អគ្គនាយកអន្តោប្រវេសន៍ អះអាងពីការចាកចេញរបស់ពលរដ្ឋខ្មែរពីទឹកដីថៃ រាប់ពាន់នាក់ក្នុងមួយថ្ងៃ

នៅថ្ងៃ​​ទី២៥ ខែ​មិថុនានេះ ច្រកទ្វារព្រំដែនទាំងអស់រវាងកម្ពុជា-ថៃ នៅតែបន្តបិទសម្រាប់ដំណើរចេញ-ចូលរបស់មនុស្សទូទៅ ទំនិញ ឡាន និងម៉ូតូ បន្ទាប់ពីភាគីថៃបាន​សម្រេចបិទ​ច្រកព្រំដែនទាំងស្រុង​ជាមួយកម្ពុជា ជាឯកតោភាគី កាលពី​ថ្ងៃទី២៤មិថុនា​។ បើតាមអគ្គនាយកអន្តោប្រវេសន៍ អាជ្ញាធរនៅតែ​​បន្តសម្របសម្រួ​ល​​​​ជាមួយភាគីថៃ ចំពោះករណីដែលពលរដ្ឋខ្មែរចង់វិលចូលប្រទេសកម្ពុជាវិញ។

ឧត្តមសេនីយ៍ឯក សុខ វាសនា អគ្គនាយកអន្តោប្រវេសន៍ បានប្រាប់កម្ពុជាថ្មី នៅថ្ងៃព្រហស្បតិ៍នេះថា ចំនួនប្រជាពលរដ្ឋខ្មែរដែលបានចាកចេញពីទឹកដីថៃចូលស្រុកកំណើតវិញ គឺបានកើនឡើងខ្លាំងចាប់យប់ថ្ងៃទី២៤ ខែមិថុនា ក្នុងពេលដែលភាគីថៃបានប្រកាសបិទ​ព្រំដែនទាំងអស់ជាមួយកម្ពុជា។ បើតាមលោកឧត្តមសេនីយ៍ឯក ក្នុងថ្ងៃទី២៤ ម្សិលមិញ ពលរដ្ឋខ្មែរជិត១ម៉ឺននាក់ បានចាកចេញពីទឹកដីថៃ។

ប៉ុន្តែគិតមកដល់ពេលនេះ អគ្គនាយកដ្ឋានអន្តោប្រវេសន៍ មិនទាន់អាចសរុបស្ថិតិប្រជាពលរដ្ឋខ្មែរ ដែលវិលចូលប្រទេសបាននៅឡើយទេ។ ខណៈមកដល់ពេលនេះ ក៏នៅតែមានការចាកចេញរបស់ប្រជាពលរដ្ឋខ្មែរពីប្រទេសថៃជាបន្តបន្ទាប់ ហើយអាជ្ញាធរកម្ពុជាស្វាគមន៍ និងចាំជួយសម្របសម្រួលសម្រាប់ដំណើរត្រឡប់មកវិញនេះ។

តាមសេចក្តីរាយការណ៍ពីព្រំដែន បានឱ្យដឹងថា នៅតាមច្រកទ្វារព្រំដែនកម្ពុជា និងថៃ គឺយោធាថៃនៅបន្តមិនអនុញ្ញាតឱ្យអ្នកដំណើរទាំងភ្ញៀវជាតិ-អន្តរជាតិ រថយន្ត ម៉ូតូ និងការដឹកទំនិញឆ្លងកាត់នោះឡើយ តែសម្រាប់អ្នកជំងឺ និងកូនសិស្ស អាចធ្វើដំណើរឆ្លងកាត់បានដដែល។

ជុំវិញការបិទបើកច្រកព្រំដែនដោយទំនើងចិត្តពីសំណាក់ភាគីថៃនេះ ឧត្តមសេនីយ៍ឯក សុខ វាសនា បានបញ្ជាក់ជាថ្មីថាកម្ពុជាបានឈរលើជំហរច្បាស់លាស់ក្នុងការបើកដំណើរការច្រកទ្វារព្រំដែនទាំងអស់ នៅពេលដែលភាគីថៃបើកដំណើរការជាផ្លូវការច្រកព្រំដែនទាំងអស់ដូចដើមមុន កម្ពុជានឹងបើកដូចគ្នា៕

ដោយ៖ ធឿន វ៉ាន់សុង