ក្រុម​ប្រឹក្សា​រាជធានីស្នើ​រដ្ឋបាលរាជធានី​បន្ត​ចាត់វិធានការចំពោះម៉ូតូ ឡាន​បំពាក់​ស៊ីម៉ាំងធំៗបង្កសំឡេងរំខាន

ក្រុមប្រឹក្សារាជធានីភ្នំពេញបានស្នើ​ឱ្យ​រដ្ឋបាល រាជធានីភ្នំពេញ​បន្ត​ចាត់វិធានការ​ចំពោះក្មេងទំនើងដែលបំពាក់ស៊ីម៉ាំងធំៗបង្កសំឡេងរំខាន ដល់ប្រជាពលរដ្ឋ​នៅក្នុងរាជធានីភ្នំពេញ។

ការ​ស្នើសុំបែបនេះ​របស់សមាជិកក្រុមប្រឹក្សារាជធានីភ្នំពេញ បានធ្វើឡើងនាព្រឹកថ្ងៃទី១១ ខែមិថុនា ឆ្នាំ២០២៥នេះ ក្នុងកិច្ចប្រជុំសាមញ្ញលើកទី១៣ របស់ក្រុមប្រឹក្សារាជធានីភ្នំពេញ ឆ្នាំទី១ អាណត្តិទី៤ ក្រោមអធិបតីភាពលោក ម៉ប់ សារិន ប្រធានក្រុមប្រឹក្សារាជធានីភ្នំពេញនិងលោកឃួង ស្រេង អភិបាលនៃគណះអភិបាលរាជធានីភ្នំពេញនៅសាលារាជធានីភ្នំពេញ។

ក្រៅពីការស្នើសុំខាងលើ សមាជិកក្រុមប្រឹក្សារាជធានីភ្នំពេញ ក៏បានថ្លែងនូវការ​កោតសរសើរ​ផងដែរ ចំពោះ​អាជ្ញាធរ​រាជធានីភ្នំពេញ​ដែល​បាន​យក​អស់​កម្លាំងកាយ​ចិត្ត ក្នុង​ការ​កសាង​អភិវឌ្ឍន៍រាជធានីភ្នំពេញ ឱ្យ​មាន​ការ​អភិវឌ្ឍរីកចម្រើនជាមួយនឹងការពារសន្តិសុខ សុវត្ថិភាព​បាន​យ៉ាង​ល្អ​ប្រសើរដែលធ្វើ​ឱ្យ​បទល្មើសក្នុងខែឧសភាកន្លងមកនេះ មានការថយចុះ ពោលគឺ​បទល្មើស​ព្រហ្មទណ្ឌកើតមាន ៣៧លើក/ ៤៩លើក ថយចុះ ១២លើក។

ក្រុម​ប្រឹក្សារាជធានីភ្នំពេញក្នុងកិច្ចប្រជុំនោះ ក៏បានប្រកាស​គាំទ្រ​យ៉ាង​ពេញ​ទំហឹង ចំពោះ​ចំណាត់​ការ​ដ៏ម៉ឺងម៉ាត់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ដ្រី ទាក់ទង​នឹង​ដំណោះស្រាយបញ្ហាព្រំដែនរវាងប្រទេសកម្ពុជា និងថៃ ដោយប្រើប្រាស់យន្តការទ្វេភាគី ការប្ដឹងទៅកាន់តុលាការយុត្តិធម៌អន្ដរជាតិ ICJ។

ជា​ការ​ឆ្លើយតប​ក្នុង​កិច្ចប្រជុំ​នោះ លោក​ឃួង​ស្រេង បានមានប្រសាសន៍លើកឡើងថា ពាក់ព័ន្ធ​នឹង​ការ​បំពង​សំឡេង​ស៊ីម៉ាំងម៉ូតូឡាន រដ្ឋបាលរាជធានីភ្នំពេញបានអនុវត្តការងារនេះ ច្រើនហើយ។ ប៉ុន្តែទោះបីជាយ៉ាងណាក្តីក្នុងនាមអាជ្ញាធររាជធានីភ្នំពេញ យើងនឹងមានវិធានការ ចំពោះការបំពងសំឡេងរំខានដោយស៊ីម៉ាំងម៉ូតូនិងរថយន្តទាំងនេះ។ ការងារចំពោះមុខ យើងត្រូវបង្កើននូវការផ្សព្វផ្សាយ ដើម្បី​ឱ្យពួកគាត់យល់ដឹងពីការរំខានដោយសំឡេងស៊ីម៉ាំងម៉ូតូ ឡានទាំងនេះ។

ជាមួយគ្នានោះលោកឃួង ស្រេង​ក៏​បាន​ជំរុញ​ឱ្យអាជ្ញាធរកងកម្លាំងមានសមត្ថកិច្ចបន្តការរឹតបន្តឹងច្បាប់ចរាចរណ៍ផ្លូវគោក ពិសេសរថយន្តដឹកធ្ងន់ដែលដាក់វាំងននបិទជិត បង្កហានិភ័យ ច្រើន ដល់គ្រោះថ្នាក់ចរាចរណ៍ ដោយផ្សព្វផ្សាយ អប់រំឱ្យច្រើនជាងការផាកពិន័យ។

លោកឃួង ស្រេង បានបន្ត​ថា ពាក់ព័ន្ធនឹងសំណល់រឹង សំរាមនៅក្នុងរាជធានីភ្នំពេញ បើទោះបីការដឹកជញ្ជូន ការប្រមូល ទុកដាក់សំរាម មានភាពល្អប្រសើរហើយក្តី ប៉ុន្តែ យើងក៏នៅមានបញ្ហាចន្លោះ​ប្រហោង​ខ្លះ ដែលយើងត្រូវតែបន្តអនុវត្តឲ្យកាន់តែល្អប្រសើរថែមទៀត។

ជាមួយគ្នានោះ លោកឃួង ស្រេង ក៏បានធ្វើការអំពាវនាវ ឱ្យ​មន្ត្រីរាជការទាំងអស់ សូមលើកទឹកចិត្តដល់កងកងទ័ពជួរមុខដែលកំពុងតែឈរជើងការពារព្រំដែន តាមរយៈការជួយឧបត្ថមជាថវិកា គ្រឿងឧបភោគបរិភោគ ជូនពួកគាត់ទោះតិចឬច្រើនក្តី ។ បន្ថែមពីនេះទៀត លោក ឃួង ស្រេង ក៏បានណែនាំឱ្យមន្ត្រី ខណ្ឌ សង្កាត់ អង្គភាពនានា ជួយស៊ែរផេក របស់ថ្នាក់ដឹកនាំរបស់យើងឱ្យបានគ្រប់គ្នា ដូចជាផេករបស់សម្ដេចតេជោហ៊ុន សែន ផេករបស់សម្តេចបវរអធិបតីហ៊ុនម៉ាណែត និង​លោក ស សុខាជាដើម ដើម្បីបង្ហាញ​ឱ្យ​ឃើញ​ពី​ទឹកចិត្តរួមគ្នា ដើម្បីជាតិតែមួយ៕

ដោយ ៖ ស្រីរ័ត្ន