អាជ្ញាធរខេត្តកំពង់ស្ពឺ បង្ក្រាបទីតាំងសង្ស័យបង្កប់បទល្មើស Online Scams ឃាត់ខ្លួនជនបរទេស៦៣នាក់ ភាគច្រើនជាជនជាតិចិន

កម្លាំងគណៈបញ្ជាការ​ឯកភាពខេត្តកំពង់ស្ពឺ កាលពីយប់ថ្ងៃទី១៦ ខែកក្កដា ឆ្នាំ២០២៥ បានចុះបង្រ្កាបទីតាំងសង្ស័យមានការលួចលាក់បង្កប់បទល្មើស Online Scams មួយកន្លែងឃាត់ខ្លួនជនសង្ស័យជាជនបរទេសសរុបចំនួន៦៣នាក់ ក្នុងនោះភាគច្រើនជាជនជាតិចិន។

ប្រតិបត្តិការនេះ បានធ្វើឡើងនៅក្នុងទីតាំងផ្ទះសំណាក់មួយកន្លែងដែលមានអគារចំនួន៩ ក្នុងភូមិសាស្ត្រឃុំរកាកោះ ស្រុកគងពិសី ខេត្តកំពង់ស្ពឺ ដោយបានរកឃើញជនជាតិបរទេសដែលភាគច្រើនជាជនជាតិចិន សរុបចំនួន ៦៣នាក់ ក្នុងនោះមានស្ត្រី ចំនួន៤នាក់។

ក្រោយប្រតិបត្តិការ សមត្ថកិច្ចបានប្រមូលសម្ភារៈជាវត្ថុតាងរួមមានកំព្យូទ័រ, ទូរសព្ទ និងឧបករណ៍សម្រាប់បម្រើឱ្យការធ្វើសកម្មភាព ឆបោកតាមអនឡាញមួយចំនួន ចំណែកក្រុមជនដែលត្រូវបានឃាត់ខ្លួន និងវត្ថុតាងទាំងអស់ ត្រូវបានប្រគល់ជូនស្នងការដ្ឋាននគរបាលខេត្ត ដើម្បីបន្តអនុវត្តនីតិវិធី ខណៈសមត្ថកិច្ចនឹងចាត់វិធានការតាមផ្លូវច្បាប់ឱ្យតឹងរ៉ឹងបំផុតចំពោះមេក្លោងទាំងឡាយដែលជាប់ពាក់ព័ន្ធនឹងអំពើឆបោកតាមប្រព័ន្ធបច្ចេកវិទ្យានេះ៕