហមកម្ពុជា ក្រោមប្រធានបទ រួមគ្នាស្មគ្រ័ចិត្ត ដើម្បីសហគមន៍មានសុខភាពល្អ និងមានភាពធន់នឹងអាកាសធាតុ នាថ្ងៃទី ១០ ខែឧសភា ឆ្នាំ២០២៥ នៅសាលមហោស្រពខេត្តក្រចេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពិធីនេះ ប្រារព្ធធ្វើឡើងក្រោមអធិបតីភាព លោក នេត្រ ភក្ត្រា រដ្ឋមន្ត្រីក្រសួងព័ត៌មាន និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តក្រចេះ នឹងវត្តមានចូលរួមពីលោក វ៉ា ថន អភិបាលនៃគណៈអភិបាលខេត្ត និងលោក ហឿ ស៊ីយ៉ែម ប្រធានក្រុមប្រឹក្សាខេត្តក្រចេះ។

ចំពោះអនុសាខាក្រុងស្រុកទាំង ៧ វិញ ក៏បានជួយឧបត្ថម្ភ សម្ភារៈប្រើប្រាស់ គ្រឿង​ឧបភោគ-បរិភោគ និងថវិកា ដល់ប្រជាពលរដ្ឋជួបការលំបាក និងរងគ្រោះផ្សេងៗ តាមបណ្តាក្រុងស្រុក សរុបចំនួន ៧៣ គ្រួសារផងដែរ។

ដោយឡែក ក្រុមការងារកាកបាទក្រហមកម្ពុជា ដឹកនាំដោយលោក យូ ឡាណា អគ្គលេខាធិការងទី២ កាកបាទក្រហមកម្ពុជា ក៏បានចុះសួរសុខទុក្ខនិងចែកអំណោយ ជូនដល់គ្រួសាររងគ្រោះដោយខ្យល់កន្ត្រាក់ សរុបចំនួន ១៦១ គ្រួសារ ក្នុងស្រុកចិត្របុរី និងស្រុកព្រែកប្រសព្វ។

ទោះបីជា សាខាកាកបាទក្រហមកម្ពុជា ខេត្តក្រចេះ ទទួលបានជោគជ័យក្នុងកិច្ចការរបស់ខ្លួនយ៉ាងណាក្តី ក៏នៅមានបញ្ហាខ្វះចន្លោះមួយចំនួន ដូចជាមុខសញ្ញាគ្រួសារងាយរងគ្រោះនៅតាមតំបន់ជនបទដាច់ស្រយាល មួយចំនួនពុំបានផ្ដល់ព័ត៌មានបានទាន់ពេលវេលា កិច្ចសហប្រតិបត្តិការរបស់អនុសាខាមិនទាន់ស៊ីជម្រៅនៅតាមមូលដ្ឋានរបស់ខ្លួន និងការស្វែងរកមូលនិធិនៅមានកម្រិត៕

អត្ថបទ៖ ប្រុញ វិធិន