ខណ្ឌព្រែកព្នៅ​មួយ​ខែ​ជាង ទើប​មាន​អ្នក​ឆ្លងកូវីដ១៩ លើកដំបូង ដោយ​សារ​អ្នក​ជំងឺ​ខល​ប្រាប់​គ្រូពេទ្យ

អាជ្ញាធរខណ្ឌព្រែកព្នៅបានសម្រេចបិទការចេញចូលលំនៅដ្ឋានប្រមាណជាង​១០គ្រួសារ ដែលស្ថិតនៅភូមិកណ្តាលសង្កាត់ព្រែកព្នៅ ខណ្ឌព្រែកព្នៅ បន្ទាប់ពីរកឃើញគ្រួសារមួយមានគ្នា៣នាក់មានវិជ្ជមានកូវីដ១៩រួចមក។

លោក ស៊ីម សុផង់ នាយករដ្ឋបាលខណ្ឌព្រែកព្នៅ បានមានប្រសាសន៍ថា រហូតមកដល់ពេលនេះនៅភូមសាស្ត្រខណ្ឌព្រែកព្នៅមានអ្នក​ឆ្លងជំងឺកូវីដ១៩ចំនួន៣នាក់ ជាស្ត្រីទាំងអស់នៅក្នុងគ្រួសារមួយ​ស្ថិតក្នុងភូមិកណ្តាល សង្កាត់ព្រែកព្នៅ។

ស្ត្រីទាំង៣ នាក់ ដែលឆ្លងជំងឺកូវីដ១៩នោះទី១ជាស្ត្រីខ្មែរអាយុ៦១ឆ្នាំ ទី២ស្ត្រីអាយុ៣៩ឆ្នាំនិងទី៣ជាកុមារីអាយុ១១ឆ្នាំរស់នៅភូមិកណ្តាលសង្កាត់ព្រែកព្នៅ។

លោកស៊ីម សុផង់ បន្តថា បន្ទាប់ពីមានការសង្ស័យថាមានឆ្លងជំងឺកូវីដ១៩ ស្ត្រីទាំង៣នាក់នោះ បានទូរសព្ទទៅកាន់គ្រូពេទ្យមកយកសំណាកទៅពិនិត្យរកកូវីដ១៩។ លុះដល់យប់ថ្ងៃទី៣០ខែមីនាឆ្នាំ២២០១ ខាងក្រសូងសុខាភិបាលបានប្រាប់មករដ្ឋបាលខណ្ឌថា មានករណីឆ្លងជំងឺកូវីដ១៩នៅខណ្ឌព្រែកព្នៅ។

«ពេលទទួលបានដំណឹងពីក្រសួងសុខាភិបាលភ្លាមធ្វើឲ្យរដ្ឋបាលខណ្ឌ មានការភ្ញាក់ផ្អើលយ៉ាងខ្លាំង ព្រោះខណ្ឌមិនដែលមានករណីឆ្លងជំងឺនេះពីមុនមកទេ»។

លោកបានបញ្ជាក់ថា បច្ចុប្បន្ននេះស្ត្រីទាំង៣នាក់នោះត្រូវបានបញ្ជួនទៅព្យាបាលជំងឺនៅមន្ទីរពេទ្យហ្លួងម៉ែរួចរាល់ហើយដែរ។ ចំពោះទីតាំងដែលមានករណីឆ្លងអាជ្ញាធរបានសម្រេចបិទការចេញចូលលំនៅដ្ឋាននៅម្តុំនោះប្រមាណជាជាង១០ផ្ទះដើម្បីឲ្យមន្ត្រីសុខាភិបាលយកសំណាកអ្នកជាប់ពាក់ព័ន្ធទៅធ្វើតេស្តរកកូវីដ១៩៕

អត្ថបទ៖ សំអឿន