ព័ត៌មានជាតិ

គម្រោងអភិវឌ្ឍន៍ប្រព័ន្ធលូធំៗ របស់រដ្ឋបាលរាជធានី អាចជួយរំដោះទឹកភ្លៀង ទាន់ពេលវេលា មិនឲ្យជន់លិចនៅតំបន់បឹងទំពុន

បានផុស

១២ ខែ មុន

នៅ

ថ្ងៃសុក្រ ២៧ មិថុនា ២០២៥

ដោយ

គម្រោងអភិវឌ្ឍន៍ប្រព័ន្ធលូធំៗ របស់រដ្ឋបាលរាជធានី អាចជួយរំដោះទឹកភ្លៀងបានទាន់ពេលវេលា មិនឲ្យជន់លិចនៅតំបន់បឹងទំពុន ខណៈកន្លងមក នៅរដូវវស្សា ក្នុងតំបន់មួយចំនួនពេលមានភ្លៀងធ្លាក់មកជោកជាំម្ដងៗ តែងតែជន់លិច ប៉ះពាល់ផ្ទះសំបែងប្រជាពលរដ្ឋ និងលិចផ្លូវ ធ្វើឲ្យពិបាកក្នុងការធ្វើដំណើរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្ដែងនៅត្រង់ចំណុចផ្លូវលេខ ៦៩ បេតេ ក្នុងភូមិត្នោតជ្រុំ ១ សង្កាត់បឹងទំពុនទី ២ ខណ្ឌមានជ័យ រាជធានីភ្នំពេញ មានការផ្លាស់ប្ដូរប្រព័ន្ធលូខ្នាតធំរួចរាល់ហើយ និងមានការស្ថាបនាផ្លូវបេតុងបន្ថែមទៀត កម្រាស់ ១ តឹក ជូនប្រជាពលរដ្ឋ ដើម្បីងាយស្រួលក្នុងការធ្វើដំណើរផងដែរ។

អ្នកស្រី សុខ សុខា និង លោក ទិត្យ សំណាង ដែលជាប្រជាពលរដ្ឋរស់នៅតំបន់ខាងលើ បានលើកឡើងដូចគ្នាថា កាលពីមុន ជារៀងរាល់ឆ្នាំ ឲ្យតែមានភ្លៀងធ្លាក់ខ្លាំង គឺតែងមានការជន់លិច មិនអាចបើកបរ ឬធ្វើអាជីវកម្មបានឡើយ ជាពិសេសត្រង់ចំណុចជិតវិហារព្រះយេស៊ូ គឺ ទឹកលិចជ្រៅ ហើយលំហូរទឹកហូរមានការយឺតយ៉ាវ ទម្រាំទឹកស្រកអស់ចំណាយពេលយូរ ដោយសារប្រព័ន្ធលូពីមុនតូច និងចាស់ទ្រុឌទ្រោម។

ប្រជាពលរដ្ឋបានបន្តទៀតថា ពួកគាត់មានអារម្មណ៍សប្បាយចិត្តនៅពេលឃើញអាជ្ញាធររាជធានីភ្នំពេញ ធ្វើការអភិវឌ្ឍន៍គម្រោងដាក់ប្រព័ន្ធលូធំៗ ដើម្បីរំដោះទឹកជន់លិចនៅរដូវភ្លៀង ហើយក៏សង្ឃឹមថា នៅពេលគម្រោងដាក់ប្រព័ន្ធលូប្រអប់ធំៗ នេះ រួចរាល់ ក្នុងរាជធានីភ្នំពេញ នឹងលែងមានការជន់លិចតទៅទៀត។

ដោយឡែក មន្ត្រីជំនាញដែលកំពុងពិនិត្យទីតាំងការដ្ឋានផ្ទាល់ បានបញ្ជាក់ប្រាប់ កម្ពុជាថ្មី ឲ្យដឹងថា គម្រោងអភិវឌ្ឍន៍ប្រព័ន្ធលូរបស់រដ្ឋបាលរាជធានីជាប្រភេទលូប្រអប់មានទំហំ ៣ ម៉ែត្រ ៤ ជ្រុង អាចជួយរំដោះទឹកភ្លៀងបានទាន់ពេលវេលា មិនឲ្យមានការជន់លិចនៅតំបន់នោះទេ។