គ្រោះថ្នាក់​​រថយន្ដបុកគ្នា​តាម​ផ្លូវជាតិ​លេខ ៧ ស្លាប់​ម​នុស្សចំនួន ០២នាក់ និងរបួសស្រាល ០១​នាក់

នាវេលាម៉ោង ០៥:០០នាទី ថ្ងៃទី២៧ ខែកុម្ភៈ ឆ្នាំ២០២៦ មានករណីគ្រោះថ្នាក់ចរាចរណ៍មួយបង្កឡើងរវាងម៉ាក FORD RANGER RAPTOR បុករថយន្តម៉ាកស៊ាំយ៉ុងដឹកបន្លែ បណ្ដាលឲ្យស្លាប់មនុស្សចំនួន ០២នាក់ (ប្រុស) និងរបួសស្រាល ០១នាក់ (ប្រុស) នៅលើផ្លូវជាតិលេខ ៧ (ក្រចេះ-ស្ទឹងត្រែង) ចន្លោះបង្គោល​គីឡូម៉ែត្រលេខ ៤១៨-៤១៩ ត្រង់ចំណុច ភូមិអូរព្រះ ឃុំអូរកណ្ដៀរសែនជ័យ ស្រុក​អូរគ្រៀង​សែន​ជ័យ ខេត្តក្រចេះ។

ប្រភពពីសមត្ថកិច្ច បានឱ្យដឹងថា ករណីគ្រោះថ្នាក់ចរាចរខាងលើ បង្កឡើងដោយរថយន្ដម៉ាក FORD RANGER RAPTOR ពណ៌ស ពាក់ផ្លាកលេខ កម្ពុជា DEY.7878 បើកបរដោយឈ្មោះ ដាំ ពិទូ ភេទប្រុស អាយុ ៣១ ឆ្នាំ (ស្លាប់នៅហ្នឹងកន្លែងកើតហេតុ) មានទីលំនៅ ភូមិកណ្ដាល សង្កាត់ស្ទឹងត្រែង ក្រុងស្ទឹង​ត្រែង ខេត្តស្ទឹងត្រែង ធ្វើដំណើរពីទិសខាងជើងទៅទិសខាងត្បូងក្នុងល្បឿនលឿន លុះដល់ចំណុចកើតហេតុផ្លូវកោងខ្លាំង បានរេចង្កូតទៅបុករថយន្ដមួយគ្រឿងម៉ាកស៊ាំយ៉ុង ពណ៌ស ពាក់ផ្លាកលេខ ភ្នំពេញ 2AK-2912 ដែលធ្វើដំណើរក្នុងទិសដៅបញ្រ្ចាសគ្នា បើកបរដោយឈ្មោះ ងួន កេត ភេទប្រុស អាយុ ២២ឆ្នាំ (ស្លាប់នៅហ្នឹងកន្លែងកើតហេតុ) មានទីលំនៅបច្ចុប្បន្ន ភូមិផ្កាក្ងោក ឃុំតាំងចាម ស្រុកថាឡាបរិវ៉ាត់ ខេត្តស្ទឹងត្រែង និងមានអ្នករួមដំណើរ ០១នាក់ ឈ្មោះ ជួន សុខនៅ ភេទប្រុស អាយុ ៣៧ឆ្នាំ មានទីលំនៅភូមិព្រែករការ ឃុំសោប ស្រុកព្រែកប្រសព្វ ខេត្តក្រចេះ (រងរបួសស្រាល)។

សពត្រូវបានសមត្ថកិច្ចជំនាញប្រគល់ទៅឲ្យក្រុមគ្រួសារយកទៅធ្វើបុណ្យតាមប្រពៃណី រីឯវត្ថុតាង​រថយន្ដ​ខូច​ធ្ងន់ ០២ គ្រឿង ត្រូវបានយកមករក្សាទុកជាបណ្តោះអាសន្ននៅអធិការដ្ឋាននគរបាលស្រុក​អូរគ្រៀងសែនជ័យ។

សមត្ថកិច្ច បានបញ្ជាក់ថា មូលហេតុដែលបណ្តាលឱ្យកើតមានគ្រោះថ្នាក់ចរាចរខាងលើនេះ គឺបណ្តាលមកពី ល្បឿនល្បឿន៕

អត្ថបទ៖ ប្រុញ វិធិន