សន្តិសុខសង្គម

បុគ្គលម្នាក់យកឈ្មោះចៅហ្វាយខេត្តមកអន្តរាគមន៍ រឿងប្រហុកវៀតណាមចូលទឹកដីខេត្តតាកែវ

បានផុស

២ years មុន

នៅ

ថ្ងៃសៅរ៍ ១១ ឧសភា ២០២៤

ដោយ

តាកែវ ៖ ក្រោយបែកធ្លាយនិងមានការចុះផ្សាយព័ត៌មានឈ្មួញលួចលាក់នាំប្រហុកវៀតណាមចូលមកចែកចាយក្នុងខេត្តតាកែវ នៅថ្ងៃទី១០ ខែឧសភា ឆ្នាំ២០២៤នេះ មានជនម្នាក់តាំងខ្លួនជាអ្នកនៅជាមួយលោក អ៊ូច ភា អភិបាលខេត្តតាកែវ ហើយថា ចៅហ្វាយខេត្តសុំឲ្យលុបព័ត៌មាននេះជាបន្ទាន់បើមិនចង់មានរឿងក្តីក្តាំងទៅតុលាការ។

អាចថាបែកក្រឡទឹកត្រី ក៏ថាបាន ហើយខ្លាចធុំក្លិនមិនល្អដល់ថ្នាក់លើ បានជាមានជនអនាមិកម្នាក់តាំងខ្លួនជាអាជ្ញាធរខេត្តតាកែវ តែមិនបញ្ចេញឈ្មោះ ពិសេសថានៅអែបស្និតនិងចៅហ្វាយខេត្តគឺលោក អ៊ូច ភា ហើយគំរាមប្តឹងអ្នកសារព័ត៌មានណាដែលបានចុះផ្សាយរឿងនាំប្រហុកវៀតណាមចូលមកចែកចាយលក់នៅខេត្តតាកែវ។ នេះបើតាមការឆ្លើយឆ្លងតាមរយៈខ្សែទូរសព្ទជិត១នាទី រវាងអ្នកសារព័ត៌មាននិងជនអនាមិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សូមបញ្ជាក់ថា ថ្មីៗនេះ មានឈ្មួញនាំត្រីប្រហុកនាំចូលពីវៀតណាមតាមច្រកកំពង់ក្រសាំង ច្រកកំពង់ពិល ស្រុកបូរីជលសារ ច្រករបៀងស្រុកកោះអណ្តែត ដែលគេស្គាល់ថា ឈ្មោះ ងៀ ជាអ្នកដឹកចូលមកទាំងតោនៗក្នុងមួយថ្ងៃ នឹងលក់បន្តទៅឲ្យស្ត្រីម្នាក់ជាឈ្មួញកណ្ដាលឈ្មោះ ព្រឿង រស់នៅភូមិថ្មស ឃុំគោពោធិ៍ ស្រុបូរីជលសារ ជាអ្នកចែកចាយបន្តទៅតាមបណ្តាភូមិ ស្រុក ខេត្តផ្សេងៗដោយរលូន ដូចត្រូវដង ត្រូវផ្លែនិងអាជ្ញាធរ គ្រប់ជំនាញអស់ទៅហើយ។ តាមប្រភពច្បាស់ការណ៍មួយបន្តថា ឈ្មោះ ងៀ នាំចូលប្រហុកត្រីពីវៀតណាមក្នុងមួយគីឡូ តម្លៃ៣០០០ ទៅ៤០០០រៀល ហើយឈ្មួញកណ្តាលយកបោះបន្តទៀតក្នុងមួយគីឡូ៧០០០រៀលទៅ៨០០០រៀល ដឹកតាមម៉ូតូ ដឹកតាមឡានដើរលក់យ៉ាងអានាធិបតេយ្យពេញស្រុក ពេញប្រទេស ដោយមិនខ្លាចការប៉ះពាល់ដល់សុខភាពរបស់បងប្អូនប្រជាពលរដ្ឋឡើយ។

ហើយរឿងប្រហុកវៀតណាមនេះ កន្លងមកមន្ត្រីជំនាញ ក ប ប ខេត្តតាកែវ ក៏ដូចជាអាជ្ញាធរពាក់ព័ន្ធនានា បានធ្វើការបង្ក្រាបនឹងដុតបំផ្លាញចោលត្រីប្រហុកទាំងតោនៗបន្ទាប់ពីបង្ក្រាបបានហើយរកឃើញសារធាតុគីមីហាមឃាត់ដាក់លាយចូលលើប្រហុកត្រីដែលនាំចូលដោយខុសច្បាប់ពីប្រទេសវៀតណាម៕

ដោយ ៖ វីរៈ