គណៈបញ្ជាការឯកភាពរាជធានី បន្តចុះបង្ក្រាប Online Scams នៅខណ្ឌ៧មករា ឃាត់ជនជាតិឥណ្ឌូនេស៊ី៥៥នាក់ 

ភ្នំពេញ ៖ កម្លាំងគណៈបញ្ជាការឯកភាពរាជធានីភ្នំពេញ បានបន្តប្រតិបត្តិការឆ្មក់ចុះបង្ក្រាបទីតាំងឆបោកតាមប្រព័ន្ធបច្ចេកវិទ្យាOnline Scams នៅចំណុចសណ្ឋាគារ ប៊ីផ្លិស អគារលេខ៥៥ ផ្លូវលេខ ១១៣ ភូមិ២ សង្កាត់បឹងព្រលិត ខណ្ឌ៧មករា កាលពីវេលារសៀលថ្ងៃទី០៩ ខែឧសភា ឆ្នាំ២០២៦ ។ 

ប្រតិបត្តិការនេះ ធ្វើឡើងក្រោមការដឹកនាំបញ្ជាផ្ទាល់ដោយលោក ឃួង ស្រេង ប្រធានគណៈបញ្ជាការឯកភាពរាជធានីភ្នំពេញ និងលោកឧត្តមសេនីយ៍ឯក ជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ និងក្រោមការសម្របសម្រួលនីតិវិធីច្បាប់ដោយលោកស្រីភី ស៊ីថន ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ ផងដែរ ។ 

ជាលទ្ធផល នៃប្រតិបត្តិការ កម្លាំងអាជ្ញាធរចម្រុះ បានឃាត់ខ្លួនជនបរទេស ជាជនជាតិឥណ្ឌូនេស៊ី ៥៥នាក់ និងបានដកហូតវត្ថុតាងពាក់ព័ន្ធរួមមាន ៖ ទូរស័ព្ទដៃចំនួន ២៨០គ្រឿង

, Latop ០៨គ្រឿង , លិខិតឆ្លងដែនឥណ្ឌូនេស៊ី ចំនួន៣០ច្បាប់ , រថយន្តម៉ាក ALPHRAD ពណ៌ខ្មៅ ផ្លាកលេខ ភ្នំពេញ 2CC-3190។

ផ្អែកតាមលទ្ធផលកោសល្យវិច្ច័យរបស់ក្រុមមន្ត្រីជំនាញ បានរកឃើញថា ៖ ក្រុមជនសង្ស័យបានប្រើប្រាស់កម្ពុជាជាកន្លែងជ្រកកោន ប្រព្រឹត្តបទល្មើស ឆបោកតាមប្រព័ន្ធអនឡាញ (Online scam ) ក្រោមរូបភាពលួងលោមអូសទាញបែបស្នេហា(Romance scams) ដែលជនរងគ្រោះនៅប្រទេសឥណ្ឌូនេស៊ី ។

បច្ចុប្បន្ន ជនសង្ស័យទាំង៥៥នាក់ ត្រូវបានបញ្ចូនខ្លួនទៅកាន់ស្នងការដ្ឋាននគរបាលរាជធានីភ្នំពេញ ដើម្បីចាត់វិធានការទៅតាមផ្លូវច្បាប់ ៕ 

អត្ថបទ៖ សុភា