តុលាការខេត្តកំពត បង្គាប់ឲ្យឃុំខ្លួនមន្ត្រីនគរបាល​ដែលគប់កែវស្រាលើអ្នកចាប់ទឹកកកដាក់ពន្ធនាគារ

ចៅក្រមស៊ើបសួរ នៃសាលាដំបូងខេត្តកំពត លោក សេង ម៉ាឡាប នៅថ្ងៃទី២៤ ខែមេសា ឆ្នាំ២០២៦នេះ បានចេញដីការបង្គាប់ឲ្យឃុំខ្លួនជនត្រូវចោទឈ្មោះ ទេព សុខផេង មន្ត្រីនគរបាលនៃអធិការដ្ឋាននគរបាលក្រុងកំពត​ឲ្យជាប់ពន្ធនាគារបណ្ដោះអាសន្នក្រោមបទ ហិង្សាដោយចេតនាមានស្ថានទម្ងន់ទោស និងប្រើប្រាស់ដោយខុសច្បាប់នូវសារធាតុញៀន។ ជនត្រូវចោទ ទេព សុខផេង ត្រូវបានចោទប្រកាន់ពីបទល្មើសព្រហ្មទណ្ឌដែលមានចែងឱ្យផ្តន្ទាទោសតាមបញ្ញត្តិមាត្រា ២១៨ នៃក្រមព្រហ្មទណ្ឌ និងមាត្រា ៤៥ នៃច្បាប់ស្តីពីការត្រួតពិនិត្យគ្រឿងញៀន។

គួររំលឹកថា កាលពីវេលាម៉ោង១១យប់ ថ្ងៃទី១៩ ខែមេសា ឆ្នាំ២០២៦ ជនសង្ស័យឈ្មោះ ទេព សុខផេង បានគប់កែវស្រាលើស្ត្រីអ្នកបម្រើសេវាកម្មចាប់ទឹកកកម្នាក់ឈ្មោះ ថា ទិត្យធូ នៅចំណុចភូមិអណ្ដូងខ្មែរ សង្កាត់អណ្ដូងខ្មែរ ក្រុងកំពត ខេត្តកំពត បណ្ដាលឲ្យស្ត្រីរងគ្រោះរងរបួសធ្ងន់ត្រូវបានក្រុមការងារបញ្ជូនទៅសង្គ្រោះនៅមន្ទីរពេទ្យ។

តាមប្រភពពីសាច់ញាតិជនរងគ្រោះ ក្រោយពីកើតហេតុ ភាគីជនរងគ្រោះត្រូវជនបង្កសម្របសម្រួលឱ្យជនរងគ្រោះទទួលសំណងដើម្បីបញ្ចប់រឿងចំនួន ២លាន ៥០ម៉ឺនរៀលដែរតែខាងជនរងគ្រោះមិនព្រម។

លោកឧត្ដមសេនីយ៍ទោ ម៉ៅ ច័ន្ទមធុរិទ្ធ ស្នងការនៃស្នងការដ្ឋាននគរបាលខេត្តកំពត កាលព្រឹកថ្ងៃទី២១ ខែមេសា បានបង្ហោះសារនៅលើទំព័រហ្វេសប៊ុករបស់ខ្លួនដោយសង្កត់ធ្ងន់ថា «មន្ត្រីជាអ្នកអនុវត្តច្បាប់ និងជាអ្នកបំរើប្រជាពលរដ្ឋដ៏ល្អ តែបើមន្ត្រីធុននេះ គឺមិនមាននៅក្នុងវចនានុក្រមរបស់ខ្ញុំនោះទេ។ មន្ត្រីដែលផឹកស៊ីហើយបានយកកែវគប់មកលើប្រជាពលរដ្ឋ នឹងត្រូវអនុវត្តទោសដោយគ្មានការលើកលែងជាដាច់ខាត»។

យោងតាមមាត្រា ២១៨ នៃក្រមព្រហ្មទណ្ឌ បានចែងថា អំពើហិង្សាដោយចេតនា ត្រូវផ្ដន្ទាទោសដាក់ពន្ធនាគារពី ២ឆ្នាំ ទៅ ៥ឆ្នាំ និងពិន័យជាប្រាក់ពី ៤លានរៀល ទៅ១០លានរៀល កាលបើអំពើហិង្សានេះបានប្រព្រឹត្តិ ១- ដោយមានការគិតទុកជាមុន ២-ដោយប្រើអាវុធ ឬគម្រាមកំហែងនឹងអាវុធ ៣-ដោយមានមនុស្សច្រើននាក់ក្នុងឋានៈជាចារី សហចារី អ្នកផ្ដើមគំនិត និងជាអ្នកសមគំនិត៕

អត្ថបទ៖ សុខុម