ព័ត៌មានជាតិ

អំណោយរបស់សម្តេចតេជោ បានទៅដល់ដៃអាជីវករលក់ដូរតាមកញ្ច្រែងនៅផ្សារបន្លែច្បារអំពៅ

បានផុស

៥ years មុន

នៅ

ថ្ងៃព្រហស្បតិ៍ ១ មេសា ២០២១

ដោយ

បងប្អូនអាជីវករដែលលក់ដូរតាមកញ្ច្រែង កញ្ជើ ក្នុងផ្សារបន្លែច្បារអំពៅ កាលពីរសៀលថ្ងៃទី៣១ខែមីនានេះ បានទទួលអំណោយដ៏ថ្ងៃថ្លារបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា តាមរយៈសាលារាជធានីភ្នំពេញ ផ្តល់ជូនគណៈគ្រប់គ្រងផ្សារបន្លែច្បារអំពៅ ជូនទៅដល់ដៃបងប្អូនអាជីវករដែលលក់ដូរតាមកញ្ច្រែង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមប្រភពពីលោក សាន់ ប៊ុនណា ប្រធានគណៈកម្មការផ្សារបន្លែច្បារអំពៅ បានឲ្យដឹងថា អំណោយរបស់សម្តេចតេជោ ដែលបានផ្តល់ដល់បងប្អូនអាជីវករ ដែលលក់ដូរតាមកញ្ច្រែង កញ្ជើនោះ មានចំនួន៣៨គ្រួសារ។ ក្នុងនោះមួយគ្រួសារទទួលបានអង្ករ២៥គីឡូក្រាម ជែល១ដប ម៉ាស់១៥ និងប័ណ្ណសមធម៌សុខាភិបាលមួយសន្លឹកផងដែរ។

លោកប្រធានគ្រប់គ្រងផ្សារបន្លែច្បារអំពៅបានឲ្យដឹងថា អំណោយដ៏ថ្លៃថ្លារបស់សម្តេចតេជោផ្តល់ជូនបងប្អូនអាជីវករដែលលក់ដូរតាមកញ្ច្រែង កញ្ជើទាំង៣៨គ្រួសារនាពេលនេះ គឺធ្វើឲ្យគណៈគ្រប់គ្រងផ្សារ ក៏ដូចជាបងប្អូនអាជីវករបានសម្ដែងនូវក្តីរំភើបរីករាយ ខណៈដែលពួកគាត់កំពុងខ្វះខាតខ្លាំង។ ពិសេសគឺប័ណ្ណសមធម៌របស់ក្រសួងសុខាភិបាលដែលពេលមានជំងឺទៅពិនិត្យសុខភាពមិនយកប្រាក់។

ក្នុងនោះលោក សាន់ ប៊ុនណា បានក្រើនរំលឹកដល់បងប្អូនអាជីវករដែលលក់ដូរក្នុងផ្សារបន្លែច្បារអំពៅ ត្រូវចូលរួមអនុវត្តន៍ឲ្យបានខ្ជាប់ខ្ជួននូវវិធានការ ៣កុំ និង៣ការពារឲ្យបានគ្រប់ៗគ្នា ព្រោះវិធានការនេះ គឺដើម្បីការពារសុខភាពផ្ទាល់ខ្លួន និងក្រុមគ្រួសារយើង ចៀសវាងពេលជំងឺកូវីដ១៩នេះឆ្លងហើយ គឺធ្វើឲ្យខ្លួនយើងនិងក្រុមគ្រួសារនិងជួបទុក្ខលំបាកទ្វេឡើង។

គួរបញ្ជាក់ថា ផ្សារបន្លែច្បារអំពៅ មានទីតាំងស្ថិតនៅភូមិកណ្តាល សង្កាត់ច្បារអំពៅទី២ ខណ្ឌច្បារអំពៅ រាជធានីភ្នំពេញ៕

អត្ថបទ ៖ នរា