ស្នងការខេត្តក្រចេះ​ ទទួល​ស្គាល់​​ពិតជាមានការបាញ់​សត្វគោ​ពលរដ្ឋ​ងាប់ នៅស្រុក​អូរគ្រៀង​សែនជ័យ 

ស្នងការនគរបាលខេត្តក្រចេះ បានចេញសេចក្តីបំភ្លឺព័ត៌មាននៅថ្ងៃនេះ ​ដោយ​ទទួលស្គាល់ពិត​ជា​មានករណី​ជនជាតិ​ចិន ចំនួន ៣ នាក់ បានធ្វើសកម្មភាព​បាញ់សត្វគោពលរដ្ឋ​បណ្តាលឲ្យងាប់ ១ ក្បាល នៅចំណុច​ក្រុមហ៊ុន​ចម្ការចេក​ឈ្មោះ ហ្គ្រីន អាយ លែន នៅ​ភូមិស្រែស្បូវ ឃុំក្បាលដំរី ស្រុកអូរគ្រៀងសែនជ័យ ខេត្តក្រចេះ កើតឡើងពិតប្រាកដ​មែន​។

ការចេញសេចក្តីបំភ្លឺព័ត៌មាននេះ ធ្វើឡើងក្រោយផ្ទុះករណីជនជាតិចិនចំនួន ៣ នាក់ នៅក្រុមហ៊ុន​ចម្ការចេក​ឈ្មោះ ហ្គ្រីន អាយ លែន ឬ Cambodian Banana Agriculture (CBA) បាន​ធ្វេីសកម្មភាពបាញ់សត្វគោក្របីរបស់​ពលរដ្ឋ​​យ៉ាងអាណាធិបតេយ្យ​ និងបម្រុងយកទៅកាប់សាច់ចែកគ្នាយកទៅធ្វេីម្ហូប។

ជនសង្ស័យទាំង ៣ ដែលសមត្ថកិច្ចកំពុង​ស្រាវជ្រាវចាប់ខ្លួន

ករណីខាងលើនេះ បានកេីតឡេីងនៅថ្ងៃ២៨ ខែកុម្ភៈ ឆ្នាំ២០២៥ នៅចំការក្រុមហ៊ុនចិន ហ្គ្រីន អាយ លែន ឬ Cambodian Banana Agriculture (CBA) ស្ថិតនៅក្នុងឃុំក្បាលដំរី ស្រុកអូរគ្រៀងសែនជ័យ ខេត្តក្រចេះ បណ្ដាលឱ្យងាប់គោចំនួន ១ ក្បាល បាញ់របួសរត់ចូលព្រៃបាត់ចំនួន ៣ ក្បាល និងបាញ់ត្រូវក្របីរងបួសចំនួន ៥​ក្បាលថែមទៀត។

ពាក់ព័ន្ធទៅនឹងករណី បើតាមស្នងការនគរបាលខេត្តក្រចេះ សមត្ថកិច្ចកំពុងធ្វើការស្រាវជ្រាវ​រក​ជន​សង្ស័យដើម្បី​​បន្ត​អនុវត្ត​តាមច្បាប់​​៕

អត្ថបទ៖ ប្រុញ វិធិន