ស្នងការរាជធានី ប្រកាសឲ្យជនរងគ្រោះមកដាក់ពាក្យបណ្ដឹង ករណីមានការផ្សព្វផ្សាយថាប៉ូលិស​កៀបស៊ីម៉ូតូ

ស្នងការនគរបាលរាជធានីភ្នំពេញ លោកឧត្ដមសេនីយ៍ឯក ជួន ណារិន្ទ នៅរសៀលថ្ងៃទី៥ ខែមិថុនា ឆ្នាំ២០២៥នេះ បានប្រកាសឲ្យជនរងគ្រោះមកដាក់ពាក្យបណ្ដឹង ពាក់ព័ន្ធករណីផ្សព្វផ្សាយថា មានសមត្ថកិច្ចពីររូបកៀបស៊ីម៉ូតូនៅមូលដ្ឋានខណ្ឌមានជ័យ។ ការប្រកាសរកជនរងគ្រោះនេះ បន្ទាប់ពីលោកបញ្ជាឲ្យកម្លាំជំនាញស្រាវជ្រាវ និងរកឃើញម៉ូតូចំនួន៣គ្រឿងយកមករក្សាទុកនៅអធិការខណ្ឌមានជ័យ ដើម្បីរកម្ចាស់មកទទួល និងដាក់ពាក្យបណ្ដឹង។

ជាមួយនឹងការប្រកាសរកជនរងគ្រោះឲ្យមកដាក់ពាក្យបណ្ដឹងនេះ លោកស្នងការក៏បានច្រានចោលពីការផ្សព្វផ្សាយមួយចំនួនដែលបានលើកឡើងថា សមត្តកិច្ចខណ្ឌមានជ័យ ៦នាក់កៀបស៊ីម៉ូតូប្រជាពលរដ្ឋពេលយប់។ លោក ជួន ណារិន្ទ ចាត់ទុកការផ្សព្វផ្សាយនេះ បានធ្វើឲ្យប៉ះពាល់ដល់កិត្តិយស សេចក្ដីថ្លៃថ្នូរដល់កម្លាំងរបស់លោក ហើយក៏ស្នើដល់អ្នកផ្សព្វផ្សាយត្រូវបង្ហាញភស្តុតាងជាក់លាក់ មុនផ្សាយត្រូវប្រមូលព័ត៌មានច្បាស់លាស់។

បើតាមលោកស្នងការ បុគ្គលទាំង០២នាក់នៅក្នុងរូបភាពដែលបានផ្សព្វផ្សាយនេះ មិនមែនជាមន្ត្រីបម្រើការងារនៅអធិការដ្ឋាននគរបាលខណ្ឌមានជ័យ ហើយក៏មិនមែនជាមន្ត្រីនៃស្នងការដ្ឋាននគរបាលរាជធានីភ្នំពេញនោះដែរ៕