គ្រូពេទ្យ ១៧ នាក់ ពាក់ព័ន្ធអ្នកជំងឺ​កូវីដ​១៩​​ តេស្ត​លើកទីមួយ អវិជ្ជមាន​

ក្រុមគ្រូពេទ្យចំនួន១៧នាក់ ដែលមានជាប់ពាក់ព័ន្ធជាមួយអ្នកជំងឺកូវីដ១៩ ទទួលបានលទ្ធផលតេស្តអវិជ្ជមានលើក​ទី១ និង​កំពុងរង់ចាំលទ្ធផលជាលើកទី២ជាបន្តទៀត។

លោក វេជ្ជបណ្ឌិត កែរ រដ្ឋា ប្រធានមន្ទីរសុខាភិបាលខេត្តស្វាយរៀងបានមានប្រសាសន៍ នៅរសៀលថ្ងៃទី០៤មេសានេះថា ក្រុមគ្រូពេទ្យចំនួន១៧នាក់ ពាក់ព័ន្ធជាមួយអ្នកជំងឺកូវីដ១៩ ទទួលបានលទ្ធផលតេស្តលើកទី១អវិជ្ជមានហើយលើកទី២នៅមិនទាន់បានទទួលលទ្ធផលនៅឡើយទេ។

«ផ្ញើទៅយូរដែរហើយ៣ទៅ៤ថ្ងៃហើយ ព្រោះជាធម្មតាលើកទី២អីចឹងភាគច្រើនគេមិនទាន់ប្រញាប់មើលលទ្ធផលទេ ព្រោះបើទោះបីជាបានលទ្ធផល ក៏ត្រូវបន្តធ្វើចត្តាឡីស័កដដែល។ អ្វីដែលសំខាន់គេមើលអាថ្មីៗបន្ទាន់ៗ ដើម្បីចាប់យកអ្នកវិជ្ជមានឲ្យបានភ្លាមៗកុំឲ្យទៅចម្លងគេផ្សេងទៀត»។ លោក​បញ្ជាក់​យ៉ាង​ដូច្នេះ។

ប្រធាន​មន្ទីរ​សុខាភិបាលខេត្ត​ស្វាយរៀង​ធ្វើការសន្និដ្ឋានថា ប្រសិនបើលទ្ធផលវិជ្ជមាននោះ ក្រសួងនឹងចេញភ្លាមៗមុនប្រកាសចេញ​ជាផ្លូវការ ដើម្បីយកអ្នកទាំងនោះមកព្យាបាលទប់ស្កាត់ការចម្លងទៅអ្នកផ្សេងៗទៀត។

គួរ​បញ្ជាក់ថ​ា គិតត្រឹមព្រឹកថ្ងៃទី០៤ខែមេសានេះ ខេត្តស្វាយរៀងមានអ្នកជំងឺឆ្លងក្នុងព្រឹត្តិការណ៍សហគមន៍២០កម្ភៈចំនួន១០១នាក់ បញ្ជួនទៅព្យាបាលនៅភ្នំពេញ១នាក់ និងព្យាបាលជាសះស្បើយចំនួន២នាក់៕

អត្ថបទ៖ សំអឿន