សង្ឃ ដូនជី បន្តបិណ្ឌបាត្រ និងអង្គាសបច្ច័យ តាមផ្សារ ខណៈក្រសួងបានប្រកាសហាមឃាត់

ខេត្តបន្ទាយមានជ័យ ក្រោយពីស្បើយជំងឺ កូវីដ-១៩ មក គេឃើញមាន សង្ឃជាច្រើនអង្គនិមន្តចេញបិណ្ឌបាត្រ ត្រាច់ចរ គ្រប់ច្រកល្ហក ពិសេសក្នុងផ្សារ ក្នុងនោះក៏មានស្ត្រីវ័យចំណាស់ស្លៀកពាក់ស ដូចដូនជីមួយចំនួនកាន់ក្រដាសកម្មវិធីបុណ្យ (ប្រូក្រាម) និងផ្តិលដើរអង្គាសបច្ច័យតាមផ្ទះ និងតាមផ្សារ ហើយអះអាងថាយកទៅកសាងវត្ត ដោយប្រជាពលរដ្ឋមិនដឹងថា ដូនជី សង្ឃពិតប្រាកដ ឬក្លែងក្លាយនោះទេ។

លោក សេង សុមុនី រដ្ឋលេខាធិការ និងជាអ្នកនាំពាក្យក្រសួងធម្មការ និងសាសនា បានអំពាវនាវដល់ព្រះសង្ឈ លោកអាចារ្យ ដូនជី បញ្ឈប់សកម្មភាព ដើររៃអង្គាសបច្ច័យនៅតាមផ្លូវសាធារណៈ និងទីប្រជុំជន នៅក្នុងពិធី​បុណ្យកឋិនទាន ដែលនឹងចូលមកដល់នៅថ្ងៃទី១១ តុលាឆ្នាំ២០២២។

កន្លងមកថ្មីៗនេះ ក្រសួងធម្មការ និងសាសនា បានចេញសេចក្តីប្រកាស សង្ឃ និងដូនជីត្រូវបញ្ឃប់រាល់សកម្មភាពដើរត្រាច់ចរគ្រប់ច្រកល្ហក បិណ្ឌបាត្រ ឬរៃអង្គាសបច្ច័យតាមទីផ្សារ ពិសេសពេលរដូវបុណ្យទានមកដល់ ដោយពុំអនុញ្ញាត ព្រះសង្ឃ លោកអាចារ្យ ដូនជី ធ្វើសកម្មភាពរៃអង្គាសបច្ច័យនៅតាមផ្លូវសាធារណៈ និងទីប្រជុំជន នៅក្នុងរដូវបុណ្យកឋិនទាននោះឡើយ ពិសេសដើរចែកក្រដាសកម្មវិធីបុណ្យ តាមផ្ទះ នៅតាមផ្សារ ឬតាមរោងចក្រ ដែលមានមនុស្សប្រមូលផ្តុំច្រើន ព្រោះវាប៉ះពាល់ដល់វិន័យសង្ឃ មិនគាប់ភ្នែកមហាជន និងធ្វើឱ្យបាត់បង់ជំនឿពីពុទ្ធបរិស័ទដែលជាអ្នកកាន់ព្រះពុទ្ធសាសនា។

លោក សេង សុមុនី រដ្ឋលេខាធិការ និងជាអ្នកនាំពាក្យក្រសួងធម្មការ និងសាសនា បានលើកឡើងថា ទោះបីជាមានការផ្សព្វផ្សាយ និងបានប្រកាសតាមរយៈគណៈសង្ឃទាំងពីរគណៈក៏ដោយ ក៏មានព្រះសង្ឃ លោកអាចា្យ និងដូនជី មួយចំនួនតូចនៅតែបន្តធ្វើសកម្មភាព ដើរបិណ្ឌបាត្រឬរៃអង្គាស បច្ច័យតាមផ្ទះ តាមទីផ្សារ ទីប្រជុំជន និងតាមរោងចក្រ ដែលទង្វើនេះធ្វើឱ្យបាត់បង់សណ្តាប់ធ្នាប់របៀបរៀបរយសង្គម និងកិត្តិយសព្រះពុទ្ធសាសនាយ៉ាងខ្លាំង។ ក្រសួងធម្មការ និងសាសនា សំណូមពរដល់ព្រះសង្ឃ គណៈកម្មការវត្ត លោកអាចារ្យ តាជី យាយជី ត្រូវរៀបព្រះកាយ និងរៀបចំខ្លួន ដើម្បីពង្រឹងការប្រតិបត្តិសន្ធាពុទ្ធបរិស័ទឱ្យបានត្រឹមត្រូវ តាមពុទ្ធានុញ្ញាត ហើយសូមចៀសឱ្យបាននូវភាពអវិជ្ជមាន ដែលធ្វើឱ្យបាត់បង់សន្ធាជ្រះថ្លារបស់ពុទ្ធបរិស័ទ។

គួរបញ្ជាក់ថា ពិធីបុណ្យកឋិនទានមានរយ:ពេល ២៩ថ្ងៃ ប្រព្រឹត្តទៅចាប់ពីថ្ងៃ១រោច ខែអស្សុជ ដល់​ថ្ងៃ១៥កើត ខែកត្តិក ដោយត្រូវនឹងថ្ងៃទី១១ ខែតុលា ដល់ថ្ងៃទី៨ ខែវិច្ឆិកា ឆ្នាំ២០២២៕

អត្ថបទ៖ វ៉ាន់ណាង