កម្មកររ៉ែមាសម្នាក់របស់ក្រុមហ៊ុន សឹងយន្ត​គ័ង​យិក​ នៅខេត្តក្រចេះ ត្រូវថ្មបាក់សង្កត់ស្លាប់

កម្មកររ៉ែមាសម្នាក់ក្នុងចំណោម៦នាក់ របស់ក្រុមហ៊ុន សឹងយន្ត​គ័ង​យិក​ ត្រូវថ្មបាក់ធ្លាក់សង្កត់ពីលើនៅក្នុងរណ្ដៅរ៉ែមាស ខណៈដែលកំពុងអង្គុយសម្រាកយកកម្លាំង និងបានស្លាប់ពេលបញ្ជូនដល់មន្ទីរពេទ្យ។

ករណីនេះ បានកើតឡើងនៅវេលាម៉ោង៣និង៣០នាទី ទាបភ្លឺ ថ្ងៃទី១០ ខែកញ្ញា ឆ្នាំ២០២៤ នៅចំណុចរណ្ដៅទី១ ក្នុងក្រុមហ៊ុន សឹងយន្តគ័ងយិក ស្ថិតនៅក្នុងភូមិអូរត្រូន ឃុំក្បាលដំរី ស្រុកអូរគ្រៀងសែនជ័យ ខេត្តក្រចេះ។

ករណីបាក់ថ្មធ្លាក់សង្កត់មនុស្សស្លាប់នេះ ជនរងគ្រោះត្រូវបានគេស្គាល់ឈ្មោះ ផុន សារ៉ាន់ ភេទប្រុស អាយុ២៤ឆ្នាំ ជនជាតិខ្មែរ រស់នៅភូមិព្រែកទ្រព្យ ឃុំជលសា ស្រុកជលគីរី ខេត្ដកំពង់ឆ្នាំង។

យោងតាមប្រភពពីកន្លែងកើតហេតុ បានឲ្យដឹងថា នៅចំណុចរណ្ដៅទី១ ជាន់ទី១ ក្នុងក្រុមហ៊ុន សឹងយន្តគ័ងយិក មានជម្រៅប្រមាណជា ៣០០ម៉ែត្រ និងមានជម្រៅចុះក្រោម ជាន់ទី២ ប្រមាណជាង ៧០ម៉ែត្រ ហើយទីតាំងដែលជនរងគ្រោះជួបគ្រោះថ្នាក់ គឺនៅចំនុចជាន់ទី២ ខណៈដែលក្រុមកម្មករទាំង៦នាក់នោះ ចុះទៅកាយយកអាចម៍ដី ដែលមេការក្រុមហ៊ុនបានជីកបុកសម្អាតរួចរាល់។ លុះពេលពួកគេអស់កម្លាំងក៏ថយក្រោយអង្គុយសម្រាកយកកម្លាំង ស្រាប់តែពេលនោះ ថ្មដំបូលរណ្តៅកម្ពស់ ២ម៉ែត្រកន្លះ ក៏បានបាក់ធ្លាក់សង្កត់ពីលើជងរងគ្រោះ ឈ្មោះ ផុន សារ៉ាន់ ត្រូវត្រង់ចំចង្កេះ និងលើក្បាលជង្គង់ បណ្តាលឲ្យបែកផ្លោកនោម។

ក្រោយពេលកើតហេតុ ជនរងគ្រោះត្រូវបានខាងក្រុមហ៊ុន សឹងយន្តគ័ងយិក ដឹកយកទៅមន្ទីពេទ្យខេត្តក្រចេះ តែដោយស្ថានភាពធ្ងន់ធ្ងរពេកជនរងគ្រោះក៏បានស្លាប់នៅមន្ទីរពេទ្យខេត្តតែម្តង៕

អត្ថបទ៖ ប្រុញ វិធិន