គិតត្រឹមថ្ងៃទី២០មិថុនា ឆ្នាំ២០២៥ កម្ពុជាមានឱកាសការងារជាង ២៥ម៉ឺនកន្លែងនៅទូទាំងប្រទេស

លោក ហួត ស៊ីនាដ រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ បានបញ្ជាក់ថា​ គិតត្រឹមថ្ងៃទី២០ ខែមិថុនា ឆ្នាំ២០២៥នេះ កម្ពុជាមានឱកាសការងារជាង ២៥ម៉ឺនកន្លែង ពីក្រុមហ៊ុន សហគ្រាស និងរោងចក្រនៅទូទាំងប្រទេស។

ការលើកឡើងពីឱកាសការងាររបស់លោក ហួត ស៊ីនាដ បែបនេះ ធ្វើឡើងនៅក្នុងវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខណ្ឌពោធិ៍សែនជ័យ អាណត្តិទី៤ នៅបរិវេណវត្តកំពែង សង្កាត់ចោមចៅទី១ ខណ្ឌពោធិ៍សែនជ័យ កាលពីព្រឹកថ្ងៃទីទី២០ ខែមិថុនា ឆ្នាំ២០២៥នេះ។

ជាមួយឱកាសការងារជាង ២៥ម៉ឺនកន្លែងនេះ រដ្ឋលេខាធិការក្រសួងការងារ ក៏បានផ្សព្វផ្សាយពន្យល់ឱ្យប្រជាពលរដ្ឋដែលបានចូលរួមវេទិកា ទទួលបានព័ត៌មានស្ដីអំពីឱកាសការងារ ការអប់រំបណ្ដុះបណ្ដាលបច្ចេកទេស និងវិជ្ជាជីវៈ និងអត្ថប្រយោជន៍របស់ ប.ស.ស.។ បើតាមលោក ហួត ស៊ីនាដ ទីភ្នាក់ងារជាតិមុខរបរ និងការងារ នៃក្រសួងការងារ និងបណ្តុះបណ្តាលវិជ្ជាជីវៈ ក៏កំពុងបន្តប្រមូលនូវឱកាសការងារពីបណ្តាក្រុមហ៊ុនតូច-ធំ សហគ្រាស និងរោចក្រ ចាស់ ថ្មី បន្ថែមទៀតសម្រាប់ត្រៀមជូនប្រជាពលរដ្ឋ ជាពិសេស ពលករខ្មែរដែលត្រលប់មកពីប្រទេសថៃ។

ដោយឡែក មានប្រសាសន៍ក្នុងនាម ប្រធានក្រុមការងាររាជរដ្ឋាភិបាលចុះមូលដ្ឋានខណ្ឌពោធិ៍សែនជ័យ លោក ហួត ស៊ីនាដ ក៏បានផ្តល់ព័ត៌មានជូនក្រុមប្រឹក្សាសង្កាត់ សហគមន៍ ប្រជាពលរដ្ឋ និងអ្នកពាក់ព័ន្ធអំពីសកម្មភាពនានារបស់ខណ្ឌ ក្នុងការឆ្លើយតបទៅនឹងសំណើនានារបស់ក្រុមប្រឹក្សាសង្កាត់ និងប្រជាពលរដ្ឋ ដើម្បីប្រមូល និងពិភាក្សាអំពីសំណើ និងមតិយោបល់នានាសម្រាប់សកម្មភាពឆ្នាំខាងមុខ។ បន្ថែមពីនេះ វេទិកាក៏បានផ្តល់ឱកាសជូនប្រជាពលរដ្ឋ និងអ្នកពាក់ព័ន្ធដើម្បីលើកជាសំណើ សំណូមពរ អនុសាសន៍ និងបញ្ហាដែលបានជួបប្រទះនៅក្នុងមូលដ្ឋាន។

វេទិកាផ្សព្វផ្សាយ និងពិគ្រោះយោបល់ក៏បានផ្តល់ឱកាសជូនប្រជាពលរដ្ឋបានប្រាស្រ័យទាក់ទងគ្នាទៅវិញទៅមករវាងរដ្ឋបាលខណ្ឌជាមួយរដ្ឋបាលសង្កាត់ និងប្រជាពលរដ្ឋ តំណាងសង្គមស៊ីវិល និងវិស័យឯកជន ក្រុមប្រឹក្សាប្រភេទផ្សេងៗគ្នា ដើម្បីផ្លាស់ប្តូរនូវបទពិសោធន៍ និងផ្តល់ប្រឹក្សាអំពីអាទិភាពនៃការអភិវឌ្ឍខណ្ឌប្រកបដោយចីរភាព និងប្រសិទ្ធភាព៕