ក្រសួងការងារ នឹងបន្តនាំក្រុមហ៊ុនចុះតាមបណ្តាខេត្តចំនួន១១បន្ថែមទៀត ដើម្បីផ្តល់ឱកាសការងារដល់ពលករទើបមកពីថៃ

លោក ស៊ុន មេសា អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍នៅព្រឹកថ្ងៃទី២២កក្កដានេះថា ថ្នាក់ដឹកនាំក្រសួងនឹងបន្តនាំក្រុមហ៊ុនរោងចក្រសហគ្រាសនានាចុះទៅតាមបណ្តាស្រុកចំនួន៣៨ នៃខេត្តចំនួន១១ បន្ថែមទៀតដើម្បីផ្តល់ឱកាសការងាររាប់ម៉ឺនកន្លែងជូនដល់ពលករដែលត្រឡប់មកពីប្រទេសថៃបន្ទាប់ពីបានចុះតាមស្រុកចំនួន១២ នៃខេត្តចំនួន៥រួចហើយនោះ។

លោកស៊ុនមេសាបានបន្តថា «យើងនឹងបន្តចុះទៅតាមបណ្តាខេត្តជាបន្តបន្ទាប់រហូតដើម្បីផ្តល់ឱកាសការងាររាប់ម៉ឺនកន្លែងជូនដល់ពលករវិលត្រឡប់មកពីប្រទេសថៃ ខណៈគិតត្រឹមថ្ងៃទី៩កក្តដា មានពលករចំនួន​ ១,៣ម៉ឺននាក់ហើយទទួលបានការងារធ្វើ»។

លោកបានបន្តទៀតថា ក្នុងការទទួលពលករវិលត្រឡប់មកពីប្រទេសថៃវិញក្រសួងការងារ បានអនុវត្តយន្តការចំនួន៣ គឺ ទី១.ការផ្តល់ឱកាសការងារជូនដល់ពួកគាត់នៅតាមបន្ទាត់ខ្សែព្រំដែនផ្ទាល់តែម្តង និងផ្តល់ព័ត៌មានពីតម្រូវការកម្លាំងពលកម្ម(ឧស្សាហកម្មច្រើនជាងគេបំផុត) ។ប្រសិនបើពលករខ្មែរមិនទាន់ទទួលបានឱកាសការងារនៅព្រំដែនទេ ដោយពួកគាត់ប្រញាប់ប្រញាល់ទៅជួបជុំបងប្អូនវិញនៅស្រុកកំណើតរបស់ខ្លួន ក្រសួង មានយន្តការស្វែងរកការងារបន្ថែមជូនដល់ពួកគាត់ ដោយនាំយករោងចក្រសហគ្រាសទៅដល់មូលដ្ឋានតែម្ដង។ ទី២ព័ត៌មានស្តីពីការបណ្តុះបណ្តាលជំនាញនិងទី៣ ព័ត៌មានស្តីពីអត្ថប្រយោជន៍ប.ស.ស។

បើតាមលោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានឱ្យដឹងថា ការចុះជួបផ្ទាល់នៅតាមមូលដ្ឋានជាមួយពលករខ្មែរត្រឡប់មកពីថៃនេះ គឺអនុវត្តទៅតាមការចង្អុលណែនាំរបស់ សម្តេចធិបតី ហ៊ុន ម៉ាណែត ឱ្យក្រសួងសហការជាមួយអាជ្ញាធរមូលដ្ឋាន ចុះតាមស្រុកភូមិបន្ថែមទៀត ដើម្បីសាកសួរព័ត៌មានពលករដែលទើប​វិលត្រឡប់ទៅស្រុកកំណើត តើគាត់ចង់រៀនជំនាញបន្ថែម ឬចង់ស្វែងរកការងារធ្វើ ដើម្បីធានាថា​ ពលករខ្មែរមិនមានបញ្ហា ក្រោយវិលត្រឡប់មកពីថៃ។

គួរបញ្ជាក់ថា ដំណាក់ទី១ថ្នាក់ដឹកនាំក្រសួងបាននាំក្រុមហ៊ុនរោងចក្រសហគ្រាសនានាចុះតាមស្រុកចំនួន១២នៃខេត្តចំនួន៥រួមមានខេត្តកំពង់ចាម បន្ទាយមានជ័យ សៀមរាប ព្រៃវែង និងបាត់ដំបង ដែលមានពលករ​វិលត្រឡប់មកពីប្រទេសថៃច្រើន។ ដំណាក់កាលបន្ទាប់ចុះតាមស្រុកចំនួន៣៨នៃខេត្តចំនួន១១រួមមានខេត្តកំពងចាម កំពង់ធំ បាត់ដំបង បន្ទាយមានជ័យ ស្វាយរៀង ពោធិ៍សាត់ កំពត សៀមរាប កណ្តាល កំពង់ឆ្នាំង និងខេត្តកំពង់ស្ពឺ៕

អត្ថបទ៖ សំអឿន