សម្ដេចតេជោ ប្រកាសស្វាគមន៍ប្រធានមេធាវីបក្សភ្លើងទៀន ដែលស្នើចូលរួមនយោបាយជាមួយគណបក្សប្រជាជនកម្ពុជា

សម្ដេចតេជោ ហ៊ុន សែន ប្រធានគណបក្សប្រជាជនកម្ពុជា តាមរយៈប្រព័ន្ធតេឡេក្រាម បានប្រកាសស្វាគមន៍លោក​ សំ សុគង់។ ការប្រកាសស្វាគមន៍ដោយសម្ដេចតេជោនេះ គឺបន្ទាប់ពីលោក សំ សុគង់ បានបានសម្រេចចិត្តស្នើសុំចូលរួមជីវភាពនយោបាយជាមួយគណបក្សប្រជាជនកម្ពុជា។

សម្ដេចតេជោ បានសរសេរដូច្នេះថា៖ «ក្នុងនាមគណបក្សប្រជាជនកម្ពុជាខ្ញុំស្វាគមន៍យ៉ាងកក់ក្តៅចំពោះលោកមេធាវី សំ សុគង់ ដែលបានស្នើសុំមកចូលរួមជីវភាពនយោបាយជាមួយគណបក្សប្រជាជនកម្ពុជា។ សូមជូនពរលោកមេធាវី សំ សុគង់សូមជួបតែសេចក្តីសុខសេចក្តីចម្រើន»។

តាមរយៈលិខិតផ្លូវការមួយច្បាប់គោរពជូនសម្ដេចតេជោ ហ៊ុន សែន ប្រធានគណបក្សប្រជាជនកម្ពុជា ចុះថ្ងៃទី៦ ខែធ្នូ ឆ្នាំ ២០២៣ លោក សំ សុគង់ ប្រធានមេធាវីគណបក្សភ្លើងទៀន បានសម្រេចចិត្តស្នើសុំចូលរួមជីវភាពនយោបាយជាមួយគណបក្សប្រជាជនកម្ពុជា។

ការសម្រេចចិត្តដើរចេញពីបក្សភ្លើងទៀន ហើយប្រកាសសុំចូលរួមនយោបាយជាមួយគណបក្សប្រជាជនកម្ពុជាពេលនេះ ត្រូវបានលោក សំ សុគង់ អះអាងថា គឺដោយសារមើលឃើញអំពីគុណបំណាច់ដ៏ធំធេងរបស់សម្ដេចតេជោ ហ៊ុន សែន ដែលមានចំពោះជាតិ មាតុភូមិ និងប្រជាជនកម្ពុជា ជាពិសេសការស្វែងរកសន្ដិភាពជូនកម្ពុជា។

ម្យ៉ាងវិញទៀតនោះ លោក សំ សុគង់ ក៏បានអះអាងដែរថា ការសម្រេចចិត្តនេះ ក៏ដោយសារលោកមើលឃើញ និងពេញចិត្តយ៉ាងខ្លាំងចំពោះគោលនយោបាយ និងផែនការយុទ្ធសាស្ដ្ររបស់រាជរដ្ឋាភិបាល នីតិកាលថ្មីនេះ ក្រោមការដឹកនាំរបស់សម្ដេចធិបតី ហ៊ុន ម៉ាណែត ជានាយករដ្ឋមន្ដ្រី។ ហេតុដូច្នេះហើយ ទើបលោក សម្រេចចិត្តចូលរួមជាមួយគណបក្សប្រជាជនកម្ពុជាចាប់ពីពេលនេះតទៅ។

ជាមួយនឹងការប្រកាសចូលរួមជាមួយគណបក្សកាន់អំណាច លោក សំ សុគង់ ក៏បានប្រកាសថ្កោលទោសជាសាធារណៈចំពោះថ្នាក់ដឹកនាំគណបក្សប្រឆាំង ដែលតែងតែប្រើប្រាស់នូវពាក្យសម្ដីញុះញង់ ធ្វើឱ្យប៉ះពាល់ដល់ការអភិវឌ្ឍប្រទេសជាតិ ហើយលោក ក៏បានអំពាវនាវដល់អ្នកដែលគាំទ្រគណបក្សប្រឆាំងទាំងអស់ឱ្យមកចូលរួមជីវភាពនយោបាយជាមួយគណបក្សប្រជាជនកម្ពុជា ដើម្បីកសាងប្រទេសជាតិទៅថ្ងៃអនាគត។

គួរជម្រាបថា លោក សំ សុគង់ ជាមន្ត្រីជាន់ខ្ពស់មួយរូបរបស់គណបក្សភ្លើងទៀន ដោយលោក មានតួនាទីជាប្រធានមេធាវីគណបក្សភ្លើងទៀន សមាជិកអចិន្ត្រៃយ៍ ប្រធាននាយកដ្ឋាននីតិកម្ម និងកិច្ចការបោះឆ្នោត ប្រធានក្រុមការងារខេត្តព្រៃវែង និងជាបេក្ខជនព្រឹទ្ធសភារបស់គណបក្សភ្លើងទៀន មណ្ឌលខេត្តព្រៃវែង៕