ពលរដ្ឋ ៤ ភូមិ ក្នុងស្រុកចិត្របុរី ទទួលបាន​ប័ណ្ណសម្គាល់អចលនវត្ថុ ធានាសិទ្ធិកាន់កាប់​ស្របច្បាប់

ប្រជាពលរដ្ឋរស់នៅភូមិចំនួន ៤ ក្នុងឃុំដារ ស្រុកចិត្រុបរី ខេត្តក្រចេះ ទទួលបានវិញ្ញាបនប័ត្រសម្គាល់ម្ចាស់អចលនវត្ថុ ចំនួន ១ ៦៣៩ ប័ណ្ណក្បាលដី ពីរាជរដ្ឋាភិបាល តាមរយៈក្រសួងរៀបចំដែនដី នគរូបនីយកម្ម និងសំណង់ ក៏ដូចជា រដ្ឋបាលខេត្ត និងមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តក្រចេះ។

ការចែកប័ណ្ណនេះ ធ្វើឡើងនាថ្ងៃទី០២ ខែកក្កដា ឆ្នាំ ២០២៥ ក្រោមអធិបតីភាពលោក ហេង សុថា អភិបាលរងខេត្ត តំណាងលោកអភិបាលខេត្តក្រចេះ។

លោក អ៊ូ សុបុណ្ណកា ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត បានបញ្ជាក់ថា ការចុះបញ្ជីដីធ្លីមានលក្ខណៈជាប្រព័ន្ធ កើតចេញពីគំនិតផ្តួចផ្តើមរបស់រាជរដ្ឋាភិបាល ដោយបានធ្វើកំណែទម្រង់លើវិស័យដីធ្លីជូនពលរដ្ឋ និងបានដាក់ចេញនូវយុទ្ធនាការវាស់វែងដីធ្លី ក្នុងគោលបំណងកាន់កាប់ដីធ្លីច្បាស់លាស់ មានសុវត្ថិភាព និងមានមូលដ្ឋានច្បាប់រឹងមាំ ដើម្បីធានាដល់ចរន្តការឯកសារ ការគ្រប់គ្រប់ បច្ចុប្បន្នភាពព័ត៌មានដីធ្លី ជាប្រយោជន៍របស់ប្រជាពលរដ្ឋ។

ក្រោមការអនុវត្តកិច្ចសហប្រតិបត្តិការបច្ចេកទេសរបស់ក្រុមការងារគ្រប់គ្រងតំបន់វិនិច្ឆ័យ ជាមួយអាជ្ញាធរស្រុក ឃុំ ភូមិ និង​មានការចូលរួមយ៉ាងសកម្មរបស់ប្រជាពលរដ្ឋជាម្ចាស់ក្បាលដី មន្ទីររៀបចំដែនដី នគរូបនីយកម្ម សំណង់ និងសុរិយោ​ដីខេត្តក្រចេះ បានបន្តចេញនូវវិញ្ញាបនប័ត្រសម្គាល់ម្ចាស់អចលនវត្ថុ ជូនប្រជាពលរដ្ឋជាម្ចាស់ក្បាលដីចំនួន ០៤ ភូមិ គឺភូមិសេរីភាព ភូមិតាងួន ភូមិជួរជ្រៃ និងភូមិខ្នងខ្ពស់ សរុបចំនួន ១.៦៣៩ ប័ណ្ណ។

លោក ហេង សុថា អភិបាលរងខេត្តក្រចេះ​បាន​បញ្ជាក់ថា ដីធ្លីដែលបានចុះបញ្ជីមានប័ណ្ណកម្មសិទ្ធ គឺមានសុវត្ថិភាព និងជាមូលធនដ៏សំខាន់សម្រាប់កម្មសិទ្ធិករទាំងអស់ មានភាពងាយស្រួលក្នុងការយកទៅប្រើប្រាស់តាមសេចក្តីត្រូវការរបស់​បងប្អូន ដូចជា យកទៅលក់, ជួល, បញ្ចាំ. ធ្វើអំណោយ និងដើម្បីជាទុនក្នុងការប្រកបរបរចិញ្ចឹមជីវិតប្រចាំថ្ងៃ។

លោកបន្តថា ការចែកបណ្ណកម្មសិទ្ធជូនពលរដ្ឋនាពេលនេះ គឺជាការឆ្លុះបញ្ចាំងឱ្យឃើញអំពីការយកចិត្តទុកដាក់ខ្ពស់របស់រាជរដ្ឋាភិបាល ក្នុងការធានាកម្មសិទ្ធិដីធ្លីស្របច្បាប់ជូនប្រជាពលរដ្ឋ សំដៅលើកកម្ពស់ជីវភាព សុខុមាលភាព និងការកាត់បន្ថយភាពក្រីក្រ ព្រមទាំងរួមចំណែកដល់ការពង្រឹងយុត្តិធម៌ និងស្ថេរភាពសង្គម៕

អត្ថបទ៖ ប្រុញ វិធិន