ភ្នាក់ងារទេសចរណ៍ប្រាសាទអង្គរវត្ត ប្រគល់កាបូបមានវត្ថុមានតម្លៃមួយចំនួន ជូនភ្ញៀវវិញ

ភ្នាក់ងារទេសចរណ៍ប្រចាំការនៅគោលដៅប្រាសាទអង្គរវត្ត បានប្រទះឃើញការបូបរបស់ភ្ញៀវដែលបានភ្លេច និងបានរក្សាទុកប្រគល់ជូនម្ចាស់ដើមវិញ។ នេះបើតាមការផ្ដល់ព័ត៌មានពី អាជ្ញាធរជាតិអប្សរា នៅរសៀលនេះ។

នៅថ្ងៃទី៩ ខែកញ្ញា ឆ្នាំ២០២៣នេះ វេលាម៉ោង ១១ និង៥១នាទីថ្ងៃត្រង់ ក្រុមការងារភ្នាក់ងារទេសចរណ៍ប្រចាំការនៅប្រាសាទអង្គរ បានប្រទះឃើញកាបូបស្ពាយចំហៀងពណ៌ខ្មៅមួយ ដែលភ្ញៀវទេចរបានភ្លេច នៅចំណុចលើរានហាល លុះប្រហែល ៣៥នាទីក្រោយមក ម្ចាស់កាបូបជាជនជាតិខ្មែរ ភេទស្រីម្នាក់ ឈ្មោះ ហុង ស្រីអូន រស់នៅភូមិរលៀក ឃុំតាអូ ស្រុកគិរីវង់ខេត្តតាកែវ ដែលជាម្ចាស់កាបូបបានមករកវិញ។

ក្នុងកាបូបនោះមាន៖ លុយខ្មែរ ចំនួន ៦០ ០០០រៀល លុយ វៀតណាម ១៩៥០០ដុង លុយឡាវ ១០០០គីបឡាវ លុយដុល្លារ ២ដុល្លារ កាតធនាគារ៣ អត្តសញ្ញាណប័ណ្ណមួយ កាត AEON មួយ កាត បសស. មួយ កាតធានារ៉ាប់រងមួយ និងទូរស័ព្ទ iphone១១ promax មួយគ្រឿង។

ដោយពិនិត្យឃើញថា ពិតជាកាបូបរបស់គាត់ និងមិនមានការបាត់បង់ហើយ ក្រុមភ្នាក់ងារបានសហការជាមួយក្រុមការងារសណ្ដាប់ធ្នាប់ និងនគរបាលបេតិកភណ្ឌ បានធ្វើការប្រគល់ជូនភ្ញៀវទេសចរវិញ នៅវេលាម៉ោង ១២ និង៣០នាទី៕