ខឹងម្ដាយក្មេកចង់បំបែកប្រពន្ធឲ្យទៅយកប្ដីថ្មី យកកាំបិតចាក់រងរបួសភ្នែកម្ខាង

បុរសជាជនដៃដល់ម្នាក់ ត្រូវបានកម្លាំងនគរបាលព្រហ្មទណ្ឌ នៃអធិការដ្ឋាននគរបាលស្រុកស្នួល ខេត្តក្រចេះ ចុះធ្វើការចាប់ខ្លួនភ្លាមៗ បន្ទាប់ពីធ្វើសកម្មភាពយកកាំបិតចាក់លើស្រ្តីរងគ្រោះ​ជាម្តាយក្មេក បណ្តាលឲ្យរបួសធ្ងន់ធ្ងរចំភ្នែកខាងឆ្វេង។

ការឃាត់ខ្លួននេះបានធ្វើឡើងកាលពីព្រលប់ថ្ងៃទី ២៥ ខែឧសភា ឆ្នាំ ២០២២ នៅចំណុចដំណាក់ស្តេច ស្ថិតនៅភូមិព្រែកក្តី ឃុំស្នួល ស្រុកស្នួល ខេត្តក្រចេះ។

របាយការណ៍សមត្ថកិច្ចបានឲ្យដឹងថា ដើមចមដែលឈានដល់មានរឿងនេះ ដោយសារតែបុរសដៃដល់ជាកូនប្រសាខឹងស្រ្តីរងគ្រោះជាម្តាយក្មេក ថាមានចេតនាចង់បំបែកប្រពន្ធរបស់ខ្លួនចេញពីរូបខ្លួនឲ្យទៅយកប្តីថ្មី។

ក្នុងរបាយការណ៍បានបញ្ជាក់ថា ជនដៃដល់មានឈ្មោះ រឹម សុផា (ហៅជាង ម៉ៅ) អាយុ ៣៦ ឆ្នាំ រស់នៅភូមិ-ឃុំកើតហេតុខាងលើ។ ចំណែកឯស្រ្តីរងគ្រោះជាម្តាយក្មេកឈ្មោះ លឹម រ៉េត ភេទស្រី អាយុ ៥៣ ឆ្នាំ រស់នៅភូមិ-ឃុំជាមួយគ្នា។

ក្រោយឃាត់ខ្លួន សមត្ថកិច្ចបានដកហូតវត្ថុតាងមួយចំនួនរួមមាន កូនកាំបិតចុងស្រួចចំនួន ១ និងអាវុធកែច្នៃខុសច្បាប់មួយដើម និងបញ្ជូនមកអធិការដ្ឋាននគរបាលស្រុកស្នួល ដើម្បីកសាងសំណុំរឿងបញ្ជូនបន្តចាត់ការតាមផ្លូវច្បាប់៕

អត្ថបទ ៖ សុខុម