ក្រុមអ្នកទោសដែលរំដោះចេញពីតុលាការខេត្តស្វាយរៀង ត្រូវសមត្ថកិច្ចតាមចាប់បានទាំងអស់វិញហើយ

គិតមកដល់ល្ងាចថ្ងៃទី១៨ ខែវិច្ឆិកា ឆ្នាំ២០២៥នេះ កម្លាំងនគរបាលបានតាមចាប់ខ្លួនក្រុមអ្នកទោសដែលត្រូវបានរំដោះចេញពីតុលាការខេត្តស្វាយរៀង ទាំងអស់មកវិញហើយ ក្នុងនោះក៏មានស្ត្រីម្នាក់ដែលបានចូលទៅរំដោះផងដែរ។

គូររំលឹកថា កាលពីព្រឹកថ្ងៃទី១៨ ខែវិច្ឆិកា ឆ្នាំ២០២៥នេះ ក្រុមអ្នកទោសចំនួន៦នាក់ត្រូវបានក្រុមឧក្រិដ្ឋជនចូលទៅបាញ់រំដោះចេញពីសាលាដំបូងខេត្តស្វាយរៀង ដោយមធ្យោបាយរថយន្ដមួយគ្រឿង ពណ៌ខ្មៅ ពាក់ស្លាកលេខ ភ្នំពេញ 2CA-0692 រួចគេចខ្លួនបាត់ដោយសុវត្ថិភាព។ លុះដល់វេលាម៉ោងប្រហែល១១ព្រឹក ថ្ងៃដដែល ជនសង្ស័យម្នាក់ក្នុងចំណោមបក្ខពួកត្រូវបានកម្លាំងសមត្ថកិច្ចតាមចាប់ខ្លួនបាននៅចំនុចភូមិតាលៀន ស្រុកស្វាយទាប ខេត្តស្វាយរៀង រួមទាំងរថយន្ដផងដែរ។

តាមរយៈរូបភាពពីកាមេរ៉ាសុវត្ថិភាពរបស់សាលាដំពុងខេត្តស្វាយរៀង មុនឈានដល់ការរំដោះក្រុមអ្នកទោស មានស្ត្រីម្នាក់បានដើរចូលមកក្នុងបរិវេណសាលាដំបូងខេត្តស្វាយរៀង ហើយក្រោយក្រុមអ្នកទោសចុះពីរថយន្ដដែលត្រូវសមត្ថកិច្ចដឹកចូលក្នុងបរិវេណដើម្បីយកទៅកាត់ ស្ត្រីសង្ស័យក៏បានហុចកាំភ្លើងដែលលាក់ទុកខ្លួនឲ្យទៅអ្នកទោសម្នាក់ រួចក៏បើកការបាញ់ប្រហារទៅលើក្រុមសមត្ថកិច្ច និងនាំគ្នារត់គេចខ្លួនតែម្ដង។

តាមការបញ្ជាក់ពីអគ្គនាយកដ្ឋានពន្ធនាគារ នារសៀលថ្ងៃទី១៨វិច្ឆិកានេះដែរ ក្រុមអ្នកទោសដែលត្រូវបានរំដោះចេញពីសាលាដំបូងខេត្តស្វាយរៀង គឺជាប់ពាក់ព័ន្ធករណីគ្រឿងញៀន និងបទកាន់កាប់អាវុធខុសច្បាប់៕