នយោបាយ

សម្ដេចធិបតី៖ យើងមិនអាចឱ្យអ្នកឯងជាន់បានស្រេចតែចិត្តទេ!

បានផុស

៥៤ វិនាទី មុន

នៅ

ថ្ងៃអង្គារ ១៧ មិថុនា ២០២៥

ដោយ

នាយករដ្ឋមន្ត្រី សម្ដេចធិបតី ហ៊ុន ម៉ាណែត បានលើកឡើងថាកម្ពុជាឆ្លងកាត់សង្គ្រាមឆ្អែតឆ្អន់សង្គ្រាមហើយ ដូច្នេះទើបប្រើប្រាស់យន្តការច្បាប់អន្តរជាតិដើម្បីដោះស្រាយបញ្ហាជាមួយប្រទេសថៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងពិធីបិទមហាសន្និបាតវិសាមញ្ញកាយរិទ្ធិជាតិកម្ពុជា នៅវិទ្យាស្ថានជាតិអប់រំ នៅរសៀលថ្ងៃទី១៧ ខែមិថុនា ឆ្នាំ២០២៥នេះ សម្ដេចធិបតី ហ៊ុន ម៉ាណែត បានថ្លែងថាការយកបញ្ហាប្រាសាទតាមាន់ធំ តាមាន់តូច តាក្របី និងតំបន់មុំបីទៅតុលាការអន្តរជាតិគឺជាយន្តការដោះស្រាយដោយសន្ដិភាពដោយប្រើច្បាប់អន្តជាតិដើម្បីដោះស្រាយ មិនដូចជាការចង់ប្រើកម្លាំងបាយដើម្បីដោះស្រាយបញ្ហាដូចមេភូមិភាគ២របស់ថៃទេ។

ទោះជាយ៉ាងណាសម្ដេចថាកម្ពុជាជាប្រទេសអំណត់ ប្រទេសស្រលាញ់សន្ដិភាព តែក៏មិននៅឱ្យគេបន្តជាន់នោះដែរ ក្នុងពេលដែលបណ្ដឹងកំពុងដំណើរការ ករណីឈ្លានពានណាមួយនឹងត្រូវទទួលបានការតបតវិញជានិច្ច។

សម្ដេចថា៖ «ពិតណាស់ទំនាក់ទំនងមិត្តយើងនៅបន្តធ្វើប៉ុន្ដែបើមិត្តមិនគោរពយើងៗក៏មិនអាចឱ្យអ្នកឯងជាន់បានស្រេចតែចិត្តទេ។ រឿងបែបនេះគឺជារឿងពិតហើយប្រជាជាតិខ្មែរមួយយើងមិនអាចឱ្យគេមើលងាយទេហើយយើងអត់ខុសសោះ»។

សម្ដេចធិបតីបន្ថែមថាការឡើងទៅតុលាការយុត្តិធម៌អន្តរជាតិគឺជាដំណោះស្រាយដ៏ល្អបំផុត ហើយបើថៃអះអាងពីភាពត្រឹមត្រូវរបស់ខ្លួនសូមឡើងទៅតុលាការជាមួយគ្នាជាការស្រេច។

គួរឱ្យដឹងផងដែរថាកម្ពុជាបានដាក់បណ្ដឹងទៅកាន់តុលាការយុត្តិធម៌អន្តរជាតិនៅថ្ងៃទី១៥ ខែមិថុនា ឆ្នាំ២០២៥ ចំខួប៦៣ឆ្នាំដែលតុលាការយុត្តិធម៌អន្តរជាតិកាត់ក្ដីឱ្យកម្ពុជាឈ្នះក្ដីលើប្រទេសថៃករណីប្រាសាទព្រះវិហារ ដែលសម្ដេចធិបតីចាត់ទុកជាប្រផ្នូលល្អសម្រាប់កម្ពុជា។

ក្នុងសេចក្ដីប្រកាសព័ត៌មានកាលពីយប់ថ្ងៃទី១៥ ខែមិថុនា ឆ្នាំ២០២៥ ក្រសួងការបរទេសថៃបានបង្ហាញការខកចិត្តដែលកម្ពុជាសម្រេចប្ដឹងទៅ ICJ ដោយមិនសហការជាមួយខ្លួនក្នុងការដោះស្រាយតាមយន្តការទ្វេរភាគីរវាងប្រទេសទាំងពីរ។

ក្នុងសេចក្ដីប្រកាសនោះសរសេរថា៖ «ប្រទេសថៃមានការខកចិត្តដែលកម្ពុជាបានបិទទ្វារមិនចរចារដោយសន្ដិភាពលើចំណុចទាំង៤នេះ»។

អ្នកតាមដានភូមិសាស្ត្រនយោបាយ លោកបណ្ឌិត ជ័យ តិច ធ្លាប់លើកឡើងប្រាប់កម្ពុជាថ្មីថាការដែលថៃមិនចង់យកករណីព្រំដែនទៅតុលាការយុត្តិធម៌អន្តរជាតិព្រោះថៃដឹងថាខ្លួននឹងមិនអាចឈ្នះក្ដីនេះទេ។ លោកថាការពិនិត្យរបស់តុលាការយុត្តធម៌អន្តរជាតិគឺទៅលើឯកសារភស្ភុតាង និងកិច្ចព្រមព្រៀងព្រំដែនដែលថៃខ្លួនឯងចុះហត្ថលេខាទទួលស្គាល់ និងត្រូវបានដាក់តម្កល់នៅអង្គការសហប្រជាជាតិមិនមែនជាឯកសារដែលថៃគូសដោយខ្លួនឯងនោះទេ។

បញ្ហាព្រំដែនចំណុចប្រាសាទតាមាន់តូច តាមាន់ធំ តាក្របី និងតំបន់មុំ៣ បានក្លាយជាបញ្ហារកាំរកូសរវាងកងទ័ពថៃ និងកម្ពុជាមកជាយូរមកហើយ រហូតមានការឈ្លានពានឆ្មក់ចូលមកបាញ់សម្លាប់ទាហានខ្មែរម្នាក់កាលពីព្រឹកថ្ងៃទី២៨ ខែឧសភា ដែលធ្វើឱ្យស្ថានការណ៍ព្រំដែនកាន់តែកើនកម្ដៅបន្ថែមទៀត។

ស្ថានភាពកាន់តែក្ដៅឡើងបន្ថែមទៀតក្រោយថៃបិទព្រំដែនដោយឯកតោភាគី និងគំរាមកាត់ផ្ដាច់ភ្លើង និងអ៊ីនធើណិត ហើយកម្ពុជាបានសម្រេចបញ្ឈប់ការប្រើប្រាស់អ៊ីនធើណិតពីថៃ និងបានបិទច្រកដូងជាការឆ្លើយតបផងដែរ ខណៈប្រមុខរដ្ឋាភិបាលនិងប្រធានព្រឹទ្ធសភា បានបន្តអំពាវនាវឱ្យពលរដ្ឋខ្មែរដែលរស់នៅប្រទេសថៃត្រលប់មកកាន់កម្ពុជាវិញ ស្របពេលដែលបណ្ដឹងដាក់ទៅ ICJ នៅថ្ងៃទី១៥ ខែមិថុនា៕