ដេប៉ូខ្សាច់តាម​ផ្លូវជាតិលេខ ៧៣A ស្រុក​ចិត្របុរី រំលោភចំណីផ្លូវ ធ្វើឱ្យប៉ះពាល់ដល់ផ្លូវសាធារណៈ

ដេប៉ូខ្សាច់មួយកន្លែង ស្ថិតក្នុងឃុំបុសលាវ ស្រុកចិត្របុរី ខេត្តក្រចេះ ដែលបានបូមខ្សាច់ពីទន្លេនិងស្តុកទុកនៅលើទីតាំង បង្ក​ឱ្យហៀរខ្សាច់ធ្លាក់មកលើចំណីផ្លូវជាតិលេខ 73A បាន​ធ្វើឱ្យប៉ះពាល់ដល់ផ្លូវសាធារណៈនិងការធ្វើដំណើររបស់ប្រជាពលរដ្ឋ។

ជាក់ស្ដែងនៅថ្ងៃទី១៦ ខែកក្កដា ឆ្នាំ២០២៥នេះ គេសង្កេតឃើញថា ទីតាំងដេប៉ូខ្សាច់ខាងលើ មានការ​ហៀរ​ខ្សាច់មកលើចំណីផ្លូវសាធារណៈ និងមានទឹកដក់ ដែលអាចនឹងបង្កឱ្យមានគ្រោះថ្នាក់ដល់អ្នកធ្វើដំណើរលើដងផ្លូវ។

ពាក់ព័ន្ធជុំវិញទីតាំងស្តុបខ្សាច់ខាងលើ លោក ឌីវ ពិសី អនុប្រធានមន្ទីររ៉ែ និងថាមពលខេត្តក្រចេះ បានបញ្ជាក់ប្រាប់អ្នកសារព័ត៌មាននៅថ្ងៃទី១៦ ខែកក្កដា នេះថា ទីតាំងដេប៉ូខ្សាច់ខាងលើ គឺមានច្បាប់អនុញ្ញាតិ ហើយពាក់ព័ន្ធនឹងការហៀរ​ខ្សាច់​មកលើផ្លូវនេះ គឺប៉ុន្មានថ្ងៃមុនលោកបានណែនាំឱ្យម្ចាស់ដេប៉ូសម្រួលម្ដងរួចមកហើយ តែនៅថ្ងៃនេះម្ចាស់ដេប៉ូមិននៅទីតាំង។ ទោះជាយ៉ាងណា លោក​នឹងឱ្យក្រុមការងារសម្រួលការហៀរខ្សាច់នេះបន្ថែមទៀត។

ដោយឡែក លោក សាំង ប៊ុនថេន ប្រធានមន្ទីរសាធារណការ និងដឹកជញ្ជូនខេត្តក្រចេះ ក៏បានបញ្ជាក់ប្រាប់ឱ្យដឹងដែរថា ចំពោះការហៀរខ្សាច់មកលើផ្លូវនេះ លោកតែងតែឱ្យក្រុមការងារសម្រួលជាប្រចាំ គឺមួយអាទិត្យម្ដង ហើយការដែលមានទឹក គឺដោយសារមានមេឃភ្លៀង។

លោកប្រធានមន្ទីរសាធារណការ បានបញ្ជាក់បន្ថែមថា ចំពោះចំណាត់ការវិញ លោកបានត្រឹមតែណែនាំ និងសម្រួលតែប៉ុណ្ណោះ ព្រោះចំណាត់ការ គឺជាតួនាទីរបស់មន្ទីររ៉ែ និងថាមពល៕

អត្ថបទ ប្រុញ វិធិន